Ayubi 14 - Wunta Mempori

Umari mate nahina mbo'u pompe'osaia 14:1-22

¹ ”Mia anu hina inso a beine, owowa tinuwuno ka bukeako sala-laroa.

² Kana bunga itewile, ka i'amba moleu, kana eo-eo itetadi moliu ka nahi pokompo'ia tehine.

³ Nde Ipo'arooke pengkita-Miu a mia kanatuu, ka wawao i aro-Miu ka Ipauo kara-karano?

⁴ Isemake polio mompokohina anu mempori inso anu mokoburu? Nahina maupo te'asa mia!

⁵ Tewala luwuno oleono manasaomo, porokono wulano manasaomo ndi Omiu, ka luwuno tidano umariomo Ipakosio, ranta nahi pokolimpaio,

⁶ Moikoano Ilimbao pengkita-Miu inso ndi onae ka po'ineeomo i penaa-naa ranta ka irasao oleono kana mia tinambo.

⁷ Menteeano da hinao pompe'osaiano keu: tewala tinuehi, onae wali mentumba, ka tumbano nahi penaa-naa tuwu.

⁸ Maupo hakano gagi motu'a a laro wita, ka tu'ono mate a laro pampawu,

⁹ mansano mowoo uwoi, onae mentumbaomo, ka moluarako sampano kana wuku mpinopaho anu bosiomo.

¹⁰ Sine tewala mia mate, onae nahi pokompelele, tewala mia mate, isuaomoke onae?

¹¹ Kana uwoi moliu inso a laro rano, ka korono tempae ka i'amba gagi motu'i,

¹² kanatuumo mia mepombole ka nahi pewangu mbo'u, ranta ka itampula langi, nahi dontelike, ka nahi pewangu inso a mpoturido.

¹³ Ha, po'ineeomo ka Iwuni aku a mpo'iangado mia mate, dumagai aku hawe ka imorini tekuda-Miu; pakosiakune mbo'u tempo ka mewowolo aku!

¹⁴ Tewala mia mate, ipolioke tuwu mbo'u? Aku momperorohi a laro luwuno oleo pompemasusaku, ranta ka ihawe tepotolaaku.

¹⁵ Komiu mepoboi, ka ongkue mbo'u aku sumangki; Komiu kumekewoio wineweuno kae-Miu.

¹⁶ Maupo mentee Idoao pelempaku, nahi Komiu mototoio halaku;

¹⁷ pe'ewaku ta tetondoni a laro mpundi-pundi, ka salaku Komiu tumutuwio ntu'u.

¹⁸ Sine kana torukuno tehoa terawo-rawo, ka torukuno watu mepahe inso a mpo'iangano,

¹⁹ kana uwoi kumikisi ira watu, ka usa marombo mompolomo awu wita, kanatuumo Ipokotampulao pomperorohiado mia.

²⁰ Ipokompetuunduo ranta nahina tampulaano, ranta ka ilako, Ibalio rupano ka Itenao lumako.

²¹ Luwuno anano gagi maramba sine onae nahi to'orio; ke ondae gagi tetewehia sine onae nahi pokonto'orio.

²² Onae mompemahaki butu a ngkoroino onaeno, ka mompemasusa hangano tinuwuno onaeno.”