Ayubi 13 - Wunta Mempori

I Ayubi kumorahakono kara-karano i aro-Do Ue Ala 13:1-28

¹ ”Menteeano, luwuno atuu ikitaomo mataku, irongeo ka ipokonto'orio biriku.

² Hapa anu tino'orimiu, kuto'orio koa mbo'u, nahi kutenagi saru omiu.

³ Sine ongkue, aku mepau ndi Ondae Anu Tedoa Pabawa, aku mingki kumorahakono kara-karaku i aro-Do Ue Ala.

⁴ Menteeano omiumo mia anu mpotutuwi pegaupi, omiumo luwu sando nahi mentee.

⁵ Ande-andeno nahi mpepau, mongkona atuu ta pinau ponto'oria inso ndi omiu.

⁶ Rongeomo pongkorahakoku, ka pekokoongakonomo pe'ewano wiwiku.

⁷ Behe komiuke mpegaupiako Ira Ue Ala, behe komiuke mpopauako Ira pegaupi?

⁸ Nde mebehe komiuke tumonda Ira Ue Ala, me'ewa kumorahako Ira?

⁹ Nde moiko koake, ba Doparesa komiu? Komiu mempolioke mopo'oo Ira kana mompopo'oo mia?

¹⁰ Manasa Ira humuku komiu, tewala mansa komiu mpetonda.

¹¹ Nde nahi komiu ntededengkeakonoke langkaino pabawa-Do ka i'alukomiu doitoa ndi Ondae?

¹² Luwuno pinaumu onaemo potundaano pampawu, ka kantamu kanta wita pulu.

¹³ Penoro-noromo! Aku mepau, maupo hapa anu ta gagi a ngkoroiku!

¹⁴ Ihiku aku umalaakono ngisiku, ka penaaku aku wawao a laro kungkuku.

¹⁵ Kitaomo, Ira mepate aku, nahina pomperorohiaku, sine aku kumorahakono peleluku i aro-Do.

¹⁶ Onaemo atuu anu ta kumadudui aku; sine mia mosa'o gauno nahi ta me'aro ndi Ondae.

¹⁷ Rongeomo temoi-moiko pinauku, pekokoongakonomo pinauku.

¹⁸ To'oriomo, kupatindao kara-karaku, kupe'ala-alao ongkue mentee.

¹⁹ Isema behe mekara-kara saru ongkue? I tempo koa mbo'u atuu aku momperodo ka mate.

²⁰ Poolo Omiu si weweuo ndi ongkue mongkona orua andio, ka nahi aku mewuni inso ndi Omiu;

²¹ Po'ineeomo ka Ipoko'olaio kae-Miu inso ndi ongkue ka pondendea ndi Omiu siimo i'alu aku!

²² Ipepoboimo, asalakono aku sumangki; ke ongkue mepau, ka Omiu sumangki.

²³ Opiamo hadiono salaku ka halaku? Ipauakunemo salaku ka halaku atuu.

²⁴ Tembio ka Iwunio rupa-Miu ka motae ongkue gagi iwali-Miu?

²⁵ Nde Komiu mokompondendeoke lewe anu pinuurino angi, ka molulu seami anu mokari?

²⁶ Hangano Omiu buri ira mongkona anu mopa'i ndi ongkue ka mopo'umbuakune salaku tempono kumongura;

²⁷ karuku Iwinsoo a laro mpanga, luwuno peleluku Idagaio, ka po'onsoi Ipasao i arono pele ngkaruku?

²⁸ Mia motopu kana keu mowuru, kana sangka anu kinaano ule-ule!”