Ayubi 12 - Wunta Mempori

I Ayubi umakuio pabawa-Do ka ponto'ori-Do Ue Ala 12:1-25

¹ Sumangki i Ayubi,

² ”Lano, omiumo mia atuudo, ka meronga omiu ponto'ori ta mate.

³ Ongkue mbo'u hinao ponto'ori, mengkena kana omiu, nahi kutenangi saru omiu; isema nahi to'orio mongkona anu kanatuu?

⁴ Ongkue gagi pengingisiado pe'asa miaku, ongkue, anu mebooli ndi Ondae Ue Ala ka mohawe sangkino, ongkue anu mentee ka moleo gagi pengingisia.

⁵ Asa pontetewehi a mia masola, kanatuumo pohaweno mia anu rodo tuwuno, asa ponsepi a mia anu telendo karuno.

⁶ Rodoomo kemado puu mponsolangi, ka merodo iramo anu mpokotesingkao tekuda-Do Ue Ala, ondae anu inehedo wawa Ira Ue Ala a ngkaedo.

⁷ Sine pesikenomo a ngkondehora, onae ta moweeakomu pompaguru, a manu-manu i laro meene, onae ta moweeakomu pompokomengkaa.

⁸ Ke pepaumo a ntolino, onae ta moweeakomu pompaguru, maupo bou a ntahi ira mpepau-pauakomu.

⁹ Isema i olono luwuno atuu anu nahi to'orio nine kae-Do Ue Ala anu weweuo atuu;

¹⁰ nine a ngkae-Do ipo'ia penaano luwuno anu tuwu ka penaano sompo mia?

¹¹ Kombake biri umarahakono luwuno pau, kana langira mompenami kaanga?

¹² Paudo mia mponto'ori kongko a mia anu mota'u, ka ponto'ori a mia anu tende ntinuwu.

¹³ Kahinaano ndi Ondaemo Ue Ala ponto'ori ka roso, Ondaemo anu hinao pontimbanga ka ponto'ori.

¹⁴ Tewala Ondae rumongkao, nahina anu wali mokowanguo; tewala Ondae rumakoo asa mia, nahina anu mokompotolao.

¹⁵ Tewala Ondae mobunto uwoi, luwuno mokari; tewala Ondae motolao, maupo wita i'aluo.

¹⁶ Ndi Ondaemo pabawa ka ponangia, Ondaemo anu pabawaio moiko mia anu pansia maupo mia anu mompokopansia.

¹⁷ Luwuno puu mpompatudu Dowawa ira kokaru-karu, ka luwuno puu mpobitara Doweweu ira tetadi pinewowolodo.

¹⁸ Dokaleo pongu anu pinokonado luwuno mokole ka tongado inonggoako koloro.

¹⁹ Luwuno sando mpesomba Dowawa Ira kokaru-karu, ka anu moroso Dolundio.

²⁰ Mia anu mempine'ala-ala Do'onto ira mpepau, mokogagi ira mia memota'u bulalingo.

²¹ Dopoweweuako ira pontetewehi a luwuno mia pinemota'u, ka motolao sulepeno mia moroso.

²² Dopokomengkaao rahasiano wongi-wongi, ka mowawa worikidi a mewine.

²³ Ondae weweu ira tongku ntetiangi, umarino atuu mepate ira, ka mokohadio ira tongku, umarino atuu sumaari ira.

²⁴ Ondae pu'uno luwuno petewawa i wawontolino mebulalingo, ka weweu ira ntesaa a mpada malua anu nahina sala.

²⁵ Ondae mperare a laro wongi-wongi anu nahina mewine; ka Doweweu ira kobangku-bangku kana mia molangu.”