Ayubi 10 - Wunta Mempori

Hapake tinoo-Do Ue Ala mongkona marasaia? 10:1-22

¹ ”Kute'osaakono tuwuku, ineheku motolao masusaku, ineheku mepau a laro marasaino laroku.

² Aku mepau ndi Ondae Ue Ala: Siimo Ipokonsala aku, sine Ipauakune tembio ka Ipekara-karaakune.

³ Hapa ura-Miu moweweu pompokonsiia, tumadio hasilino wineweuno kae-Miu, ka mokorosoo tinoono mia mosa'o gauno?

⁴ Nde hinaoke mata mia-Miu? Nde kana pongkitano miake pongkita-Miu?

⁵ Nde kana oleono miake luwuno oleo-Miu, luwuno ta'u-Miu kana luwuno oleodo tama

⁶ onaemo ka Ipo'ungke-ungkeakune salaku, ka paresao halaku,

⁷ kahinaano Ito'orio nine nahina salaku, ka nahina maupo te'asa mia mokompotola aku inso a ngkae-Miu?

⁸ Kae-Miumo anu mokogagio ka weweu aku, sine lembuino mewolili Komiu ka mingki mepate aku?

⁹ Ipewowoloomo nine Omiu anu weweu aku inso a wita pulu, nde Komiu wali mokogagi aku pampawu?

¹⁰ Komba Omiuke anu tumawa aku kana susu, ka mokobaku aku kana keju?

¹¹ Omiu mokonaakune kuli ka ihi, saru mosombuakune wuku ka ia.

¹² Tuwu ka petenunu mompehohawa Iweeakune, ka pompekaria-Miu dumagaio penaaku.

¹³ Sine ndiomo anu winuni-Miu i laro aroa-Miu; kuto'orio nine onaemo andio tinoo-Miu:

¹⁴ Tewala moweweu aku hala, Komiu dumagai aku, ka nahi Komiu motola aku inso a nsalaku.

¹⁵ Tewala ongkue sala, masola akumo! Ka tewala ongkue mentee, nahi aku sapa tumandeo uluku, ongkue bukeako pontetewehi ka mowohiako marasaiku.

¹⁶ Tewala ongkue mompelangka-langkai, Komiu lumulu aku kana singa, ka wali mopokitao ndi ongkue pabawa-Miu anu tinengiriako.

¹⁷ Komiu wawa ira sakosii susua ndi ongkue, mokolangkaio tekuda-Miu ndi ongkue, ka wawa ira sorodadu susua umewai aku.

¹⁸ Tembio ka Ipo'inee aku meluarako inso a mpe'anakaa? Laluopo kumate se'eluno napi domengkita aku mia!

¹⁹ Gagi, kana nahi kuhori hina; inso a mpe'anakaado i ine ongkue tetutu winawa a ngkaburu.

²⁰ Kombake oleo ntumuwuku butu tedei? Po'inee akumo asa-asaku, ka kupokomawongko sarai,

²¹ se'eluno napi kulako ka nahi kupekule mbo'u, a wita anu wongi-wongi ka worikidi,

²² a wita anu wongimpusu kana worikidia, ka anu nahi te'atora, isua wantano mewine mengkena saru wongi-wongia.”