Amosi 9 - Wunta Mempori

Pongkita ko'olima: Ondae i Ue mentade umpeda meda pontunua pesomba 9:1-6

¹ Kukita Ira i Ue mentade umpeda meda pontunua pesomba, ka mepau Ira, ”Tundukiomo ulu karuno temeroku, ranta ka itelelu luwuno montoweano, ka hoao a wawo uludo luwudo, ka Aku mepateakono ponai anu da mentuwu; nahina maupo te'asa mia inso ndi ondae mokompolai ka nahina maupo te'asa mia inso ndi ondae mokompetolahako.

² Maupo dompekeke hawe a mpo'iangano mia mate, inso mbo'u i ra'ai kae-Ku umala ira. Maupo dompewuatako i langi, inso i ra'ai mbo'u Aku motii ira.

³ Maupo dompewuni i punsuno torukuno Karameli, Aku mepo'ungke ka Aku umala ira inso i ra'ai; maupo dompewuni a empehino tahi inso a mata-Ku, Aku parentao ule ka itungku ira i ra'ai.

⁴ Maupo dompelempa gagi mia tinawa i arono iwalido, Aku parentao ponai mepate ira i ra'ai. Aku mensiroi ira ka domemasola ka komba moikoa.”

⁵ Ondae Ue Alano luwuakoano, Ondaemo anu dumanggio tolino ranta ka itelelu, ka luwuno palilino mpompemasusa, asa wawontolino mewuatako kana Koro Nili, ka tenono mbo'u kana Koro Masiri.

⁶ Ondae anu mowangu bolongko-Do i wawono i langi ka monaakono empehino ato-Do i wawonotolino; Ondae anu mompoboi uwoi ntahi ka umuwuo i wawontolino, Ondae i Ue, onaemo nee-Do.

Tongku bininiki nahi Dotarima ira Ue Ala 9:7-10

⁷ ”Kombake omiu kana to Etiopia ndi Ongkue, hei to Isaraeli?” Kanandiomo pau-Do i Ue. ”Kombake Kutaateomo Isaraeli meluarako inso i wita Masiri, to Pelisiti inso i Kapitori, ka to Arami inso i Kiro?

⁸ Menteeano, mata-Do Ue Ala te'aro a poparentaa anu tehala andio: Aku mokoropuo inso i wawontolino; Sine nahi Aku rumopuo inuleno i Yako ranta ka ipingko,” kanandiomo pau-Do i Ue.

⁹ ”Hangano menteeano, Kuparenta ira, ka Aku dumuku ira tongku Isaraeli i olono luwuno tongku, kana mia montirisaako pontirisa, ka nahina maupo te'asa one anu tedonta a wita.

¹⁰ Hangano ponai, ira memate luwuno mia tehala i olono bawaa-Ku anu mpotae: Nahi Komiu mo'ineeo masolaa umpeda ka humawe kami.”

Dandi mongkona pompomulea 9:11-15

¹¹ ”Ia oleo atuu Aku wali montadeo laikano i Daudi anu tebangkuomo; Aku tumutuwio umeteno rereno, ka Aku wali wanguo rereno anu tehoa; Aku wali wanguo kana se'eluno,

¹² ka domempabawaio anu da mentuwu inso a tongku Edomi ka luwuno tongku anu pinauako nee-Ku,” kanandiomo pau-Do i Ue anu weweuo luwuno andio.

¹³ ”Menteeano, tempono ta hawe,” kanandiomo pau-Do i Ue, ”Nine puu mpompadeko ta ronga tumonda bungkuo puu mponsowi ka ponsesaa wua anggoro ronga tumonda bungkuo porawo inii; luwuno torukuno ta mompo'iti anggoro wo'ohu ka luwuno pongku wita ta moowo.

¹⁴ Aku momuleo teweweudo bawaa-Ku Isaraeli: ira mewanguo luwuno kota anu terawo-rawo ka mpo'iangario; ira mpompahoio luwuno lere anggoro ka mpo'inu anggorono; ira meweweuo luwuno lere wua ngkeu ka mengkaano wuano.

¹⁵ Aku paho ira i witado, ka nahi ira mebinuta mbo'u inso a wita anu Kuweeako iramo,” pau-Do i Ue, Ue Alamiu.