Amosi 8 - Wunta Mempori

Pongkita ko'opaa: Baki saru hadio rupa wua anu motaha 8:1-3

¹ Ndiomo anu Dopopokitao Ue Ala ndi ongkue: Tengkitaomo asa baki me'ihi hadio rupa wua anu motaha.

² Ka Do'amba mepau, ”Hapake kinitamu, Amosi?” Kusangki Ira, ”Asa baki me'ihi hadio rupa wua anu motaha.” Mepau Iramo i Ue ndi ongkue, ”Poko'ariano haweomo a bawaa-Ku Isaraeli. Nahi Aku umampuni ira mbo'u.

³ Luwuno penani a mpo'ianga mempori ta gagi ponsabangi ia oleo atuu,” kanandiomo pau-Do Ue Ala. ”Hadio wata ngkoroi. Mia mpetadiakono isua-suamo koa. Penoro-noromo!”

Pepopoto'ori a mia anu mompokonsii pe'asa miano 8:4-8

⁴ Rongeomo andio, omiu anu mpompokonsii mia mongkokolaro, anu mpopepate mia marasai i wita andio.

⁵ Omiu anu mpopewowolo, ”Te'ipiake itampula wula wo'ohu, ka imoiko tompo'asa gandu? Te'ipiake ilalo oleo Saba, ka imoiko tompo'asa tarigu saru mpokongkodeio ponsa'u efa, mokolangkaio mobeano sikala, moweweu molengku mompake pontimba nahi mentee'

⁶ ka topo'oli mia anu molema hangano doi ka mia mongkokolaro hangano asa pasa sandala; ka mo'asa gandu anu mosa'o?”

⁷ Ondae i Ue mesumpa Iramo a mpo'undeno i Yako, ”Menteeano nahi Aku hori kumolupeo luwuno wineweudo!

⁸ Kombake ta mondidi-ndidi tolino hangano mongkona atuu, ranta sompo palilino mpompemasusa? Kombake ta mewuatako asa wawontolino kana Koro Nili, tewawa-wawa ngkoraane-ngkoramai ka i'amba tenono mbo'u kana Koro Masiri?”

Wongi ntonga oleo ka Po'inombo 8:9-10

⁹ ”Ia oleo atuu,” kanandiomo pau-Do Ue Ala, ”Aku weweuo mata oleo sumoo tekonai meene ka weweuo tolino wongi-wongi tekonai oleo mewine.

¹⁰ Aku balio porame-ramemiu gagi po'inombo, ka luwuno penanimiu gagi ponsabangi. Aku mokonao sawu po'inombo a sompo tonga ka mokolondao sompo ulu. Aku weweuo kana mo'inomboako ana asa-asa, ranta poko'ariano kana oleo anu tedoa mopa'i.”

Mokoninggo ka mokorangaako pau-Do i Ue 8:11-14

¹¹ ”Menteeano, tempono ta hawe,” kanandiomo pau-Do Ue Ala, ”Aku montena mokoninggoa a wita andio, komba mokoninggoako kaanga ka komba mokorangaako uwoi, sine a mporongea pau-Do i Ue.

¹² Ira mpelakopi inso a ntahi lumako a ntahi ka mpelakopi olai inso i utara lumako i sabaano oleo ira mpo'ungke pau-Do i Ue, sine nahi domehaweo.

¹³ Ia oleo atuu luwuno ana beine anu tekosi ka luwuno ana ntama kontuwuado ira ntebangku malimpu hangano mokoranga;

¹⁴ ondae anu mpesumpa a neeno i Asima, pesomba beine Samaria ka dompotae, ’A nee-Do Ue Alamiu anu tuwu, hei Dani!’ saru, ’Tiano sala anu nahi mempori lumako i Bereseba!’ Ira ntebangku ka nahi ira mpewangu mbo'u.”