Amosi 7 - Wunta Mempori

Pongkita ko'aasa: Kosume 7:1-3

¹ Ndiomo anu pinopokita-Do Ue Ala ndi ongkue: Tengkita Iramo moweweu bawaano kosume, i tempono ewo da'iaopo mompu'u tuwu, onaemo atuu ewo dasarai umarido mensewoo puu mponsewo ewo tiado mokole.

² Tempono kosume mompu'u kumaano ka ipingko luwuno anu tuwu a wita, mepau aku, ”Oo Ue Ala, I'oniniakami hala mami! Kana'umpe i Yako ta mokompekorahako? Kombake onae tedoa molema?”

³ Ka Do'amba i Ue balio tinoo-Do mongkona pohuku atuu. ”Mongkona atuu nahi ta gagi,” pau-Do i Ue.

Pongkita ko'orua: Api 7:4-6

⁴ Ndiomo anu pinopokita-Do Ue Ala ndi ongkue: Tengkita Iramo Ue Ala moboio api ta pohuku. Api atuu kumaano uwoi piingko a ondaloano ntu'u ka ta piingko ikaano wita lere.

⁵ Umarino atuu mepau aku, ”Oo Ue Ala, ku'emao Ipenaa-naakonomo atuu! Kana'umpeke i Yako ta mokompekorahako? Kombake onae tedoa molema?”

⁶ Ka Do'amba i Ue balio tinoo-Do mongkona pohuku atuu. ”Ndio mbo'u nahi ta gagi,” pau-Do Ue Ala.

Pongkita ko'otolu: Koloro pompokomoleo 7:7-9

⁷ Ndiomo anu Dopopokitao ndi ongkue: Tengkita Iramo i Ue mentade a wawo rere watu anu sinongkaako koloro pompokomoleo, ka a ngkae-Do hinao koloro tida.

⁸ Ka i'amba mepau Iramo i Ue ndi ongkue, ”Hapake anu kinitamu Amosi?” Sumangki aku, ”Koloro pompokomoleo!” Mepau Iramo i Ue, ”Menteeano, Aku monaa koloro pompokomoleo i tonga-tongano bawaa-Ku Isaraeli; nahi Aku umampuni ira mbo'u.

⁹ Luwuno pesombaano i Saki Aku mokotampulao ka luwuno po'ianga memporido to Isaraeli ta rinongka, ka somborino i Yerobea Aku umewaiakono ponai.”

I Amosi sinaari inso i Beteli 7:10-17

¹⁰ I Amasia sando mpesomba i Beteli, montena mia lumako ndi Yerobea, mokole i Isaraeli, saru pe'oliwi, ”I Amosi moweweuomo tepo'asaa umewai komiu ueku i tonga-tongano tongku Isaraeli; wita andio nahi pokompeteao mbo'u a luwuno pinauno.

¹¹ Hangano kanandiomo pinauno i Amosi: I Yerobea ta pinepateako ponai ka to Isaraeli manasa ira melako inso i witado gagi mia tinadi.”

¹² Ka i'amba motaeomo i Amasia ndi Amosi, ”Puu pongkita, lakomo, polaimo omue i wita Yehuda! Po'ungkemo pepotuwumu i ra'ai, pompaumo anu ta gagi i ra'ai!

¹³ Sine siimo mbo'u pompau anu ta gagi i Beteli, hangano onaemo andio po'ianga memporido mokole, onaemo andio raha memporino poparentaa.”

¹⁴ Sumangki i Amosi ndi Amasia, ”Ongkue komba nabi ka ongkue komba tewinso bawaano nabi, tendeano ongkue andio puu mpopakambi ka puu mpo'opu wua ara.

¹⁵ Sine Ondae i Ue umala aku inso a mpopakambia asa bawaa bembe bimba, ka Ondae i Ue mepau ndi ongkue: Lakomo, pompaumo anu ta gagi a bawaa-Ku Isaraeli.

¹⁶ Kanandio-andio, rongeomo pau-Do i Ue! Omue motae, ’Siimo pompau anu ta gagi umewaio Isaraeli, ka si kuahako ira inuleno i Saki.’

¹⁷ Onaemo pu'uno, kanandiomo pau-Do i Ue: Beinemu ta mebelesu i kota, ka luwuno anamu tama ka beine ira memateako ponai; witamu ta tinia-tiaako koloro posongka. Omue komate i wita anu mokoburu, ka to Isaraeli manasa ira melako inso i witado gagi mia tinadi.”