Amosi 6 - Wunta Mempori

Rodoa anu nahi ta tehine 6:1-14

¹ ”Memasola iramo ntu'u mia anu momperodo i Sioni, mia anu momperodo i torukuno Samaria, luwuno mia memota'u inso a tongku amba-ambano, anu dontepohaweakono tongku Isaraeli!

² Pe'asambaliakomo i Kalane, ka kitaomo! Pelempamo inso i ra'ai lumako i Hamati anu langkai atuu, ka lakomo i Gati witado to Pelisiti! Nde memoiko irapoke sekono luwuno poparentaa andio, ke maluaopoke witado sekono witamu?

³ Hei omiu, anu mpotae olai oleo masolaa, sine weweuo pabawa pobobarasai tekense umpeda;

⁴ anu mepombole a mpoturia inso a ntindu ka mpesana-sanaa a dasa; anu mpongkaa anano bimba inso a bawaano bembe bimba ka anano sapi inso i olono bawaano sapi anu mewalo;

⁵ anu mpenani-nani menunu unino gambusu, kana i Daudi, ondae mpoweweu anu me'uni-uni tiano koroido;

⁶ anu mo'inu anggoro inso a loea kodei, ka mehahiako lana anu lalu moiko, sine nahi pompemasusa a nterawono inuleno i Yusupu!

⁷ Onaemo pu'uno, kanandio-andio ondaemo anu amba-ambano ira mewinawa gagi mia tinadi, ka telaloomo maroano pogawedo mia anu mpesana-sanaa atuu.”

⁸ Ondae Ue Ala mesumpa Iramo a ngkoroi-Do, kanandiomo pau-Do i Ue, Ue Alano luwuakoano, ”Kumokokowuereakono pompelangka-langkaino i Yako, ka o'aliaako ira benteno; Aku meweengakono kota saru ihino.”

⁹ Tewala da hinao tebinta hopulu mia i larono asa raha, ondae mbo'u ira memate.

¹⁰ Maamano, puu mpotunu anu tumunuo wata ngkoroi atuu, ta aiwa tumandeo ka lumuarakono wata ngkoroi atuu inso a raha atuu. Onae mesikeno a mia anu kongko i bungkuno raha, ”Da hinaoke mia pe'asamu?” Sangkino, ”Nahina.” Ka i'amba motae, ”Penoro-noro si pepau!” Hangano komba tempono popauo nee-Do i Ue!

¹¹ Hangano, menteeano Ondae i Ue meparenta, ka raha langkai pinobangku gagi terongkoa ka raha kodei gagi siba.

¹² Mpelulu irake ngara a wawo pongku watu, ke pompadekoako ira sapike mia i ra'ai? Mentee ntu'u, imebaliomo moleoa gagi rasu ka wuano menteea gagi rasu mopa'i!

¹³ Hei omiu, anu memawongko hangano kota Lodabari, ka anu mpotae, ”Kombake hangano rosoto ontaeto tompoko'alao Karanaimi tiato?”

¹⁴ ”Hangano menteeano, Aku wanguo asa tongku umewai komiu, hei tongku Isaraeli,” kanandiomo pau-Do i Ue, Ue Alano luwuakoano, ”ka ira mpokonsii komiu inso a nsala mewinso i Hamati hawe a ngkorono mo'are i Araba.”