Amosi 5 - Wunta Mempori

Ponsabangi mongkona Isaraeli 5:1-3

¹ Rongeomo pau andio anu kupenaniako gagi ponsabangia mongkona omiu, hei tongku Isaraeli,

² ”Tebangkuomo, nahi ta mewangu mbo'u ana beine Isaraeli. Onae kombole-mbole a wawo witano, nahina anu wanguo.”

³ Hangano kanandiomo pau-Do Ue Ala a tongku Isaraeli, ”Inso a ngkota anu lumako metea asa nsowu mia, toreano asa etu miamo koa, ka inso anu lumako metea asa etu mia, toreano hopulu miamo koa.”

Sala lumako a ntuwua 5:4-6

⁴ Menteeano kanandiomo pau-Do i Ue a tongku Isaraeli, ”Ime'ungke Aku, ka komiu mentuwu!

⁵ Siimo ime'ungkeo Beteli, siimo imelako i Giliga ka siimo impe'asambaliako i Bereseba, hangano Giliga manasa tinadi a mpontadia ka Beteli ta tampula.”

⁶ Ungke Iramo i Ue, ka komiu mentuwu, kasi Dotiuo inuleno i Yusupu anu piingko kana ikaano api, nahina anu mepateakono Beteli.

Pongkuahako a nahi moleoa 5:7-13

⁷ Hei omiu anu mpobali moleoa gagi rasu mopa'i ka anu metadiakono menteea a wita!

⁸ Ondaemo anu moweweu anano wula opitu ka anano wula anu otolu anu balio wongi-wongia gagi mo'oru ka anu weweuo meene gagi wongi-wongi kana wongi. Ondae anu moboio uwoi ntahi ka umuwuo a wawo ntolino, Ondae i Ue, onaemo atuu nee-Do.

⁹ Ondae anu moweweu masolaa montiu anu moroso, ranta masolaa umaluo kota mebente.

¹⁰ Dome'o'aliaakono mia anu mongkuahako a mpewowa langkai, ka motewedo mia anu mepau moleo.

¹¹ Omiu mopokonsii mia anu molema ka mpo'ema sima'uluno gandu. Onaemo pu'uno, maupo imewangu ira raha inso a watu pina'o, nahi komiu mpo'iangario; maupo impoweweu lere anggoro anu tekosi, nahi komiu mpo'inu anggorono.

¹² Kuto'orio kana'umpe hadio ntu'u wineweumiu anu mosa'o ka kogagi-gagino ntu'u halamiu, hei omiu anu pokonsii ira mia mentee, anu montarima pompowee nahi pototono ka anu mebungkui ira mia mongkokolaro a mpewowa langkai.

¹³ Onaemo pu'uno mia anu moleo pinewowolono ta mo'ia i tempo atuu, hangano tempo atuu tempo anu mosa'o.

Tuwu ke mate 5:14-17

¹⁴ Ungkeomo anu moiko ka osi'i anu mosa'o, ka imentuwu. Bakanandio Ondae i Ue, Ue Alano luwuakoano, Ira kumongkomi komiu, kana anu pinaumiu.

¹⁵ O'aliaakonomo anu mosa'o, kekewoiomo anu moiko ka weweuomo moleoa a mpewowa langkai. Bara'ura Ondae i Ue, Ue Alano luwuakoano Ira mehohawao inuleno i Yusupu anu da mentuwu.

¹⁶ Menteeano, kanandiomo pau-Do i Ue, Ue Alano luwuakoano, Ondae Ueku, ”A luwuno tanalapa ta hina ponsabangia ka a luwuno sala kodei ira mpebooli mia, ’Adoo! Adoo!’ Puu mpelere pinoboi ka ipo'inombo ka luwuno anu monsabangi ka iposabangi.

¹⁷ A luwuno lere anggoro ta hina ponsabangia, hangano Ongkue telalo i tonga-tongamiu,” pau-Do i Ue.

Oleo-Do i Ue 5:18-20

¹⁸ Memasola iramo ntu'u anu me'ineheakono oleo-Do i Ue! Hapa tuduno oleo-Do i Ue atuu ndi omiu? Oleo atuu wongi-wongia, komba mewine!

¹⁹ Kana asa mia molai inso a nsinga, asa berua tumowokio, sahaweno i raha metumboakono kaeno a rere, asa ule tumungkuo!

²⁰ Kombake oleo-Do i Ue atuu wongi-wongia ka nahi mewine, wongi mpusu ka nahina wanta ndi onae?

Pesombado to Isaraeli Do'o'aliaakono i Ue 5:21-27

²¹ ”Ku'o'aliaakono, Kupekodeio porame-ramemiu ka nahi Kupe'eheo tepumpua langkaimiu.

²² Maupo impesombaakono ndi Ongkue luwuno pesomba tinunu ka pesomba kaangamiu, nahi Kubehe, ka pesomba tekaduduiamiu onaemo pinotuwu anu mewalo, nahi Aku kumitao.

²³ Poko'olaimo inso ndi Ongkue maroano penani-nanimiu, unino gambusumiu nahi Aku rumongeo.

²⁴ Sine laluopo moleoa mekalu-kalulu kana uwoi ka menteea kana uwoi korono anu waa mpiha.”

²⁵ ”Nde impesombaakonoke ndi Ongkue pesomba sinumbele ka pesomba kaanga, i larono pato pulu nta'u i pada one atuu, hei Isaraeli?

²⁶ Komiu mewawao lahumoa Sakuti, mokolemiu ka i Kewani, anano wula lahumoamiu, luwuno tinahamiu anu imeweweuomo tiamiu atuu,

²⁷ ka Aku wawa komiu a pontadia olai i asambalino Damasi,” pau-Do i Ue, Ue Alano luwuakano, nee-Do.