Amosi 3 - Wunta Mempori

Nabi puu mpau-Do Ue Ala 3:1-8

¹ Rongeomo pau andio, anu pinau-Do i Ue mongkona omiu, hei to Isaraeli, mongkona luwuno suku anu umariomo Kutaateo meluarako inso i wita Masiri,

² ”Butu omiu anu tino'ori-Ku inso a luwuno suku i wawontolino. Onaemo pu'uno Aku humuku komiu hangano luwuno salamiu.

³ Melempa irake orua mia meronga-ronga, ba napi dopedandi?

⁴ Mengaolike asa singa a ntobu, ba nahi pohawe kaangano? Mohohoike singa mongura inso a nsenono, ba napi porako hapa-hapa?

⁵ Kona ohoke manu-manu, ba nahina pinotakoako oho a wita? Tesembike oho inso i wita, ba nahina anu koona?

⁶ Tewala pinuuri tawuwua i asa kota, nahi dompondidi-ndidi ke palilino? Tewala gagi urasa'o i asa kota, kombake Ondae i Ue anu weweuo?

⁷ Mentee ntu'u, Ondae Ue Ala nahi Doweweu ba nahi Dopokomengkaao pomputusi-Do a ntetenaa-Do, luwuno nabi.

⁸ Singa mengaoliomo, isemake nahi doito? Ondae Ue Ala mepau Iramo, isemake anu nahi pompau anu ta gagi?”

Isaraeli ta rinawo-rawo 3:9-15

⁹ Paleleomo a luwuno bente i Asidodi ka a luwuno bente i wita Masiri, pauomo, ”Impepumpumo a ntorukuno Samaria ka mengkitaomo tewukaa langkai i tongano kota atuu ka popokonsiia anu hina i tu'ai.”

¹⁰ ”Nahi domponto'ori mpoweweu anu mentee,” kanadiomo pau-Do i Ue, ”Ondae mpompokonsii ka pobobarasai i luwuno bentedo.”

¹¹ Onaemo pu'uno kanandiomo pau-Do Ue Ala, ”Iwali ta hina a mpetengi-tengino witamiu, rosomu ta inonini inso ndi omue, ka luwuno bentemu ta pinomuru!”

¹² Kanandiomo pau-Do i Ue, ”Kana puu mpopakambi mompotola inso a ngangano singa orua tangkelari ke lewe biri, kanatuumo to Isaraeli anu mpo'ia i Samaria ira mempinotola butu kana tompano poturia ke asa mpole karuno dasa.”

¹³ ”Rongeomo, ka popoto'oriomo inuleno i Yako,” kanandiomo pau-Do Ue Ala, Ue Alano luwuakoano,

¹⁴ ”Menteeano i tempono Kuhukuo Isaraeli a luwuno wineweuno mosa'o, Aku mompotiiakono pohuku a luwuno meda pontunua pesombano Beteli. Tandu-tanduno meda pontunua pesomba atuu pinudu ka tedonta a wita.

¹⁵ Aku mobangkuo po'ianga i tempono morini saru po'ianga tempono mokula; terawo-rawoomo luwuno raha tindu, ka pingkoomo luwuno raha langkai ka tekosi,” kanandiomo pau-Do i Ue.