Amosi 2 - Wunta Mempori

¹ Kanandiomo pau-Do i Ue, ”Hangano otolu wineweuno Moabi anu mosa'o, ke opaa, nahi Aku balio mbo'u pomputusi-Ku. Hangano itunuomo luwuno wukudo mokole i Edomi gagi kapuru.

² Aku motolao api i larono Moabi, ranta luwuno bente mo'ai luwu. I Moabi ta mate a laro ntewukoa, itondao pohio i tempono me'uni tawuwua.

³ Aku mokotampulao anu pabawa inso i tonga-tongano ka mepateo luwuno anu langkai potorono saru onae,” pau-Do i Ue.

Pohuku tiano Yehuda 2:4-5

⁴ Kanandiomo pau-Do i Ue, ”Hangano otolu wineweuno Yehuda anu mosa'o, ke opaa, nahi Aku balio pomputusi-Ku. Hangano nahi domentarimao songka-Do i Ue, ka nahi dompe'ini a luwuno pompakosi-Do. Dompokopansia ira lahumoa mpegaupi anu tinondado uempu'udo.

⁵ Aku mompotola api a laro Yehuda, ranta luwuno bente Yerusale mo'ai luwu.”

Pohuku tiano Isaraeli 2:6-16

⁶ Kanandiomo pau-Do i Ue, ”Hangano otolu wineweuno Isaraeli anu mosa'o, ke opaa, nahi Aku balio mbo'u pomputusi-Ku. Ondae me'asa ira mia mentee hangano doi ka mia mongkokolaro hangano asa pasa sandala.

⁷ Ondae melolanda ira uludo mia molema a laro pampawu ka mebungkui ira mia marasai inso a nsala moleoa; ana ka ama lumako mewowaliako asa ana beine, ranta molinggei memporino nee-Ku.

⁸ Ondae mpepombole i horino sompo meda pontunua pesomba a wawo sangka ginadedo mia, ka me'inuo anggorodo mia anu medinenda a raha-Do Ue Alado.

⁹ Kahinaano inso i arodo Kuropu iramo to Amori, anu ondaudo kana ondauno keu arasi ka rosodo kana keu tarabanti. Kupokotampulaomo wuano inso i wawono ka hakano inso i totono.

¹⁰ Kahinaano Ongkuemo anu tumaate komiu mpeluarako inso i wita Masiri ka wawa komiu i larono pato pulu nta'u i pada one, ka impetorokio witado to Amori.

¹¹ Kupotoro iramo asa ntia anamiu gagi nabi ka inso a luwuno mangalitaumiu megagi mia anu meweengakono tumuwuno ndi Ondae. Komba kanatuuke, hei to Isaraeli?” Kanandiomo pau-Do i Ue.

¹² ”Sine omiu mpoweeako ira mia anu meweengakono tumuwuno ndi Ondae mpo'inu anggoro ka parenta ira nabi: Si mpopau anu ta gagi!

¹³ Menteeano, Aku lumeluo pelandaamiu kana teleluno kareta anu bukeako wuano gandu.

¹⁴ Anu magasi nami ta mokompolai mbo'u, anu moroso nami mentudu rosono, ka anu moroso ntu'u ka mosia nahi pokompetolahako.

¹⁵ Puu pompana nahi pokompekorahako, anu magasi pelempano nahi ta tepotola ka anu mesawi a ngara nahi pokompetolahako.

¹⁶ Ka anu lalu mosia i olodo luwuno puu mpetea ta molai kolambe-lambe ia oleo atuu,” kanandiomo pau-Do i Ue.