3 YOHANE 1 - Wunta Mempori

Tabea 1-4

¹ Inso a mpenatua hawe ndi Gayusi anu kinekewoi, anu pinehohawaku a laro menteea.

² Pepaekompo anu kinekewoiku, mekakai aku, ku'ema-emao ka umoi-moiko ka madoo-doo koa a luwuakoano, mengkena kana sumangamu moi-moiko koa.

³ Hangano mawongko ntu'u aroaku, tempono ba opia ira pepaekompo mehawe ka mpesakosii mongkona tuwumu a laro menteea, hangano omue lano tuwu a laro menteea.

⁴ Ndi ongkue nahina mawongkoa anu lalu langkai sekonopo rumongeo, nine luwuno anaku mentuwu ira a laro menteea.

Mambe tulungi ka pe'ewaa 5-12

⁵ Pepaekompo anu kinekewoiku, moweweukomo kana mia mompe'ala-ala, nde uweweuo luwuakoano tiado pepaekompo, maupo ondae mia mehawe.

⁶ Mpesakosii iramo i arodo bawaa mongkona pompehohawamu. Moiko ntu'u wineweumu, tewala utulungi ira a laro pelempaado, menunu saru anu Dopemoikoo Ue Ala.

⁷ Nde hangano nee-Do mpelungka iramo saru nahi dompontarima maupo hapa inso a mia anu nahi domento'ori Ira Ue Ala.

⁸ Asalakono tomentarima ira mia anu kanandio, ka tompo'ala koa tia a anggaado tiano menteea.

⁹ Moburi akumo tedei a bawaa, sine i Dioterepesi anu ineheno gagi mia tinudu i olodo, nahi behe umakui kami.

¹⁰ Onaemo pu'uno, tewala hawe aku, aku umemao ka ipinekokoongako luwuno poweweuno anu iweweuomo, hangano onae nahi penaa-naa mewuresengi mepaukiakami; ka napi pompete'osa saru atuu, onae isa'a komba butu nahi behe tumarima ira pepaekompo anu mehawe, sine i'onto ira mbo'u mia, anu ta tumarima ira ka lumuarako ira mia atuudo inso a bawaa.

¹¹ Pepaekompo anu kinekewoiku, si pandirio anu mosa'o, tendeano anu moiko. Ba isema moweweu moiko, onae te'inso ndi Ondae Ue Ala, sine ba isema moweweu mosa'o, onae nahi hori kumita Ira Ue Ala.

¹² Mongkona i Demeteriu luwuno mia mpesakosii anu moiko, tendeano menteea isa'a mesakosii anu kanandio. Ka omami mbo'u mpesakosii anu moiko mongkona onae, ka uto'orio, nine ponsakosiimami mentee.

Pokotompaano 13-15

¹³ Hadio rupa anu asalakono kuburiakomu, sine nahi kubehe moburiakomu mompake tinta ka pena.

¹⁴ Momperorohi aku ronga tepohaweakomu ka mepau tepo'aro rupa.

¹⁵ Rodoa kumongkomiko! Tabea inso a luwuno sambe'emu. Pohaweomo tabeaku a luwuno sambe'e nte'o'asa mia.