2 YOHANE 1 - Wunta Mempori

Tabea 1-3

¹ Inso a mpenatua hawe ndi ondae Ine anu tebiniki ka luwuno anado anu mentee ntu'u kupehohawa ira. Komba butu ongkue anu mehohawa komiu, sine luwuno mbo'u mia anu mento'oriomo menteea,

² hangano menteea anu mo'ia mpiha i laroto ka anu ta kumongkomi kita ranta nahina tampulaano.

³ Pe'aroa, pompowee ka rodoa inso ndi Ondae Ue Ala Ama, ka inso ndi Ondae i Yesu Kerisituu, Ana-Do i Ama, Ira kumongkomi kita a laro menteea ka pompehohawa.

Imekongkomo mpiha a laro pompaguru-Do i Kerisituu 4-11

⁴ Mawongko ntu'u aroaku, nde kuhaweo, nine tia oruano inso a luwuno anamiu mentuwu ira a laro menteea menunu saru parenta anu tomentarimaomo inso ndi Ondae i Ama.

⁵ Ka kanandio-andio ku'emao ndi omiu, Ine – komba kupoburiakomiu kana parenta wo'ohu, sine montonda parenta anu hinaomo ndi ontae inso pompu'uano – ka tomemambe pehohawa.

⁶ Ka ndiomo pompehohawa atuu, onaemo nine asalakono ka tomentuwu montonda parenta-Do. Ka ndiomo parenta atuu, onaemo nine asalakono ka imentuwu a laro pompehohawa, kana imerongeomo inso a pompu'uano.

⁷ Hangano mpesabaako iramo hadio mia anu mompopo'oo, ka melako i asa wawontolino, anu nahi domemangaku, nine Ondae i Yesu Kerisituu hawe Iramo kana mia. Ondaemo atuu anu mpompopo'oo ka umewai Ira i Kerisituu.

⁸ Impetangkoromo, ka si tetadi inso ndi omiu hapa anu kime'anggaomo atuu, sine ka imehaweo koa luwu tambomiu.

⁹ Sompo mia anu nahi po'ia a laro pompaguru-Do i Kerisituu, sine anu meluarako inso i tu'ai, nahi pe'umbu Ira Ue Ala. Ba isema mo'ia a laro pompaguru atuu, ipe'umbu Ira Ondae i Ama maupo Ondae i Ana.

¹⁰ Tewala asa mia hawe ndi omiu ka nahi wawao pompaguru andio, si mentarimao i laro rahamiu ka si mpetabeio.

¹¹ Hangano ba isema metabeio, onae mohawe tia a mpoweweuno anu mosa'o.

Pokotompaano 12-13

¹² Maupo hadio anu asalakono kuburiakomiu, nahi kubehe mohaweakono wunta ka tinta, sine momperorohi ongkue isa'a hawe ndi omiu ka mepau tepo'aro saru omiu, ka isompo ntu'u mawongkono aroato.

¹³ Tabea ndi omiu inso a luwuno anado pepaekompomiu anu tebiniki.