2 TIMOTIU 4 - Wunta Mempori

Ihiiomo pepoboi pompekakaakomu 4:1-8

¹ I aro-Do Ue Ala ka i Kerisituu Yesu anu Ira mobitara mia mentuwu ka anu memate, ku'oliwiko ntu'u hangano pepokomengkaa-Do ka hangano poparentaa-Do:

² Paleleomo pau-Do i Ue, pepatindamo moiko ke nahi moiko tempono, pokomengkaaomo hapa anu sala, kuahakono ka patuduomo a luwuno maurua ka pompaguru.

³ Hangano ta hawe tempono, mia nahi pokontarimao mbo'u pompaguru mentee, sine ira mpopumpu guru montonda po'ehedo mpotendeo ineheno birido.

⁴ Ira mempiio birido inso a menteea ka me'ungkahiakono tutu-tutulu.

⁵ Sine pabawaiomo koroimu a luwuakoano, sabaramo marasai, weweuomo anggaa mompelele Lele Mawongkoa ka anggaomo anggaa pompekakaakomu!

⁶ Mongkona ongkue, reaku mompu'uomo inuwu gagi pesomba ka tempo mateaku umpedaomo.

⁷ Kutompaakonomo petandia anu moiko, hawe akumo a garesi pokotompa ka kupekakaakonomo pompe'ala-ala.

⁸ Kanandio-andio pinatindaako akumo ramba-ramba ulu menteea anu Ira weeakune i Ue, Puu mpobitara anu moleo, a oleo-Do; sine komba butu ndi ongkue, tendeano a luwuno mbo'u mia anu kumekewoio hawea-Do.

Pe'oliwi pokotompa 4:9-18

⁹ Pompete'umalamo ka uronga aiwa ndi ongkue,

¹⁰ hangano ikekewoiomo i Demasi wawontolino andio ka ibinta aku. Onae melungkaomo lumako i Tesalonika. I Kerekesi lumakoomo i Galatia ka i Titu lumako i Dalamatia.

¹¹ Butu i Lukasi anu mo'ia saru ongkue. Lakomo alao i Marakusu ka wawaomo ramai, hangano pompekakaakono kukereo.

¹² I Tikiku kutenaomo ka ilako i Epesu.

¹³ Tewala aiwako ramai wawao mbo'u lemba meloe anu binintaku i Tiroasi a rahano i Karipusu ka luwuno mbo'u wuntaku, tamoako kuli mpinotuwu poburia atuu.

¹⁴ I Alesanderi, puu mpolabu mala atuu, hadioomo ipoweweu mosa'o ndi ongkue. Ondae i Ue Ira mombaloakune montonda wineweuno.

¹⁵ Omue mbo'u asalakono tangkoroo koa, hangano tedoa i'ewaio pompaguruto.

¹⁶ I tempono amba-ambano kusangki a ngkara-karaku nahina maupo te'asa mia anu mokowali aku, luwuno mebinta aku – po'ineeomo mongkona atuu si domempinopotembiako –,

¹⁷ sine mentade Iramo i Ue i horiku ka mokoroso aku, ka ipinalele koa ntu'u Lele Mawongkoa telalo ndi ongkue ka domerongeo luwuno mia anu komba to Yahudi. Hangano kanandio ka kutola inso a ngangano singa.

¹⁸ Ka Ondae i Ue Ira motola aku inso a sompo tinoo anu mosa'o. Ira kumadudui aku, ranta ka kupewinso a laro Poparentaa-Do i suruga. Tia-Domo marambaa ranta nahina tampulaano! Ami.

Tabea 4:19-22

¹⁹ Tabea ndi Perisika ka ndi Akawila ka a nsomborino i Onesiporu.

²⁰ I Erasitu mo'ia i Korinti ka i Tiropimu kubintao mahaki i Miletu.

²¹ Pompete'umalamo aiwa ramai se'eluno napi tempo morini. Tabea inso ndi Ebulu ka i Pudesi ka i Linusu ka i Kelaudia ka inso a luwuno pepaekompo.

²² Ondae i Ue kumongkomio penaamu, Pe'aroa-Do kumongkomiko!