2 TIMOTIU 3 - Wunta Mempori

Teweweuno mia a oleo pokotompa 3:1-9

¹ To'oriomo nine a luwuno oleo pokotompa ta hawe tempo anu masukara.

² Mia ta kumekewoio koroino onaeno ka gagi atano doi. Ira mengkopau-pau anu nahi mentee ka mpompelangka-langkai, ira megagi puu pomposebe, ira me'ewa a mia mota'u ka nahi domponto'ori mpontarimakasi, nahi domperioo agama,

³ nahi domponto'ori mpompehohawa, nahi domebehe mpesintuwu, inehedo popau mosa'o ira mia, nahi sabara, marantekuda, nahi domebehe anu moiko,

⁴ inehedo mpohapu pedandia, nahi dompompewowolo ondau, mpompeto'o-to'ori, laluaopo domentondao po'eheno aroado sekonopo tumonda Ira Ue Ala.

⁵ Montonda koroi domeweweuo pesombado, sine a menteeano domehapuo rosono. Olaiako iramo atuu!

⁶ Hangano i olodo hinao mia anu menongkoako lumako a rahado mia susua ka dompokobenge-benge ira beine anu molema anu bukeako hala ka ipabawai ira mperupa-rupa po'eheno aroa,

⁷ anu maupo inehedo wela mempinaguru, sine nahi dohori mento'orio menteea.

⁸ Mengkena kana i Yanesi ka i Yamberesi umewaio i Musa, kanandio koa mbo'u dome'ewaio menteea. Pinewowolodo mosa'o ka pompe'ala-alado nahi moroso.

⁹ Sine manasaomo nahi ira ntedada lahi, hangano kana mongkona i Yanesi ka i Yamberesi, benge-bengedo mbo'u ta mengkaa a luwuno mia.

Pompe'ala-ala tuwu a laro pobobarasaia ka a laro pobasaa Wunta Mempori 3:10-17

¹⁰ Sine omue utondaomo pompaguruku, sala ntumuwuku, pohaweno aroaku, pompe'ala-alaku, sabaraku, pompehohawaku ka modatoaku.

¹¹ Omue metondaakomo marasaiako pobobarasaia ka masukaraa kana anu kupemarasaio i Antiokia ka i Ikoniu ka i Lisitera. Luwuno pobobarasaia atuu kupemarasaio ka Dopotola akumo i Ue inso ndi onae.

¹² Lano sompo mia anu ineheno tuwu mesomba ndi Ondae i Kerisituu Yesu ta marasaiako pobobarasai,

¹³ sekono mia mosa'o ka anu mompopo'oo ta tetiangi mosa'o, ondae pompopo'oo ka pinopo'oo,

¹⁴ Sine po'ineeomo ka upe'ini mpiha a menteea anu utarimaomo ka upe'ala-alao, saru wela rumambeo mia anu paguruakomu.

¹⁵ Pewowolo koa mbo'u nine inso kodei uto'oriomo Wunta Mempori anu mokompoweeakomu ponto'ori mentee katumaateko a ntekaduduia hangano pompe'ala-ala ndi Ondae i Kerisituu Yesu.

¹⁶ Luwuno binuri anu inso a Mpenaa-Do Ue Ala lano mentudu a pompaguru, mokomengkaao saala, mokomoikoo pelelu ka paguruo mia a menteea.

¹⁷ Hangano kanandio sompo-sompo mia-Do Ue Ala pinatinda tiano sompo poweweu moiko.