2 TIMOTIU 2 - Wunta Mempori

Pepoboi metonda marasai 2:1-13

¹ Onaemo pu'uno, hei anaku, gagimo moroso hangano pe'aroa ndi Ondae i Kerisituu Yesu.

² Hapa anu urongeomo inso ndi ongkue i arodo hadio sakosii, pe'ala-alaakonomo atuu a mia anu tekona domempine'ala-ala, anu mempande koa mbo'u mpompaguru mia susua.

³ Petondamo marasai kana aasa sorodadu anu moiko inso ndi Ondae i Kerisituu Yesu.

⁴ Aasa sorodadu anu kontongaano metea nahi mokoliliakono koroino mongkona pepotuwuno, hangano kanandio ka ipemoikoo tadulakono.

⁵ Asa mia megolo butu mokompohawe ramba-ramba ulu gagi tondonino poponangi, tewala onae metandi tumondao luwuno atora megolo.

⁶ Asa mia puu mpelere anu mokua ntu'u asalakono anu merapio amba-ambano hasilino inanggano.

⁷ Pekokoongakonomo hapa anu pinauku; Ondae i Ue Ira moweeko ponto'ori a luwuakoano.

⁸ Pewowoloomo andio: Ondae i Yesu Kerisituu, anu mewangu Iramo inso i olodo mia mate, anu pine'anaako Iramo gagi inuleno i Daudi, onaemo Lele Mawongkoa anu pinaleleku.

⁹ Hangano pompalelea Lele Mawongkoa andio ka kumarasai, tendeano pinongu mengkena mia mosa'o, sine pau-Do Ue Ala pinalele mpiha.

¹⁰ Onaemo pu'uno kupedatoo tumembio luwuno atuu tiado mia bininiki-Do Ue Ala, ka dompohawe koa mbo'u tekaduduia ndi Ondae i Kerisituu Yesu saru marambaa anu nahina tampulaano.

¹¹ Menteeomo pau andio, ”Tewala memate kita saru Ondae, kita koa mbo'u mentuwu saru Ondae;

¹² tewala mpompesu'ui kita, kita koa mbo'u mpetonda mpomparenta saru Ondae; tewala tomehapu Ira, Ira koa mbo'u humapu kita;

¹³ tewala nahi tompetenunu, Ondae pine'ala-ala mpiha, hangano nahi Dopokohapuo koroi-Do.”

Patudu a mpo'aropi puu pompaguru anu mompopo'oo 2:14-26

¹⁴ Pewowoloomo ka pesu'uiomo pauo luwuno atuu ndi ondae i aro-Do Ue Ala, ka si domempande mpau, hangano mongkona atuu nahina ntu'u tuduno, tendeano mokobulalingo ira mia merongeo.

¹⁵ Ungkeakonomo ka ipototomu i aro-Do Ue Ala kana asa mia puu mpo'angga anu siimo imokoko'ii, pauo manasa paleleo pau menteea atuu.

¹⁶ Sine olaiakonomo pau anu nahina tuduno ka anu nahi mempori anu butu montiangi gau mosa'o.

¹⁷ Paudo lumele kana haki kangkere. I olodo tewinso i Himeneu ka i Piletu,

¹⁸ anu pansiaomo inso a menteea saru mompaguru nine pewanguto kontongaanomo ka hangano kanandio sumolangio pompe'ala-alado asa ntia mia.

¹⁹ Sine empehino anu ninaa-Do Ue Ala atuu moroso ka tondonino onaemo, ”Ondae i Ue tumo'orio isema mia-Do” ka ”Sompo mia anu pauo nee-Do i Ue asalakono ka ibintao mosa'oa.”

²⁰ A laro raha anu langkai komba butu hinao parewa inso a wulaa ka salaka, tendeano inso mbo'u a ngkeu ka wita; anu amba-ambano pinake a ntinoo anu maramba ka anu poko'ariano a ntinoo anu komba maramba lahi.

²¹ Tewala asa mia mokomemporio koroino inso a luwuno anu mosa'o, onae ta gagi parewano raha a ntinoo anu maramba, onae pinokomempori, ipetekonao ueno pakeo ka pinatinda tiano sompo anggaa anu maramba.

²² Onaemo pu'uno olaiakono po'eheno aroado mia mongura, ungkeomo moleoa, petenunua, pompehohawa ka sintuwu meronga saru ondae anu mpebooli ndi Ondae i Ue a aroa anu morina.

²³ Polaiakono luwuno anu inungke-ungkeako, anu benge-benge ka nahi tekona. Uto'orio nine luwuno atuu mompokohina pengengea,

²⁴ sekono asa mia tetenaa-Do i Ue nahi moiko ipengenge, sine asalakono me'aroa a luwuno mia. Onae asalakono pande mompaguru, sabara

²⁵ ka saru mepau molusa-lusa mokotaate ira mia anu inehedo me'ewa, hangano bara'ura Dopoweeako ira i Ue tempo ka dontepidi ka wawa ira ranta ka domento'orio menteea,

²⁶ ka ba kanandio gagi ira wali ntelike aroado, hangano mentola inso a ohono i Mosa'o anu umonggo ira a mpo'eheno.