2 TIMOTIU 1 - Wunta Mempori

Tabea 1:1-2

¹ Inso ndi Paulu, tetenaa-Do i Kerisituu Yesu hangano po'ehe-Do Ue Ala ka kupaleleo dandi mongkona tuwua ndi Ondae i Kerisituu Yesu,

² hawe ndi Timotiu, anaku anu pinehohawaku: pe'aroa, ronso ka rodoa inso ndi Ondae Ue Ala Ama ka Ondae i Kerisituu Yesu, Ueto, kumongkomi komiu.

Pontarimakasi ka patudu ka mompedato 1:3-18

³ Montarimakasi aku ndi Ondae Ue Ala, anu kupekakaako Ira a ponto'orino aroa anu molino kana anu wineweudo uempu'uku. Ka kuwela mewowoloko a laro mpekakaiku, moiko meene maupo wongi.

⁴ Ka tewala terorambe aku a uwoi matamu anu linuarakomu, ineheku wali kumitako ka ibukemo po'undeku.

⁵ Hangano kupasi mpewowoloo pompe'ala-alamu anu komba mo'onde-onde, onaemo pompe'ala-ala anu amba-ambano tuwu i larodo uemu beine i Loisi ka ndi inemu i Eunike ka anu kupe'ala-alao tuwu koa mbo'u i laro ngkoroimu.

⁶ Onaemo pu'uno kupopoto'oriakomu ka upolangao pompowee-Do Ue Ala anu kongko ndi omue hangano kudampoakomu kaeku.

⁷ Hangano penaa anu Doweeakita Ue Ala komba penaa doitoa, tendeano penaa anu mowangu roso, pompehohawa ka te'atora.

⁸ Gaagi si mo'o'anu mesakosii mongkona Ondae Ueto ka si mo'o'anu hangano ongkue, asa mia hinuku hangano Ondae, tendeano petondamo marasaiakono Lele Mawongkoa-Do hangano roso-Do Ue Ala.

⁹ Ondae anu kumadudui kita ka moboiakita pepoboi mempori, komba me'empehiako wineweuto, tendeano me'empehiako tinoo ka pe'aroa-Do Ondae-Do, anu mewineeako kitamo ndi Ondae i Kerisituu Yesu se'eluno pompu'uano tempo

¹⁰ ka anu kanandio-andio pinokomengkaa a hawe-Do Puu pongkaduduito Ondae i Yesu Kerisituu, anu hangano Lele Mawongkoa pinuduomo pabawano matea ka mowawa tuwua anu nahi ta mate.

¹¹ Tianomo Lele Mawongkoa andio ka kupinakosimo gagi puu pompalele, gagi tetenaa ka gagi guru.

¹² Onaemo pu'uno ka kupemarasaio luwuno andio, sine nahi mokoko'iiku; hangano kuto'orio ndi sema kupompe'ala-ala ka kupe'ala-alao nine Ondae pabawa mekariao hapa anu Dope'ala-alaakunemo ranta a oleo-Do i Ue.

¹³ Iniomo luwuakoano anu urongeomo inso ndi ongkue gagi pandiri pompaguru anu mentee ka weweuomo atuu a pompe'ala-ala ka pompehohawa ndi Ondae i Kerisituu Yesu.

¹⁴ Pekariaomo arataa anu tekosi, anu Dope'ala-alaakitamo, hangano Penaa Mempori anu mo'ia i laroto.

¹⁵ Uto'orio nine luwudo anu i Asia Kodei mpewolili inso ndi ongkue; tewinso i Pigelusi ka i Heremogene.

¹⁶ Po'ineeomo Ondae i Ue ka Dopopokitao pe'aroa-Do a nsomborino i Onesiporu anu mararuomo ipokomawongkoo aroaku. Nahi mokoko'iino tepohaweakune a laro torungku.

¹⁷ Tempono i Roma, i'ungke aku ranta ka itepohaweakune.

¹⁸ Po'ineeomo Ondae i Ue ka Dopopokitaakono pompehohawa-Do a oleo-Do. Hadio ntu'u pompekakaakono i Epesu omue lalu tumo'orio sekono ongkue.