2 TESALONIKA 3 - Wunta Mempori

Mekakai ka mo'angga 3:1-15

¹ Ka i'amba, pepaekompo luwu-luwu, impekakaiakami, ka ikotele-teleleno koa pau-Do i Ue ka pinokomaramba, mengkena kana anu gagiomo i olomiu,

² ka kintepotola inso a luwuno anu mporisui ka mia memosa'o gaudo, hangano komba luwuno mia mohawe pompe'ala-ala.

³ Sine Ondae i Ue pine'ala-ala Ira. Ira mokorosoo aroamiu ka mekaria komiu inso a wineweu anu mosa'o.

⁴ Ka kimpe'ala-alao ndi Ondae i Ue, nine hapa anu kime'oliwiakomiu, imeweweuo ka komiu meweweuo.

⁵ Po'ineeomo ka Dopo'aroo mpiha i Ue aroamiu a pompehohawa-Do Ue Ala ka a pompedato-Do i Kerisituu.

⁶ Sine kime'oliwi komiu, pepaekompo luwu-luwu, a nee-Do Ue Yesu Kerisituu, ka ime'olaiakono sompo pepaekompo anu nahi weweuo anggaano ka anu nahi tondao pompaguru anu imentarimaomo inso ndi omami.

⁷ Hangano omiu isa'a mento'orio, ba kana'umpe asalakono imentondao pandirimami, hangano komba ntekolupe kami mpo'angga i olomiu,

⁸ ka komba kimengkaano mpena rotido mia, sine mpeteahako kami ka mpe'isei meene wongi, ka si hina maupo isema anu pinokonsusamami i olomiu.

⁹ Komba hangano nahi tekona kimeweweuo atuu, tendeano hangano inehemami ka kimegagi pandiri, ka imentondao.

¹⁰ Hangano, tempono mbo'u kimekongko i olomiu, kime'oliwiakomiu andio: tewala asa mia nahi behe mo'angga, siimo ipongkaa.

¹¹ Kimempauo andio hangano kimerongeo, nine hinao mia anu nahi te'atora tuwuno ka nahi po'angga, tendeano osupoako anu nahina tuduno.

¹² Mia anu kanandiodo kimempauakono ntu'u ka patuduo ndi Ondae Ue Yesu Kerisituu, ka domerodo koa mpiha me'anggao anggaado ka ba kanandio domengkaano kaangado ondaedo.

¹³ Ka omiu, pepaekompo luwu-luwu, si mente'osa mpoweweu hapa anu moiko.

¹⁴ Tewala hinao mia anu nahi behe merorongeakono hapa anu pinaumami a wunta andio, impetondonio, ka si mpewali-waliakono, ka igagi mokoko'ii,

¹⁵ sine si mentuduo kana iwali, sine imengkuahakono kana aasa pepaekompo.

Tabea 3:16-18

¹⁶ Ka Ondae, Ueno rodoa, po'ineeomo ka Dopoweeakomiu mpiha rodoa-Do, a luwuakoano. Ondae i Ue kumongkomi komiu luwu.

¹⁷ Tabea inso ndi ongkue, i Paulu. Tabea andio kuburiakono kaeku. Ndiomo tondonino a sompo wuntaku: kanandiomo binuriku.

¹⁸ Pe'aroa-Do i Yesu Kerisituu, Ueto, kumongkomi komiu luwu!