2 Tawarika 9 - Wunta Mempori

Pesingge rahano mokole beine i wita Seba

¹ Mansano rumongeo mokole beine i wita Seba teleleno i Salomo, onae aiwa i Yerusale mingki umarahakono i Salomo moweeakono pesikeno anu memotungko. Onae domentondao sorodadu anu tedoa hadio ka luwuno unta anu mpowawa rampa-rampa, hadio wulaa ka watu paramata anu masuli olino. Mansano hawe ndi Salomo, ipauakono luwuno anu kongko i laro aroano.

² I Salomo sumangkio luwu pesikenono. Ndi Salomo nahina anu tewuni, anu nahi pokopauakono mokole beine atuu.

³ Mansano kumitao mokole beine i wita Seba pandeno mompewowolo i Salomo ka raha anu umariomo iwanguo,

⁴ kaanga a medano, po'atora po'iangado pegawaino, pompekakaakodo atano ka sangkado, luwuno puu mpopatinda inua ka sangkado, saru pesomba tinunu anu wela pinesombaakono i raha-Do i Ue, kohali-haliomo.

⁵ Motae ndi mokole, ”Menteeomo lele anu rinongeku i witaku mongkona omiu ka ponto'orimiu,

⁶ sine nahi kupe'ala-alao pinaudo ranta ka ku'aiwa ka kumitaakono mataku. Entongano inso a langkaino ponto'orimiu atuu kupinauako. Kahinaano ponto'orimiu laluaopo sekono anu rinongeku.

⁷ Meme'ura iramo miamiu ka meme'ura iramo pegawaimiu anu wela mpekakaakomiu ka mengkitao ponto'orimiu!

⁸ Unde Iramo i Ue, anu memoiko komiu ranta Dopotoro komiu a wawo ngkadera poparentaa-Do gagi mokole a nee-Do i Ue, Ue Alamiu. Hangano Ondae Ue Alamiu mehohawa ira to Isaraeli, onaemo ka Dopakosi ira ranta nahina tampulaano, ka mokogagi komiu mokoledo kai poweweu moleoa ka menteea.”

⁹ Ka i'amba moweeakono mokole asa etu ka rua pulu talenta wulaa, rampa-rampa anu tedoa hadio, ka paramata anu masuli olino. Nami hori hina mbo'u rampa-rampa kana anu iweeakono mokole beine i wita Seba ndi mokole Salomo.

¹⁰ Luwuno mbo'u pegawaino i Hurami ka pegawaino i Salomo anu mpowawa wulaa inso i Opiri, mpowawa mbo'u keu cendana ka watu paramata anu masuli olino.

¹¹ Inso a ngkeu cendana atuu i mokole weweuo luwuno ensa a raha-Do i Ue ka langkanaeno mokole, saru mbo'u katapi ka gambusu tiado puu mpenani. Anu kanatuu nahi hori tengkita se'eluno i wita Yehuda.

¹² Mokole Salomo moweeakono mokole beine i wita Seba luwuno anu ineheno ka inemano, lumaloio anu winawano tiano mokole. Ka i'amba melungka mekule i witano meronga luwuno pegawaino.

Pompolino i Salomo meluka hadio

¹³ Mobeano wulaa anu winawa ndi Salomo i larono asa nta'u, onaemo nomo etu ka nomo pulu ka onoo talenta,

¹⁴ napi tedoa anu winawado luwuno anu mpo'asa-asa ka mia mpebalu-balu. Luwuno mokoledo to Ara ka luwuno anu pabawa i wita atuu mbo'u mpowawa wulaa ka salaka ndi Salomo.

¹⁵ Mokole Salomo moweweu rua etu kanta langkai inso a wulaa pinalu. Nomo etu sikala wulaa pinalu pinakeno weweua sompo kanta langkai atuu.

¹⁶ Iweweuo mbo'u tolu etu kanta kodei inso a wulaa pinalu; tolu etu sikala wulaa pinakeno weweua sompo kanta kodei. Ka i'amba mokole numaao luwuno atuu i laro raha langkai ”Tobu Libano”.

¹⁷ Mokole weweuo mbo'u kadera poparentaa anu langkai inso a tindu ka inapiiako wulaa mpena.

¹⁸ Kadera poparentaa atuu hinao onoo ana ensano. Pentoroano karuno anu wineweu inso a wulaa pinotako a ngkadera poparentaa atuu. A orua apano pentoroa, hinao hondaano kae ka orua singa mentade i horino hondaano kae atuu.

¹⁹ Hopulu ka orua singa mentade i wawono onoo ana ensa atuu mompombali. Napi hori wineweu anu kanatuu a poparentaa isuamo koa.

²⁰ I Salomo weweuo inso a wulaa ka luwuno parewano raha langkai ”Tobu Libano” atuu inso a wulaa mpena. Salaka rineke nahina olino tempono i Salomo.

²¹ Hangano mokole hinao kapalano anu sumomba i Tarasisi meronga luwuno pegawaino i Hurami. Otolu nta'u pohona luwuno kapala Tarasisi aiwa mpowawa wulaa, salaka, ka tinduno gaja, saru bange ka manu-manu merak.

²² Mokole Salomo lumaloio luwuno mokole i tolino mongkona pompolia ka ponto'ori.

²³ Luwuno mokole i tolino mpotoo mpe'aro ndi Salomo ira mensakosiio ondaedo ponto'orino anu Doweeakonomo Ue Ala i laro aroano.

²⁴ Ondae me'aiwa singge mowawa pesombano, onaemo luwuno sangka salaka ka wulaa, sangka, parewa mpetea, rampa-rampa, ngara, ka bagali; kanandiomo teweweuno ta'u me'eu ta'u.

²⁵ I Salomo hinao pato nsowu wala mpinotuwu po'iangano ngara ka luwuno kareta, saru hopulu ka orua nsowu sorodadu mpengara anu inaa ira a luwuno kota ponaapa kareta ka umpeda mokole i Yerusale.

²⁶ Onae moparenta a luwuno mokole mompu'u inso a ngkoro Eparata hawe a witado to Pelisiti ranta hawe a ntida wita Masiri.

²⁷ Mokole weweuo salaka i Yerusale ituduo kana watu, ka pu'uno keu arasi kana hadiono pu'uno ara anu tuwu i wita Sepela.

²⁸ Ngarano i Salomo winawa inso i Misiraimi ka inso a luwuno wita.

Mateano i Salomo

²⁹ Anu susuano inso a nteweweuno i Salomo inso a pompu'uano hawe pokotampulaano, kombake luwuno atuu teburi a laro wunta teweweuno i nabi Nata, ka a laro pe'oliwi-Do i Ue ndi Ahia, to Silo atuu, ka a laro luwuno pongkitano i Ido, puu mpongkita atuu, mongkona i Yerobea anano i Nebati?

³⁰ I Salomo moparenta i Yerusale a luwuno Isaraeli i larono pato pulu nta'u.

³¹ Ka i'amba i Salomo mohawe penaa-naaano meronga uempu'uno ka kinaburu i kota Daudi, amano. Ka i'amba i Rehabea, anano, gagi mokole umeuo.