2 Tawarika 7 - Wunta Mempori

Ondae i Ue mokomengkaao maramba-Do

¹ Mansano mokotampulao i Salomo pekakaino, metiiomo api inso i langi kumaano pingko pesomba tinunu ka luwuno pesomba sinumbele atuu, ka maramba-Do i Ue buketio raha atuu.

² Luwuno sando mpesomba nahi dompokompewinsokio raha-Do i Ue, hangano maramba-Do i Ue buketio raha-Do.

³ Mansado mengkitao luwuno to Isaraeli api atuu metii ka maramba-Do i Ue buketio raha atuu, mpenggolontu iramo a horo saru rupado a wita, ka do'amba mpetuundu mpesomba ka mpenaniako po'unde-unde tia-Do i Ue, ”Hangano Ondae moiko! Menteeano nahina tampulaano petenunu ka pompehogawa-Do.”

Poronsoa raha-Do Ue Ala

⁴ Ka i'amba mokole saru luwuno tongku mpopesombaako pesomba sinumbele i aro-Do i Ue.

⁵ Gagi pesomba sinumbele, mokole Salomo mompesombaako rua pulu ka orua nsowu sapi ka asa etu ka rua pulu nsowu inso a asa bawaa bembe bimba. Kanandiomo raha-Do Ue Ala doronsoo mokole ka luwuno tongku.

⁶ Luwuno sando mpesomba ntetinda iramo mpentade a mpo'iangado. Kanatuu koa mbo'u luwuno to Lewi saru luwuno parewa mpenani, parewa mpenani anu wineweuno i mokole Daudi umunde-unde Ira i Ue, ”Menteeano ranta nahina tampulaano petenunu ka pompehohawa-Do!” tempono i Daudi menaniako po'unde-unde molalo ondae. Ka i'amba ntepo'aro saru ondae, luwuno sando mpesomba mpopuuri napiri ka luwuno to Isaraeli mpentade.

⁷ Ka i'amba i Salomo mokomemporio tongano kintala i arono raha-Do i Ue, hangano i tu'aimo ipompesombaako pesomba tinunu ka tabano pesomba tekaduduia, hangano meda pontunua pesomba mala anu wineweuno i Salomo nahi te'ula pesomba tinunu, pesomba kaanga ka luwuno tabano pesomba.

⁸ I tempo atuu i Salomo moweweu porame-ramea Laika Lewe Ngkeu i larono opitu oleo, saru luwuno to Isaraeli, asa bawaa anu langkai ntu'u, inso a nsala mewinso lumako i Hamati hawe a ngkoro Masiri.

⁹ Ia oleo anu ko'oalu mpoweweu ira tepumpua langkai, hangano domporame-rameakonomo poronsoa meda pontunua pesomba i larono opitu oleo ka porame-ramea Laika Lewe Ngkeu i larono opitu oleo.

¹⁰ Ia oleo anu korua pulu ka otolu, wula ko'opitu, itena ira tongku atuu mpekule a luwuno kemado ka dompo'unde ka mawongko, hangano moikoa anu wineweu-Do i Ue ndi Daudi, ndi Salomo ka a nto Isaraeli, bawaa-Do.

Ondae i Ue mepopokita ndi Salomo anu kompenduano

¹¹ I Salomo moko'umario raha-Do i Ue ka langkanaeno mokole. Ipokoweweuo a laro raha-Do i Ue ka a laro langkanaeno luwuakoano anu me'umbaako i laro aroano.

¹² Umarino atuu Ondae i Ue mepopokita ndi Salomo ia wongi ka mepau ndi onae, ”Kurongeomo pekakaimu ka Kubinikiomo po'ianga andio tia-Ku gagi raha pesombaa.

¹³ Tewala Kubonsoo langi, ranta nahina usa; ka tewala Kutenao kosume kumaano kai pingko hasilino wita, ka tewala Ku'oliwio haki lele i olono bawaa-Ku,

¹⁴ ka bawaa-Ku anu ndi onae pinau nee-Ku, ka ipe'urumako, mekakai ka aiwa ndi Ongkue ka itepidi inso a luwuno halano anu mosa'o, manasa Aku rumongeo inso i suruga ka umampunio halado, saru momuleo witado.

¹⁵ Kanandio-andio mata-Ku tewile ka biri-Ku rumongeo pekakai inso a mpo'ianga andio.

¹⁶ Kanandio-andio Kubinikiomo ka mokomemporio raha andio, ka ipo'ia nee-Ku i ra'ai ranta nahina tampulaano. Mata-Ku ka aroa-Ku ta kongko i tu'ai ranta ntinuwu.

¹⁷ Kanatuumo tewala omue tuwu i aro-Ku mengkena kana i Daudi, amamu, ka moweweu menunu saru luwuno anu Kuparentaakomu, saru mekariao luwuno pompakosi ka atora-Ku,

¹⁸ manasa Aku mokorosoo kadera poparentaamu menunu saru pedandia anu Kuwutuomo saru i Daudi, amamu, saru mepau: Nahi ta te'otu inulemu anu moparenta a nto Isaraeli.

¹⁹ Sine, tewala mpe'ewa komiu ka bintao luwuno pompakosi ka parenta-Ku anu umariomo Kuweeakomiu ka lumako mpesomba a mpinesombai susua saru mpenggolontu mesomba ndi onae,

²⁰ manasa Aku buta komiu inso i wita-Ku anu umariomo Kuweeakomiu, ka raha andio anu Kupokomemporiomo tiano nee-Ku, Aku tumadio inso i aromiu ka Aku mokogagio potundaa ka pasinggiri i olodo luwuno tongku.

²¹ Sompo mia anu telalo a raha anu gagiomo howuno awu andio, ta kohali-hali ka mpotae: Tembio ka Dopoweweuo i Ue kanandio a wita ka a raha andio?

²² Ka i'amba ira mpotae mia: Hangano domebinta ira i Ue, Ue Alano uempu'udo anu wawa ira mpeluarako inso i wita Masiri, ka hangano mpe'ini ira a mpinesombai susua, mpenggolontu mpelangkaio saru mpesomba ndi onae. Onaemo pu'uno ka Dopotiio luwuno masolaa andio ndi ondae.”