2 Tawarika 6 - Wunta Mempori

¹ Ka i'amba motae i Salomo, ”Dopauomo i Ue nine Ira mo'ia a laro nseru anu wongi-wongi.

² Kupowangua-Komiumo raha anu maramba, po'ianga-Miu mpiha ranta nahina tampulaano.”

Ondae i Ue umihiio dandi-Do ndi Daudi.

³ Ka i'amba mokole mewolili te'aro a luwuno bawaa Isaraeli ka rumonso ira kontongaano luwuno bawaa Isaraeli atuu mpentade.

⁴ Ipotae, ”Unde-unde Iramo i Ue, Ue Alano i Isaraeli, anu Doweweuakonomo kae-Do pau anu Dopohaweakono nganga-Do ndi Daudi, amaku, kanandio:

⁵ ’Tampu'uno Kuwawa ira bawaa-Ku Isaraeli mpeluarako inso i Masiri, nahi Kupobiniki kota hapamo koa inso i olono luwuno suku Isaraeli anu mowangu raha i ra'ai, sine Kubinikiomo i Daudi gagi pabawai ira bawaa-Ku Isaraeli.

⁶ Sine lembuino Kubinikio Yerusale gagi po'iangano nee-Ku ka binikio i Daudi ka ipabawai ira bawaa-Ku Isaraeli.

⁷ I Daudi, amaku, mo'asao aroado mowangu rahano nee-Do i Ue, Ue Alano i Isaraeli.’

⁸ Sine, mepau Ira i Ue ndi Daudi, amaku, ’Omue lano montoo mowangu rahano nee-Ku, ka upo'asao aroamu atuu moiko ntu'u.

⁹ Butumo koa nahi moiko uwanguo raha atuu, tendeano ana ngkoroimu anu ta pine'anaako, onaemo anu ta wanguo rahano atuu a nee-Ku.’

¹⁰ Do'ihiiomo i Ue dandi anu umariomo Dopauo. Ongkuemo umeuo i Daudi, amaku, ka mentoro i wawono kadera poparentaa i Isaraeli, kana anu pinau-Do i Ue, saru wanguo raha andio a nee-Do i Ue, Ue Alado to Isaraeli.

¹¹ I ra'ai kunaaomo Burua anu me'ihi pedandia anu Dowutuomo i Ue saru to Isaraeli.”

Pekakaino i Salomo

¹² Ka i'amba mentadeomo i Salomo i arono meda pontunua pesomba ndi Ondae i Ue i arodo luwuno bawaa Isaraeli ka itaangakono kaeno.

¹³ Tempo atuu i Salomo moweweuomo asa mimbara mala anu ondauno olima hiku ka mantandeno otolu hiku, anu inaao a kintala. Onae mentade i wawono ka i'amba menggolontu i arodo luwuno bawaa Isaraeli ka itaangakono kaeno kontahane i langi,

¹⁴ ka ipotae, ”Oo Ue, Ue Alano i Isaraeli! Nahina Ue Ala kana Omiu, moiko i langi maupo i tolino. Omiu anu mekariao pedandia ka petenunu mompehohawa a luwuno tetenaa-Miu anu tuwu tompaano aroano i aro-Miu.

¹⁵ Omiu anu uminio dandi-Miu ndi tetenaa-Miu i Daudi, amaku, ka anu weweuakonomo kae-Miu pau anu Ipauakono nganga-Miu, kana anu gagi a oleo andio.

¹⁶ Kanandio-andio, oo Ue Alano i Isaraeli, Ipekariaomo hapa anu dinandi-Miu ndi tetenaa-Miu i Daudi, amaku, ka Ipepau: Nahi ta otu i aro-Ku inulemu anu ta mentoro a wawo ngkadera poparentaa Isaraeli, tewala luwuno anamu mpekariao sala tumuwudo mentondao songka-Ku, mengkena kana utuwu i aro-Ku.

¹⁷ Kanandio-andio, oo Ue, Ue Alado to Isaraeli, po'ineeomo ka igagi mengkaa dandi anu umariomo Ipauo ndi tetenaa-Miu i Daudi.

¹⁸ Sine mentee ke Ondae Ue Ala Ira mo'ia saru mia i ntolino? Menteeano langi, tendeano maupo langi luwuno langi nahi Komiu te'ula, tamoako mbo'u raha anu winanguku andio.

¹⁹ Maupo kanatuu, Irongeomo pekakai ka po'emano tetenaa-Miu andio, oo Ue Alaku. Irongeomo pebooli ka pekakai anu winuatakono tetenaa-Miu i aro-Miu andio!

²⁰ Po'ineeomo kai tewile mata-Miu a raha andio, meene ka woongi, a mpo'ianga anu pinau-Miu ta gagi po'iangano nee-Miu, kai rongeo pekakai anu winuatakono tetenaa-Miu a mpo'ianga andio.

²¹ Irongeomo po'emano tetenaa-Miu ka bawaa-Miu Isaraeli ba dompekakai a mpo'ianga andio. Irongeomo inso a mpo'ianga-Miu, inso i suruga; Irongeomo ka I'ampunio.

²² Tewala asa mia tehala a mpe'asa miano, ka tinuntu mesumpaako totonaa, kai aiwa mesumpa i arono meda pontunua pesomba ndi omiu a raha andio,

²³ po'ineeomo ka Iperorongeakono i suruga, weweuo ka bitara ira tetenaa-Miu: mombalo wineweuno mia anu sala ka mopotembiakono ndi onae, ka mokomenteeo mia anu mentee saru moweeakono pombalo ndi onae menunu saru menteeno.

²⁴ Tewala bawaa-Miu Isaraeli ntenangi a iwalido, hangano ntehala ira ndi Omiu, ka do'amba mpepokule me'akuio nee-Miu, mpekakai ka mpo'ema ndi Omiu a raha andio,

²⁵ po'ineeomo Irongeo inso i suruga, umampunio halado bawaa-Miu Isaraeli, ka wawa ira mpekule i wita anu Iweeako iramo ka uempu'udo.

²⁶ Tewala tetutuwi langi ka nahina usa, hangano ntehala ira ndi Omiu, ka do'amba mpekakai a mpo'ianga andio, umakuio nee-Miu ka ntepidi inso a halado, hangano Ipokonsii iramo,

²⁷ po'ineeomo ka Iperorongeako ira mbo'u i suruga ka umampunio halado tetenaa-Miu, bawaa-Miu Isaraeli, hangano Omiumo anu montisoako ira sala anu moiko anu asalakono domentondao. Po'ineeomo ka Ipompotii usa a wita-Miu anu Iweeako iramo bawaa-Miu gagi tia pusaka-Do.

²⁸ Tewala hinao mokoninggoa i wita andio, tewala hinao haki lele, ponsolangi pinopaho ke hakino pinopaho, kosume ke kosume mokomongkaa, tewala iwali kumadu ira i asa kotado, tula hapamo koa ke haki anu hina.

²⁹ Ka i'amba asa mia ke luwuno bawaa-Miu Isaraeli, singge mia tumo'orio tulano ka marasaino onaeno, mowuatako pekakai ka po'emano ka tumaangakono kaeno a raha andio,

³⁰ po'ineeomo Iperorongeakono i suruga po'ianga-Miu mpiha. Po'ineeomo I'ampunio, Iweweuo ka sumuloo sompo mia menunu saru luwuno wineweuno, hangano Omiu tumo'orio aroano. Mentee ntu'u butu koa Omiu anu tumo'orio aroano luwuno anano mia,

³¹ ranta ka domedoitoako-Miu ka mentondao luwuno sala anu tiniso-Miu i larono domentuwu i wawono wita anu Iweeako iramo uempu'umami.

³² Tewala hinao mbo'u mia mehawe anu nahi tewinso bawaa-Miu Isaraeli, aiwa inso i wita olai hangano nee-Miu anu langkai, kae-Miu anu moroso ka tokia-Miu anu tetaangako, tewala aiwa mekakai i raha andio,

³³ po'ineeomo Irongeo i suruga, inso a mpo'ianga-Miu mpiha. Po'ineeomo Iweweuo menunu saru luwuno anu pinebooliakono mia hawe atuu ndi Omiu, ka luwuno tongku i tolino tumo'orio nee-Miu ka dumoitoa-Komiu mengkena kana bawaa-Miu Isaraeli. Gagi ira mento'orio nine raha anu umariomo kuwanguo andio pinakosi tiano nee-Miu.

³⁴ Tewala bawaa-Miu mpeluarako ira mpetea umewai ira luwuno iwalido, maupo ba isua Itena ira ka dompekakai ndi Omiu ka dompe'aro i kota anu Ibinikiomo andio ka a raha anu umariomo kuwanguo tiano nee-Miu,

³⁵ Po'ineeomo Irongeo i suruga pekakai ka po'emado ka moweeako ira moleoa.

³⁶ Tewala mpekakai ira ndi Omiu, hangano nahina mia anu nahi tehala ka Itekudaako ira ka Ipeweengako ira a iwali, ka do'amba mewinawa gagi mia tinawa i wita anu olai ke umpeda.

³⁷ Sine tewala dowali mento'orio halado i wita po'iangado mentinawa, ka dontepidi, saru mpo'ema pompehohawa ndi Omiu i wita po'iangado mentinawa, ka dompotae: Ntehala kamimo, mensala ka mpoweweu mosa'o,

³⁸ tewala mpepokule ira ndi Omiu saru tompaado aroano ka saru tompaano sumangado i witado mia anu wawa ira gagi mia mentinawa, ka tewala mpekakai ira ndi Omiu saru mpe'aro i witado anu Iweeako iramo uempu'udo, a ngkota anu umariomo Ibinikio ka a raha anu umariomo kuwanguo tiano nee-Miu,

³⁹ po'ineeomo Irongeo inso i suruga, inso a mpo'ianga-Miu mpiha, pekakai ka po'emado saru moweeako ira moleoa. Po'ineeomo I'ampuni ira bawaa-Miu anu ntehala iramo ndi Omiu.

⁴⁰ Kanandio-andio, oo Ue Alaku, po'ineeomo mata-Miu ka itewile ka biri-Miu rumongeo pekakai anu winuatako a mpo'ianga andio.

⁴¹ Kanandio-andio, Ipewinsomo oo Ue Ala, a mpenaa-naa-Miu, Omiu saru burua roso-Miu! Po'ineeomo oo Ue Ala, luwuno sando mpesomba-Miu mpesangkaako tekaduduia, ka luwuno mia pinehohawa-Miu memawongko hangano moiko-Miu.

⁴² Oo Ue Ala, Itarimaomo mia anu umariomo I'urapio, Ipewowoloomo luwuno petenunu ka pompehohawa-Miu ndi Daudi, tetenaa-Miu atuu.”