2 Tawarika 4 - Wunta Mempori

¹ Ka i'amba moweweu meda pontunua pesomba inso a mala rua pulu hiku ondauno, rua pulu hiku maluano ka hopulu hiku mantandeno.

² Ka i'amba weweuo ”Tahi”, bolusa tinawa anu bunggoli, hopulu hiku inso i wiwino hawe i wiwino, olima hiku mantandeno ka pinokowewesiako koloro tolupulu hiku ondauno.

³ Limbu i totono wiwino ”Tahi” atuu hinao gambarano sapi, hopulu gambara i larono asa hiku. Gambarano sapi anu lumimbuo ”Tahi” atuu hinao rua pulu dede ka tinawa meronga saru onae.

⁴ ”Tahi” atuu mentade i wawono hopulu ka orua sapi, otolu me'aro i utara, otolu i sumooano oleo, otolu i selata ka otolu i sabaano oleo. ”Tahi” atuu mo'ia i wawono, sekono luwuno ikino sapi atuu me'aro i larono.

⁵ Mokapano ”Tahi” atuu asa pele ngkae ka wiwino mengkena kana wiwino tonde mekaru, kana sisino bonse anu tewile. ”Tahi” atuu mokompo'ula tolu nsowu bati uwoi.

⁶ Iweweuo mbo'u hopulu bolusa pewo'ohia ka inaao olima i koanano ka olima i manggalino gagi pewo'ohia. I tu'ai mia dompowo'ohi hapa anu kinere weweua pesomba tinunu, sekono ”Tahi” atuu gagi pewo'ohiado sando mpesomba.

⁷ Iweweuo hopulu hulu mekaru inso a wulaa menunu saru songka wanguno ka inaao i larono Raha Mempori, olima i koana ka olima i manggali.

⁸ Iweweuo hopulu meda ka inaao i larono Raha Mempori, olima i koana ka olima i manggali. Iweweuo mbo'u asa etu loea kodei ponsiwui inso a wulaa.

⁹ Iweweuo mbo'u kintalado sando mpesomba, kintala langkai ka luwuno pewowano kintala atuu. Luwuno pewowa atuu i'apiiakono mala.

¹⁰ ”Tahi” atuu inaao i koana te'alaako i tenggara.

¹¹ I Hurami weweu ira mbo'u kawali, sikopa ka loea kodei ponsiwui. Kanandiomo ipoko'umario i Hurami anggaa anu asalakono iweweuakono i mokole Salomo i raha-Do Ue Ala:

¹² orua karuno saru orua bunggoli ulu-uluno karuno i untuno karuno atuu ka orua ramba-ramba kana buani anu tumutuwio orua bonggoli ulu-uluno karuno i untuno karuno atuu;

¹³ pato etu wua delima tiano orua ramba-ramba buani atuu, orua dede wua delima a asa ramba-ramba buani ka itutuwio orua bonggoli ulu-uluno karuno i wawono karuno atuu.

¹⁴ Iweweuomo mbo'u luwuno kareta pontumbo ka luwuno bolusa pewo'ohia i wawono luwuno kareta atuu.

¹⁵ Saru ”Tahi” anu asa atuu ka hopulu ka orua sapi i totono.

¹⁶ Luwuno kawali, sikopa, sarampa ka luwuno parewa susua anu iweweuakono i Hurami-Abi i mokole Salomo tiano raha-Do i Ue wineweu inso a mala anu hinahi kai mangkilo.

¹⁷ Iweweuo mokole luwuno atuu tinawa mompake wita pulu i Lembono Yarade, i olono Sukoti ka Sereda.

¹⁸ I Salomo weweuo luwuno parewa atuu hadio ntu'u, ranta mala atuu nahi pinokodoa mobeano.

¹⁹ I Salomo weweuo luwuno parewa anu kongko i raha-Do Ue Ala: meda pontunua pesomba inso a wulaa ka luwuno meda ponaapa roti pesomba,

²⁰ luwuno hulu mekaru inso a wulaa mpena saru huluno kai pinokomelanga i arono bolongko i larono ntu'u menunu saru atorano;

²¹ luwuno bunga, hulu ka sipino inso a wulaa, luwuno inso a wulaa mpena;

²² luwuno pisono, loea kodei ponsiwuino, sangkiri, polu pontunua halo inso a wulaa mpena; luwuno pewowa mewinso a raha atuu, luwuno pewowa anu i larono lumako a mpo'ianga tedoa mempori ka luwuno pewowa lumako a bolongko langkaino Raha Mempori, luwuno inso a wulaa.