2 Tawarika 32 - Wunta Mempori

Yerusale ikaduo i Saniheri

¹ Mansano luwuno peleluno i Hisikia anu metenunu atuu, haweomo i Sanaheri, mokole i Asuri sumapoio Yehuda. Ikaduo luwuno kota mebente ka montoo ta mongko'alao.

² Mansano tumo'orio i Hisikia, nine i Sanaheri aiwa ta meteaakono Yerusale,

³ iputusio saru luwuno tadulako sorodadu ka puu mpetea ka inonso luwuno mata uwoi anu hinawe i bungkuno kota ka ondae atuu ntetinda mpokowalio.

⁴ Ka i'amba tepumpuomo hadio mia. Dome'onsoo luwuno mata uwoi ka korono anu waa inso i tonga-tongano wita atuu. Dompotae, ”Tembio luwuno mokole i Asuri anu mehawe pino'inee ka dompohawe hadio uwoi?”

⁵ Tompaano rosono i Hisikia wali wanguo luwuno rere watu anu rinongka. Ipontade ira menara i wawono ka rere watu susua i bungkuno. Ipokorosoo mbo'u Milo i kota Daudi saru moweweu hadio talombo ka kanta.

⁶ Ipotoro ira tadulako sorodadu mpetea a mpalili. Ipumpu ira i arono a kintalano pewowa langkai kota, ka i'amba mepau mokorodoo aroado,

⁷ ”Pokorosoo ka pokorodoomo aroamiu! Siimo doito ka kodei aroa ndi mokole Asuri saru luwuno sorodadu anu perongano, hangano anu kumongkomi kita hadioopo sekono anu kumongkomio.

⁸ Kaeno koa mia anu kumongkomio, sekono anu kumongkomi kita Ondae i Ue, Ue Alato anu mokowali kita ka meteaakita.” Palili wali merodo hangano pauno i Hisikia, mokole i Yehuda atuu.

⁹ Umarino atuu i Sanaheri, mokoledo to Asuri, kumaduakono luwuno roso sorodaduno kota Lakisi. Itena ira ba'opia pegawaino melako i Yerusale ndi Hisikia, mokole i Yehuda, ka a luwuno to Yehuda anu kongko i Yerusale, saru pe'oliwi,

¹⁰ ”Kanandiomo pauno i Sanaheri, mokole i Asuri: Hapake pinerorohimiu ka impo'ia mpiha i Yerusale anu tekadu andio?

¹¹ Kombake i Hisikia mopo'o komiu, ka imemate mokoninggo ka mokoranga, saru mepau: Ondae i Ue, Ue Alato anu motola kita inso a ngkaeno mokole Asuri?

¹² Komba i Hisikia ke anu tumadio luwuno po'ianga pesombaa ka meda pontunua pesomba, ka ipotaeakono Yehuda ka Yerusale: Butu i arono asa meda pontunua pesomba asalakono impenggolontu mpesomba ka mpotunu pesomba i wawono?

¹³ Nahi imento'orioke hapa anu wineweuku ka ondae uempu'uku weweuo a luwuno tongku i wita susua? Nde pinesombaido luwuno tongku a luwuno wita atuu horio mokompotolao witado inso a ngkaeku?

¹⁴ Isema i olodo luwuno pinesombaido tongku anu doropu iramo uempu'uku atuu mokompotolao tongkuno inso a ngkaeku? Kana'umpe Ue Alamiu mokompotola komiu inso a ngkaeku?

¹⁵ Kanandio-andio, si mpo'ineeo i Hisikia mopo'o komiu kanandio! Si mpe'ala-alao, hangano nahina pinesombaido tongku ke poparentaa isuamo koa anu mokompotolao tongkuno inso a ngkaeku ka inso a ngkaedo uempu'uku. Tamoako Ue Alamiu atuu nahi ta motola komiu inso a ngkaeku!”

¹⁶ Da hadio mbo'u anu pinaudo pegawaino i Saniheri atuu ndi Ondae Ue Ala ka i Hisikia, tetenaa-Do atuu.

¹⁷ Iburio mbo'u wunta anu montutundali ka tumetewehi Ira i Ue, Ue Alado to Isaraeli, unino, ”Kana'umpe luwuno pinesombaido tongku i wita susua nahi pokompotolao tongkuno inso a ngkaeku, kanandio koa mbo'u Ue Alano i Hisikia nahi Ira mokompotolao tongku-Do inso a ngkaeku.”

¹⁸ Ondae mpebooliako pau Yehuda meroku a mpalili i Yerusale anu mekongko a wawo rere watu, pompokodoito ka mokompondende ira ka dompoko'alao kota atuu.

¹⁹ Dompepaukiako Ira Ue Alano Yerusale kana koa mbo'u luwuno pinesombaido tongku i wawontolino, anu wineweuno kaeno mia.

Yerusale toola inso a ngkaeno i Saniheri

²⁰ Mokole Hisikia ka nabi Yesaya anano i Amosi mekakai mongkona anu gagi atuu ka mebooli i suruga.

²¹ Ka i'amba Ondae i Ue montena mala'eka anu rumopu ira luwu puu mpetea anu memoroso, mia memota'u ka tadulako sorodadu anu kongko a mpekemaano mokole i Asuri, ranta mo'o'anuno mekule i witano. Ka i'amba ana ngkoroino mepateakono ponai, tempono ipewinsokio rahano pinesombaino.

²² Kanandiomo Dokaduduio i Ue i Hisikia ka palili i Yerusale inso a ngkaeno i Sanaheri, mokole Asuri, ka inso a ngkaedo luwuno iwalino. Dopoweeako ira rodoa ndi ondae a sompo siuno.

²³ Hadio mia mpowawa pesomba i Yerusale tia-Do i Ue ka luwuno sangka masuli tiano i Hisikia, mokole i Yehuda. Mompu'u i tu'ai dompelangkaio luwuno tongku.

Ta'u pokotompa peparentaano i Hisikia

²⁴ Ia luwuno oleo atuu i Hisikia mahaki, ranta mingki mate. Onae mekakai ndi Ondae i Ue, ka Ondae i Ue mepau ndi onae saru moweeakono petondoni kinohali-haliako.

²⁵ Sine i Hisikia nahi pontarimakasi a moikoa anu tinisoako ndi onae, hangano onae gagi mompelangka-langkai. Onae ka Yehuda saru Yerusale i'alu ira pontekudaako.

²⁶ Sine lembuino ipokonto'orio pompelangka-langkaino atuu ka ipe'urumako meronga saru palilino Yerusale, ranta tekuda-Do i Ue nahi alu ira tempono i Hisikia.

²⁷ I Hisikia mohawe pompoli ka marambaa anu tedoa langkai. Iweweuo luwuno ponaapa arataa wulaa, salaka, watu paramata anu motungko, rampa-rampa, luwuno kanta ka luwuno sangka anu ntekokosi,

²⁸ ka ponaapa kaanga, onaemo wuano gandu, anggoro ka lana, ka luwuno kanda mperupa-rupa pinotuwu ka luwuno kanda bawaa bembe bimba.

²⁹ Iwangu ira kota, mohawe hadio bawaa bembe bimba ka sapi, hangano Ondae Ue Ala moweeakono arataa anu hadio ntu'u.

³⁰ I Hisikiamo anu buntoo waaano mata uwoi Gihoni i wawono, ka mowaao i nganga ngkorono, i sumooano oleo, i kota Daudi. I Hisikia mehasili a luwuno sinongkapino.

³¹ Kanandio koa mbo'u teweweuno tempono luwuno tinenado mokole i Babeli aiwa ndi onae ka dompesikenoakono mongkona petondoni kinohali-haliako anu gagiomo i witano. Sine Ondae Ue Ala bintao i Hisikia Ira umarahakono, ka itino'ori luwuno ihino aroano.

³² Anu susua inso a nteweweuno i Hisikia ka luwuno wineweuno anu metenunu, menteeano luwuno atuu teburi molalo pongkitano i nabi Yesaya anano i Amosi, a laro wunta tutuludo mokole i Yehuda ka Isaraeli.

³³ I Hisikia mate, ka kinaburu a mporakea lumako a mpekaburuado anano i Daudi. I tempo mateano, luwuno Yehuda ka palili i Yerusale mpompowee pompelangkai ndi onae. Ka i'amba i Manase, anano gagi mokole umeuo.