2 Tawarika 30 - Wunta Mempori

I Hisikia ka luwuno palili merame-rameo Pasa 30:1–31:1

¹ Ka i'amba i Hisikia me'oliwi a luwuno Isaraeli ka Yehuda, ka moburi wunta ndi Eparai ka ndi Manase ka dome'aiwa merame-rameo Pasa-Do i Ue, Ue Alano i Isaraeli, i raha-Do i Ue i Yerusale.

² Mokole meronga saru luwuno petewawa ka luwuno bawaa i Yerusale memputusio ka domerame-rameo Pasa ia wula ko'orua,

³ hangano nahi dompokoweweuo rame-rameno ia tempono. Hangano sando mpesomba napi sompo doano anu mpokomemporio koroido ka palili napi tepumpu i Yerusale.

⁴ Pomputusi atuu dotarimao moiko mokole ka luwuno bawaa.

⁵ Domeweweuo pompakosi ka ipinalele a luwuno Isaraeli, inso i Bereseba hawe i Dani, ka dome'aiwa luwu i Yerusale merame-rameo Pasa-Do i Ue, Ue Alado to Isaraeli, hangano napi hadio anu rumame-rameo kana anu teburi.

⁶ Ka i'amba melako iramo luwuno tinena a luwuno Isaraeli ka Yehuda mewawao wunta inso a mokole ka luwuno petewawa. Menunu saru parentado mokole, dompotae, ”Hei, to Isaraeli, impepokulemo ndi Ondae i Ue, Ue Alano i Burahima, i Saki ka i Isaraeli, ka Ondae Ira mekule ia anu tebinta inso i olomiu, ondae anu mentola inso a ngkaedo mokole Asuri.

⁷ Siimo impoweweu kana uempu'umiu ka pepaekompomiu anu nahi petenunu ndi Ondae i Ue, Ue Alano uempu'udo. Mongkokongiri ntu'u Doweweu ira, kana anu kinitamiu.

⁸ Kanandio-andio, siimo impe'ulu watu kana uempu'umiu. Peweengakonomo koroimiu ndi Ondae i Ue. Aiwamo a mpo'ianga mempori anu Dopokomemporiomo ranta nahina tampulaano, ka impesombamo ndi Ondae i Ue, Ue Alamiu, ka tebinta inso a ngkoroimiu tekuda-Do anu tensila.

⁹ Menteeano, tewala mpekule komiu ndi Ondae i Ue, luwuno pepaekompomiu ka luwuno anamiu ira mpohawe pompehohawa inso a luwuno mia anu tumawa ira, ranta ka dompekule i wita andio. Hangano Ondae i Ue, Ue Alamiu, anu puu mpompehohawa. Nahi Ira wolilio rupa-Do inso ndi omiu, tewala mpepokule komiu ndi Ondae!”

¹⁰ Mansado melako tinena atuu inso a ngkota lumako a ngkota, melaloo wita Eparai ka Manase hawe i Sebulo, dompengingisii ira ka pinasinggiri.

¹¹ Sine ba'opia mia inso i Asieri, Manase ka Sebulo, mpe'urumako, ka me'aiwa i Yerusale.

¹² Kae-Do Ue Ala mo'angga ndi Yehuda mokobobotolio aroado ka domeweweuo parentano mokole ka luwuno petewawa, menunu saru pau-Do i Ue.

¹³ Ka i'amba mpepumpu iramo hadio mia i Yerusale, ira merame-rameo oleo langkai Roti Nahi Peragi ia wula ko'orua. Aasa bawaa anu tedoa langkai!

¹⁴ Domempari-pario meliahakono luwuno meda pontunua pesomba anu kongko i Yerusale. Luwuno meda pontunua pesomba dupa liniahako mbo'u ka tinadi i Lembono Kidironi.

¹⁵ Ka do'amba mensumbeleo bimba Pasa a ntanggala hopulu ka opaa wula ko'orua. Luwuno sando mpesomba ka to lewi gagi mo'o'anu, ka do'amba pokomemporio koroido ka mewawao pesomba tinunu a raha-Do i Ue.

¹⁶ Ondae mpentade a mpo'iangado montonda atora anu pinake ndi ondae, menunu saru Taurano i Musa, tetenaa-Do Ue Ala. Sando mpesomba mpesiwuiakono rea anu tinarimado inso a nto Lewi.

¹⁷ Hangano hadio bawaa anu nahi pokomemporio koroino, ka to Lewi anu asalakono sumumbeleo luwuno bimba Pasa tiado mia anu mokoburu, ranta nahi polio pokomempori Ira i Ue.

¹⁸ Menteeano asa ntia langkai inso a mpalili tamoako inso i Eparai, Manase, Isakari ka Sebulo nahi dompepokomorinao koroido. Sine, mpongkaa ira Pasa, maupo nahi penunu saru hapa anu teburi. Ndiomo i Hisikia mekaiako ira, kanandio, ”Po'ineeomo Ondae i Ue anu moiko atuu umoninio halano luwuno mia,

¹⁹ anu inso ntu'u i aroano umungke Ira Ue Ala, onaemo Ondae i Ue, Ue Alado uempu'uno, maupo nahi domentondao atora morina a po'iangaa mempori.”

²⁰ Ondae i Ue merorongeakono i Hisikia ka momuleo tongku atuu.

²¹ I larono opitu oleo to Isaraeli anu kongko i Yerusale memawongko ntu'u merame-rameo oleo langkai Roti Nahi Peragi, kontongaano to Lewi ka luwuno sando mpesomba sompo oleo mpenaniako po'unde-unde ndi Ondae i Ue mompake parewa mpenani anu meroku unino,

²² I Hisikia mohaweo luwuno pau mpo'unde-unde a luwuno to Lewi anu momoiko ntu'u a laro pompekakaako-Do i Ue. Kanandiomo mia dompongkaa kaanga oleo langkai atuu i larono opitu oleo, ka dompopesombaako pesomba tekaduduia ka po'unde-unde ndi Ondae i Ue, Ue Alano uempu'udo.

²³ Ka i'amba luwuno bawaa ntepo'asa aroa ira merame-rameo opitu oleo mbo'u. Ka do'amba meweweuo opitu oleo mbo'u ka memawongko.

²⁴ Hangano i Hisikia, mokole Yehuda, mompoweeomo a bawaa asa nsowu sapi lakino ka pitu nsowu bembe bimba. Luwuno mbo'u petewawa mpompowee a bawaa asa nsowu sapi lakino ka hopulu nsowu bembe bimba. Asantia langkai mbo'u sando mpesomba umari iramo mpokomemporio koroido.

²⁵ Ka memawongko iramo luwuno bawaa Yehuda, luwuno sando mpesomba ka luwuno to Lewi, luwuno bawaa anu hawe inso i Isaraeli, saru mia mehawe inso i wita Isaraeli ka anu mpo'ia i Yehuda.

²⁶ Langkai ntu'u mawongkoa i Yerusale, hangano mompu'u i Salomo anano i Daudi mokole i Isaraeli, nahi hori tegagi wineweu kanatuu i Yerusale.

²⁷ Umarino atuu luwuno sando mpesomba to Lewi mpentade rumonso ira palili. Pepaudo Dorongeo i Ue ka pekakaido hawe a mpo'ianga-Do anu mempori i suruga.