2 Tawarika 23 - Wunta Mempori

¹ Sine a nta'u ko'opitu, i Yoyada mesiahako ka moweweu tepo'asaa saru luwuno petewawa sorodadu asa etu, onaemo: i Asaria anano i Yerohami, i Isumaila anano i Yohanani, i Asaria anano i Obedi, i Ma'aseya anano i Adaya, ka i Elisapati anano i Sikiri.

² Domesompoo wita Yehuda ka pumpu ira to Lewi inso a luwuno kota i Yehuda saru luwuno petewawa pepe'etuado to Isaraeli. Luwudo me'aiwa i Yerusale.

³ Ka i'amba luwuno bawaa atuu mpoweweu pedandia saru mokole i raha-Do Ue Ala. Motae i Yoyada ndi ondae, ”Ndiomo ana ntamado mokole! Onaemo anu ta moparenta, kana anu Dopauomo i Ue mongkona luwuno anano i Daudi!

⁴ Ndiomo anu asalakono imeweweuo: asa ntia otolu inso ndi omiu anu umariomo anggaano a oleo Saba, moiko sando mpesomba maupo to Lewi, asalakono gagi puu mpodagai pewowa.

⁵ Asa ntia otolu mbo'u asalakono mekongko a langkanaedo mokole, ka asa ntia otolu mbo'u a Mpewowa Langkai Totono, ka luwuno palili asalakono mpepumpu a kintalano raha-Do i Ue.

⁶ Maupo isema nahi moiko mewinsokio raha-Do i Ue, sangkadio sando mpesomba ka to Lewi anu mpo'angga. Ondae moiko dompewinso hangano ondae mempori, sine luwuno palili asalakono mentondao atora-Do i Ue.

⁷ To Lewi asalakono lumimbuo mokole inso a luwuno siuno, singge mia saru parewa mpetea a ngkaeno. Maupo isema anu mewinsokio raha atuu, asalakono pinepate. Sompo dopeluarako ke mewinso si mpo'inee ira mokole asa-asado.”

⁸ To Lewi ka luwuno Yehuda meweweuo mengkena kana anu iparentaako ira sando mpesomba Yoyada. Singge mia umala ira miano anu umari mpo'angga a oleo Saba, meronga saru luwuno mia anu mompu'u mo'angga a oleo atuu, hangano sando mpesomba Yoyada nahi pokomalua ira anu mpebawaa atuu.

⁹ Ka i'amba sando mpesomba Yoyada moweeako ira petewawa sorodadu asa etu atuu kansai, kanta langkai ka kodei anuno mokole Daudi anu kongko i raha-Do Ue Ala.

¹⁰ Inaa ira luwuno palili, singge mia saru pando a ngkaeno, inso i apano koana hawe i apano manggali raha atuu, lumimbuo meda pontunua pesomba ka raha atuu dumagai ira mokole.

¹¹ Umarino atuu i Yoyada ka luwuno anano wawao ana ntamado mokole atuu meluarako. Dompokonaakono songko mokole ka meweeakono songka-Do Ue Ala ndi onae. Dompotoroo gagi mokole ka me'urapio, umarino atuu mpebooli, ”Tuwu iramo mokole!”

¹² Mansano rumongeo i Atalia palili memaroa mpelulu ka mentotowoo mokole, lumakoomo tepohaweako ira palili atuu a laro raha-Do i Ue.

¹³ Ikitao mokole mentade umpeda karuno langkanaeno a nsala mewinso, kontongaado anu langkai potorono saru luwuno puu pompuuri napiri kongko umpeda ndi mokole. Luwuno palili i wita atuu memawongko ka dompopuuri napiri, kontongaano luwuno puu mpenani saru luwuno parewa mpenanido, wawao penani po'unde-unde, i Atalia berio sangkano ka ipotae, ”Domerontuomo pabawaku, domerontuomo pabawaku!”

¹⁴ Sine sando mpesomba Yoyada tumena ira mpeluarako luwuno petewawado sorodadu asa etu, onaemo luwuno mia anu gagi petewawado sorodadu, ipotaeako ira, ”Imewawaomo meluarako inso a baresi! Isema anu me'alaako ndi onae asalakono pinepateako ponai!” Hangano sando mpesomba atuu umariomo mepau hieno, ”Si mpepateo i raha-Do i Ue!”

¹⁵ Ka do'amba merakoo beine atuu. I tempo atuu onae hawe a nsala mewinso a langkanaeno mokole a mpewowa langkai Ngara, pinepateomo i tu'ai.

¹⁶ Ka i'amba i Yoyada moweweu pedandia i'olodo luwuno palili saru onae ka mokole, nine ondae megagi bawaa-Do i Ue.

¹⁷ Umarino atuu mpewinso iramo luwuno palili a raha Baala, ka do'amba mpobangkuo; domempehao luwuno meda pontunuano pesomba ka luwuno tinaha pinesombaino ka mepateo i Matani, sando mpesomba Baala i arono luwuno meda pontunua pesomba atuu.

¹⁸ Ka i'amba i Yoyada meweengakono dagaiano raha-Do i Ue a luwuno sando mpesomba ka to Lewi, anu umarimo itia-tiao i Daudi a laro bawaano dompo'angga i laro raha-Do i Ue, onaemo ka dompopesombaako pesomba tinunu ndi Ondae i Ue, kana teburi a laro wunta Taurano i Musa saru memawongko ka saru penani montonda pontisono i Daudi.

¹⁹ Inaa ira mbo'u puu mpodagai pewowa a luwuno pewowa langkai raha-Do i Ue, kai maupo a hapamo koa kasi pewinso mia anu mokoburu.

²⁰ Umarino atuu i'oluako ira luwuno petewawa sorodadu asa etu, luwuno mia memota'u, luwuno topoparenta palili ka luwuno palili, ka i'amba winawa mokole metii inso i raha-Do i Ue; mpewinso ira a langkanaedo mokole telalo a mpewowa langkai i Wawono, ka i'amba pinontoro mokole a ngkadera poparentaa.

²¹ Memawongko iramo luwuno palili ka rodoomo kota atuu, umarino mate i Atalia pinepateako ponai.