2 Tawarika 22 - Wunta Mempori

Mokole Ahasia

¹ Umarino atuu palilino Yerusale mpotoroo i Ahasia, anano anu tompasusu, gagi mokole umeuo. Hangano luwuno anano anu lalua mota'u tinuwuno dompepate iramo gerombola anu mehawe a mpekemaa meronga to Ara. Kanandiomo i Ahasia, anano i Yorami mokole i Yehuda, gagi mokole.

² Tinuwuno i Ahasia rua pulu ka orua nta'u tempono igagi mokole ka asa nta'u tehineno ipoparenta i Yerusale. Neeno ineno i Atalia, ana'ueno i Omiri.

³ Itondao mbo'u gau ntumuwuno somborino i Ahabi, hangano ineno patuduo kai poweweu anu mosa'o.

⁴ Iweweuo hapa anu mosa'o a pongkita-Do i Ue mengkena kana somborino i Ahabi, hangano umarino mate amano, ondae megagi puu mpopatudu anu mokomasolao.

⁵ Hangano patududo mbo'u onae lumako meronga saru i Yorami anano i Ahabi, mokole i Isaraeli meteaakono i Hasaeli, mokoledo to Arami i Ramoti-Gileadi. Sine to Arami atuu mebelaio i Yorami.

⁶ Ka i'amba onae mekule i Yisire'eli kai pinokotompa inso a luwuno mobelano anu hinawe i Rama tempono metea umewaio i Hasaeli, mokoledo to Arami. I Ahasia, anano i Yorami mokole i Yehuda lumako kumitao i Yorami anano i Ahabi i kota Yisire'eli, hangano mahaki.

I Ahasia ipepateo i Yehu

⁷ A mpo'ehe-Do Ue Ala, i Ahasia ta mate i tempo kumita-kitao i Yorami. Mansano hawe i Ahasia, onae lumako saru i Yorami tepohaweakono i Yehu, ana'ueno i Nimisi, anu Do'urapiomo i Ue, ka iropuo somborino i Ahabi.

⁸ Tempono iweweuo i Yehu pohuku a nsomborino i Ahabi, ihawe ira anu langkai potorodo i Yehuda ka anado pepaekompono i Ahasia, anu mpekakaakono i Ahasia. Maupo ondae ipepate ira.

⁹ Ka i'amba umungkeo i Ahasia ka rinako tempono ipewuni i Samaria. Onae winawa ndi Yehu, ka i'amba pinepate. Domengkaburuo, hangano dompotae mia, ”Onae andio ana'ueno i Yosapa, anu umungke Ira i Ue tompaano aroano.” Inso a nsomborino i Ahasia, nahina mbo'u anu polio moparenta.

I Atalia pinepate ka i Yoasi gagi mokole

¹⁰ Mansano kumitao i Atalia, ineno i Ahasia, nine anano mateomo, onae mompari-pari mepate ira luwu ulea mokole inso a nsuku Yehuda.

¹¹ Sine i Yosabati, ana beineno mokole, umalao i Yoasi anano i Ahasia ka mewuni-wuni iwawao inso i olodo anado mokole anu ta pinepate atuu. Ka i'amba onae winuni meronga saru anu mekakaakono a bolongko poturia. Kanandiomo i Yosabati, ana beineno mokole Yorami, kombiano sando mpesomba Yoyada, anu onaemo pepaekompono beine i Ahasia, wunio inso ndi Atalia, ranta onae nahi pinepate.

¹² I Yoasi mo'ia saru ondae onoo nta'u tehineno ka mewuni a raha-Do Ue Ala, kontongaano i Atalia moparenta.