2 Tawarika 21 - Wunta Mempori

¹ I Yosapa mohawe penaa-naaano saru uempu'uno ka kinaburu i horino uempu'uno i kota Daudi. Ka i'amba i Yorami, anano, gagi mokole umeuo.

Mokole Yorami

² Luwuno pepaekompono i Yorami, anano i Yosapa, onaemo: i Asaria, i Yehieli, i Sakaria, i Asariahu, i Mikaeli ka i Sepatia. Ondae luwu anano i Yosapa, mokole i Isaraeli.

³ Amado moweeako ira hadio pompowee, onaemo wulaa ka salaka ka luwuno sangka masuli, ka luwuno kota mebente i Yehuda. Sine pentoroa gagi mokole iweeakono i Yorami, hangano onaemo ana akano.

⁴ Umarino i Yorami moparenta a poparentaano amano ka moroso pentoroano, ipepateako ira luwu ponai pepaekompono ka ba'opia mbo'u anu langkai potorono i Isaraeli.

⁵ Tinuwuno i Yorami tolu pulu ka orua nta'u tempono igagi mokole ka oalu nta'u tehineno ipoparenta i Yerusale.

⁶ Itondao sala tumuwudo mokole i Isaraeli kana anu wineweuno somborino i Ahabi, hangano onae mongkombia anano i Ahabi. Onae moweweu hapa anu mosa'o a pongkita-Do i Ue.

⁷ Maupo kanandio, nahi Dobehe i Ue rumopuo somborino i Daudi, hangano pedandia anu winutu-Do saru i Daudi, menunu saru dandi-Do, nine Ira tumeahakono langano pelita ndi onae ka ana'ueno ranta nahina tampulaano.

⁸ I tempo poparentaano i Yorami, to Edomi umewaio pabawano i Yehuda ka ipompotoro asa mokole gagi mokoledo.

⁹ I Yorami lumako meronga luwuno tadulakono saru luwuno karetano. Tempono wongi ipewangu, ka i'amba meronga saru luwuno tadulako sorodadu mpekareta, ipewinsokio baresido to Edomi anu mengkaduo.

¹⁰ Kanandiomo dome'ewa to Edomi ka ntepotola inso a mpabawano Yehuda hawe kanandio-andio. I Libina mbo'u umewaio pabawano i tempo atuu, hangano one binta Ira i Ue, Ue Alado uempu'uno.

¹¹ Ka iweweuo mbo'u luwuno pompesombaia a luwuno torukuno i Yehuda. Onae weweu ira palili i Yerusale mponsosabo ka onae mokopansia ira to Yehuda.

¹² Ka i'amba haweomo ndi onae asa wunta inso ndi nabi Elia anu ihino, ”Kanandiomo pau-Do i Ue, Ue Alano i Daudi, ama mpu'umu: Omue tuwu nahi utondao sala ntumuwuno i Yosapa, amamu, ka i Asa mokole i Yehuda,

¹³ tendeano tumondao sala ntumuwudo mokole i Isaraeli ka weweuo Yehuda ka palilino Yerusale mponsosabo, kana anu wineweudo somborino i Ahabi. Tendeano upepate iramo pepaekompomu, luwuno somborido amamu anu moiko irapo sekono omue.

¹⁴ Onaemo pu'uno Ondae i Ue Ira moweakono tula langkai a mpalilimu, luwuno anamu, beinemu, ka a luwuno arataamu.

¹⁵ Omue isa'a komarasaiako haki mobea, haki haro kompo, ranta bate'opia tempo haro kompomu ta meluarako hangano haki atuu.”

¹⁶ Umarino atuu Ondae i Ue lumeluo aroado to Pelisiti ka to Ara anu mpo'ia tepo'umpeda saru to Etiopia ka dome'ewaio i Yorami.

¹⁷ Melako ira me'ewaio Yehuda, mpewinsokio ka mewawao luwuno arataado anu hinawe i laro langkanaeno mokole gagi pinomuru, ka luwuno anano ka beineno. Nahina maupo te'asa mia anano anu tebinta ndi onae sangkadio i Yoahasi, anano anu tompasusu.

¹⁸ Umarino luwuno andio, Ondae i Ue mokomahakio i Yorami, mokomahakiakono haki haro kompo anu nahi pinokotompa.

¹⁹ Ba'opia tempo lembuino, bara'ura umarino orua nta'u, meluarakoomo haro kompono hangano haki atuu, ka i'amba mate tedoa marasai. Palilino nahi dompolangaakono api kana anu domeweweuo a uempu'uno.

²⁰ Tinuwuno i Yorami tolu pulu ka orua nta'u tempono igagi mokole ka oalu nta'u tehineno ipoparenta i Yerusale. Onae mate nahina mia anu me'o'oleakono. Onae kinaburu i kota Daudi, sine komba i laro ngkaburudo mokole.