2 Tawarika 2 - Wunta Mempori

Pepatinda mowangu Raha-Do i Ue

¹ I Salomo meparenta ka iwinangu rahano nee-Do i Ue ka langkanae poparentaano.

² I Salomo montena pitu pulu nsowu mia mpo'angga, halo pulu nsowu puu pompole watu i mentorukuno ka tolu nsowu ka nomo etu puu mpodagai mia mpo'angga anu dumagai ira.

³ Ka i'amba i Salomo montena mia ndi Hurami, mokole i wita Tirusi, saru pe'oliwi, ”Weweuakunemo kana anu uweweuo ndi Daudi, amaku, tempono upo'oliwi keu arasi ndi ondae tiano powangu langkanae po'iangado.

⁴ To'oriomo, aku wanguo rahano nee-Do i Ue, Ue Alaku aku mokomemporiako Ira, ka itinunu dupa mo'ahi i aro-Do, roti pesomba pinatinda mpiha ka pesomba tinunu pinesombaako tempono mo'oru ka ngkiniwia, a sompo oleo Saba ka wula wo'ohu ka a luwuno porame-ramea anu pinakosi-Do i Ue, Ue Alamami. Onaemo anu asalakono domeweweuo to Isaraeli ranta nahina tampulaano.

⁵ Raha anu aku wanguo atuu asalakono langkai, hangano Ondae Ue Alamami langkai Irapo sekono luwuno anu pinesombai susua.

⁶ Sine isema anu polio mowanguako Ira raha, sekono langi, tendeano maupo langi luwuno langi, nahi ta moko'ula Ira? Isemake ongkue andio ka kutekona mowanguako Ira raha, sangkadio butu gagi po'ianga montunu pesomba i aro-Do?

⁷ Kanandio-andio oliwiomo ndi ongkue mia anu pande mo'angga wulaa, salaka, mala, labu ka moweweu bana wungo mongura, motaha motu'a, wungo motu'a ka anu pande mbo'u moweweu ngginori ka dompokowali ira anu pande mpo'angga anu kongko ndi ongkue i Yehuda ka i Yerusale, anu dotisoomo amaku i Daudi.

⁸ Oliwiakune mbo'u keu arasi, sanobari ka cendana inso i torukuno Libano, hangano kuto'orio nine luwuno atamiu pande mpontuehi keu inso i Libano. Luwuno ataku ira mpokowali ira atamiu

⁹ ka dompopatindakune tehadio keu, hangano raha anu aku wanguo atuu asalakono langkai ka maramba.

¹⁰ Tiado luwuno mia mpo'angga anu mpontuehi keu aku moweeako ira rua pulu nsowu kori gandu, rua pulu nsowu kori jelai, rua pulu nsowu bati anggoro ka rua pulu nsowu bati lana gagi kaangado luwuno atamiu atuu.”

¹¹ I Hurami, mokole i wita Tirusi mo'oliwi wunta sulono ndi Salomo, unino, ”Hangano Ondae i Ue mehohawa ira bawaa-Do, Dopotoro komiumo gagi mokoledo.”

¹² Ka i'amba burio i Hurami, ”Inunde-unde Iramo Ue Alado to Isaraeli anu mokogagio langi ka tolino, hangano Doweeakonomo i Daudi asa ana anu pande mosongka, molino pompewowolo ka ponto'ori anu ta wanguo raha-Do i Ue ka asa langkanae poparentaano, onaeno!

¹³ Kanandio-andio ku'oliwio i Hurami Abi, asa mia mpande anu bukeako ponto'ori.

¹⁴ Onae anano asa beine inuleno i Dani, sekono amano to Tirusi. Onae pande mo'angga wulaa, salaka, mala, labu, keu ka moweweu bana wungo mongura, bana wungo motu'a, lena alusu ka sawu motaha motu'a, saru pande moweweu mperupa-rupa ngginori ka mperupa-rupa anu ta wineweu anu itinenaako meronga saru luwuno anu pande ndi omiu ka luwuno anu pande ndi ondae ueku i Daudi, amamiu.

¹⁵ Kanandio-andio moikoomo ueku ipo'oliwiako ira luwuno atamiu gandu ka jelai, lana ka anggoro anu pinaumiumo atuu ueku.

¹⁶ Kami mpontuehi keu inso i torukuno Libano menunu kineremiu ka mewawaakono lanti ndi omiu molalo tahi lumako i Yapo. Ka i'amba wawao i Yerusale.”

¹⁷ I Salomo dumoao luwuno mia mehawe i wita Isaraeli, umarino podoaa anu horio iweweuo i Daudi, amano ka hinaweomo asa etu ka lima pulu ka otolu nsowu ka nomo etu mia.

¹⁸ Ka inso i olodo andio, pitu pulu nsowu mia gagi puu mpo'angga, halo pulu nsowu mia puu pompole watu i mentorukuno ka tolu nsowu ka nomo etu mia puu mpodagai anu asalakono dumagai ira luwuno mia mpo'angga atuu.