2 Tawarika 14 - Wunta Mempori

¹ Ka i'amba i Abia mohawe penaa-naaano meronga uempu'uno ka onae kinaburu i kota Daudi. I Asa, anano, gagi mokole umeuo. I tempo poparentaano wita atuu rodo i larono hopulu nta'u.

Ponangino mokole Asa ndi Sera

² I Asa moweweu hapa anu moiko ka mentee a pongkita-Do i Ue, Ue Alano.

³ Itadio luwuno meda pontunua pesomba susua ka luwuno po'ianga pesombaa, ipuroo luwuno tugu lahumoa, ka merawo-rawoo luwuno karuno lahumoa.

⁴ Iparenta ira to Yehuda ka do'ungke Ira i Ue, Ue Alano uempu'udo, ka mpetuundu a songka ka parenta.

⁵ Itadio luwuno po'ianga pesombaa ka luwuno pontunua dupa inso a luwuno kota i Yehuda. Poparentaa rodo i tempono poparentano.

⁶ Iwanguo luwuno kota mebente i Yehuda, hangano i wita atuu rodo. Nahina anu meteaakono a luwuno ta'u atuu, hangano Ondae i Ue moweeakono rodoa.

⁷ Ipotae a nto Yehuda, ”Aiwamo tompokorosoo luwuno kota andio ka lumimbuakono rere watu, luwuno menara, pewowa, ka luwuno lansono. Wita andio da a laro ngkaeto, hangano tome'ungke Ira Ue Alato ka Ondae umungke kita saru moweeakita rodoa a luwuno witato.” Domewanguo ka gagi.

⁸ I Asa hinao bawaa sorodaduno inso i Yehuda tolu etu nsowu mia hadiono anu mpowawa kanta langkai ka kansai, ka inso i Benami rua etu ka halo pulu nsowu mia hadiono anu mpowawa kanta kodei ka mpompadii pana. Luwudo sorodadu anu moroso ka mosia.

⁹ I Sera, to Etiopia lumako sumapoiako ira sorodadu asa juta mia hadiono ka tolu etu kareta. Onae hawe i Maresa.

¹⁰ I Asa meluarako umaropio. Dome'atorao baresi mpeteado a lembono Sepata umpeda Maresa.

¹¹ I Asa mebooli ndi Ondae i Ue, Ue Alano, ”Oo Ue, sangkadio Omiu nahina anu mokontulungio anu molema mo'aropi anu moroso. Itulungi kamimo oo Ue, Ue Alamami, hangano ndi Omiumo kimpomperorohi ka a laro nee-Miu kami melako umewaio bawaano sorodadu anu langkai andio. Oo Ue, Omiumo Ue Alamami, si po'ineeo maupo te'asa mia hinao rosono ta umewai Komiu!”

¹² Ondae i Ue mokontenangi ira to Etiopia i arono i Asa ka to Yehuda. Luwuno to Etiopia atuu mpolai,

¹³ sine i Asa meronga sorodaduno lumulu ira hawe i Gerari. Inso i olodo to Etiopia atuu hadio ntu'u anu mate, ranta nahina anu mo'ia tuwu, hangano meropu ira i aro-Do i Ue ka sorodaduno. Luwuno to Yehuda mpowawa pinomuru anu hadio ntu'u.

¹⁴ Domenangio luwuno kota petengi-tengino Gerari, hangano dumoitoako Ira i Ue umaluo palilino. Dompomuruo luwuno kota atuu, hangano hadio pinomuru i ra'ai.

¹⁵ Luwuno kemado anu mpope'ue pinotuwu dompoko'alao mbo'u, ka hadio bawaano bembe bimba ka unta domewawao gagi pinomuru. Ka do'amba mpekule i Yerusale.