2 Tawarika 13 - Wunta Mempori

Mokole Abia 13:1–14:1

¹ A nta'u kohopulu ka oalu poparentaano mokole Yerobea, i Abia gagi mokole i Yehuda.

² Otolu nta'u tehineno ipoparenta i Yerusale. Neeno ineno i Mikaya, anano i Urieli inso i Gibea. Hinao peteaa olono i Abia ka i Yerobea.

³ Saru sorodadu petea anu moroso ka mosia, pato etu nsowu mia bininiki, i Abia pu'uo peteaa, sekono i Yerobea mo'atora baresi mpeteano umewaio saru halu etu nsowu mia bininiki, anu moroso ka mosia.

⁴ I Abia mentade i wawo ntorukuno Semaraimi, anu tewinso mentorukuno Eparai, ka ipotae, ”Imeronge akumo, Yerobea ka luwuno Isaraeli!

⁵ Nahi imento'orio ke nine Ondae Ue Alano i Isaraeli meweengakono pabawa poparentaa i Isaraeli ndi Daudi ka a luwuno anano ranta nahina tampulaano saru asa pedandia ohia?

⁶ Sine, i Yerobea anano i Nebati, atano i Salomo anano i Daudi, mentadeomo umewaio ueno.

⁷ Luwuno mia mpelakopi ka mia lambaha, ntepo'asa saru onae. Moroso irapo sekono i Rehabea anano i Salomo, anu da mongura ka napi moroso aroano, saru nahi polio umaropi ira.

⁸ Kanandio-andio impewowoloo nine komiu mempolio umaropio poparentaa-Do i Ue, anu a laro ngkaeno inuleno i Daudi, hangano mehadio komiu ka kongko ndi omiu anano sapi wulaa anu wineweuno i Yerobea gagi pesombaamiu.

⁹ Kombake imeliahako iramo sando pesomba-Do i Ue, luwuno anano i Haruni atuu, ka luwuno to Lewi, ka i'amba mpopotoro sando mpesomba montonda gaudo mia i wita susua, ranta sompo mia anu aiwa kai pinokomempori mowawa asa sapi laki mongura ka opitu bimba laki, onae ta gagi sando mpesomba tiano anu susua komba Ondae Ue Ala.

¹⁰ Sine ndi omami, Ondaemo i Ue, Ue Alamami ka nahi kimebinta Ira. Luwuno sando mpesomba anu mpekakaako Ira i Ue, onaemo luwuno anano i Haruni, sekono to Lewi a mpo'anggaado.

¹¹ Sompo mo'oru ka ngkiniwia to Lewi mpontunuako Ira i Ue pesomba tinunu ka dupa mo'ahi, mpopotuda roti pesomba a wawo meda anu morina ka me'atorao hulu mekaru inso a wulaa saru luwuno huluno ka ipinolanga sompo ngkiniwia. Menteeano, omami anu mpekakaakono anu asalakono kami meweweuo ndi Ondae i Ue, Ue Alamami, sine omiu mebinta Ira.

¹² Kitaomo, Ondae Ue Ala saru omami gagi petewawa. Luwuno sando mpesomba-Do tetinda mpopuuri petondoni sumapoi komiu saru napiri luwuno petondoni. Oo, to isaraeli, si mpetea umewai Ira i Ue, Ue Alado uempu'umiu, hangano nahi komiu mponangi!”

¹³ Sine i Yerobea parenta ira asa bawaa sorodadu pontowoki melimbuo ka mensapoi ira inso i bungkudo, ranta sorodaduno mo'ia i arono Yehuda ka luwuno sorodadu pontowoki i bungkudo.

¹⁴ Mansano to Yehuda mpewolili i bungkudo, mengkaa ondae asalakono mpo'aropi peteaa inso i arodo ka inso i bungkudo. Ka do'amba mpebooli ndi Ondae i Ue. Luwuno sando mpesomba mempuurio napiri,

¹⁵ ka luwuno to Yehuda mpebooliako hio mpetea. I tempono to Yehuda atuu mpebooliako hio mpetea, Ondae Ue Ala mokontenangio i Yerobea ka luwuno to Isaraeli i arono i Abia ka Yehuda.

¹⁶ To Isaraeli mpolai inso i arodo to Yehuda, sine Ondae Ue Ala meweengako ira a ngkaedo to Yehuda.

¹⁷ I Abia ka sorodaduno numangi ira. Inso i olodo to Isaraeli memate ira lima etu nsowu mia bininiki.

¹⁸ Kanandiomo to Isaraeli domeninangi i tempo atuu, sekono to Yehuda gagi moroso, hangano ondae mpomperorohi ndi Ondae i Ue, Ue Alano uempu'udo.

¹⁹ I Abia lumuluo i Yerobea ka ipongko'alao luwuno kota inso ndi onae: Beteli saru luwuno kota kodeino, Yesana saru luwuno kota kodeino, ka Eperoni luwuno kota kodeino.

²⁰ I Yerobea nahi hori mbo'u mohawe roso i tempono i Abia. Onae Dosepio i Ue ranta kai mate.

²¹ I Abia mokorosoo koroino. Onae mo'ala hopulu ka opaa kombiano ka hinao rua pulu ka orua ana ntamano ka hopulu ka onoo anano beine.

²² Anu susuano inso a nteweweuno i Abia, luwuno peleluno ka petenano, teburi a laro wunta teweweuno nabi Ido.