2 Tawarika 12 - Wunta Mempori

I Sisaki sumapoio Yerusale

¹ Tempo pabawano i Rehabea gagi mokole rodo ka moroso, onae saru luwuno Isaraeli mebintao songka-Do i Ue.

² Sine, ia ta'u ko'olima poparentano mokole Rehabea, i Sisaki mokole i Masiri, lumako sumapoio Yerusale, hangano nahi dompetenunu ndi Ondae i Ue.

³ Onae lumako saru asa nsowu ka rua etu kareta ka nomo pulu nsowu sorodadu mpengara, saru nahi pinokodoa hadiono sorodadu Libia, Suki, ka Etiopia anu tumondao inso i Masiri.

⁴ Ipongko'alao luwuno kota mebente i Yehuda ka umpedaakono Yerusale.

⁵ Nabi Semaya aiwa ndi Rehabea ka luwuno petewawa Yehuda anu mpepumpu i Yerusale hangano ponsapoino i Sisaki. Ipotaeako ira, ”Kanandiomo pau-Do i Ue: Imebinta Akumo, onaemo pu'uno Ongkue mbo'u bintakomiu a laro pabawano i Sisaki.”

⁶ Ka i'amba luwuno petewawa Isaraeli ka mokole mpe'urumako ka dompotae, ”Ondaemo i Ue anu mentee!”

⁷ Mansano Dokitao i Ue nine mpe'urumako ira, haweomo pau-Do i Ue ndi Semaya, kanandio, ”Mpe'urumako iramo, onaemo pu'uno nahi Aku rumopu ira. Aku koa ronga motola ira ka mokulano tekuda-Ku nahi ta pinotii i Yerusale molalo i Sisaki.

⁸ Sine ira megagi atano, ka domento'orio mposisalao olono metenunu ndi Ongkue ka metenunu a luwuno poparentaa ntolino.”

⁹ I Sisaki mokole i Masiri, lumako sumapoio Yerusale. Irontuo ponaapa arataa a raha-Do i Ue ka ponaapa arataa a rahano mokole; luwuno irontuo. Irontuo mbo'u luwuno kanta wulaa anu wineweuno i Salomo.

¹⁰ Gagi euno, mokole Rehabea weweuo luwuno kanta mala ka ipe'ala-alaakono a luwuno petewawado puu mpodagai anu medagaio pewowa langkanaeno mokole.

¹¹ Sompo ipewinso mokole a raha-Do i Ue, luwuno puu mpodagai mpewinso mewawao luwuno kanta atuu, ka ondae koa mbo'u anu mpokuleo a bolongko podagaiado puu mpodagai.

¹² Hangano mokole me'urumako, tetadiomo tekuda-Do inso ndi onae, ranta nahi Doropuo luwu. Metiangi mbo'u da hinawe luwuakoano anu moiko i Yehuda.

¹³ Mokole Rehabea mokorosoo koroino ka moparenta i Yerusale. Tinuwuno i Rehabea pato pulu ka asa nta'u tempono igagi mokole, ka i larono hopulu ka opitu nta'u ipoparenta i Yerusale, kota anu bininiki-Do i Ue inso i olono luwuno suku Isaraeli ka ipo'ia nee-Do i ra'ai. Neeno ineno i Na'ama, asa beine Amoni.

¹⁴ Onae moweweu anu mosa'o, hangano nahi pakosio aroano umungke Ira i Ue.

¹⁵ Kombake teweweuno i Rehabea inso a pompu'uano hawe pokotampulaano luwuno teburi a laro teweweuno i Semaya, nabi atuu, ka i Ido, puu mpongkita atuu, teweweu anu mo'ula mbo'u potudano tumuwu. I Rehabea ka i Yerobea wala hina mpiha peteaa.

¹⁶ I Rehabea mohawe penaa-naaano saru uempu'uno, ka onae kinaburu i kota Daudi. Ka i'amba i Abia anano, gagi mokole umeuo.