2 Tawarika 11 - Wunta Mempori

¹ Mansano hawe i Rehabea i kota Yerusale, ipumpu ira suku Yehuda ka Benami, asa etu ka halu pulu nsowu mia bininiki anu polio metea ka dompeteaako ira to Isaraeli saru tinoo mokuleo poparentaa atuu ndi onae.

² Sine, haweomo pau-Do i Ue ndi Semaya, tetenaa-Do Ue Ala,

³ ”Pauakonomo i Rehabea, anano i Salomo, mokole i Yehuda, ka a luwuno to Isaraeli i Yehuda ka Benami, kanandio:

⁴ Kanandiomo pau-Do i Ue: Siimo imelako mposapoi ke mpetea umewai ira pepaekompomiu. Impekulemo i rahamiu asa mia ka asa mia, hangano Ongkuemo pu'uno kai gagi anu andio.” Domentondao pau-Do i Ue, ka do'amba mpekule ka nahi domelako mensapoio i Yerobea.

Mokole Rehabea – Mokorosoo poparentaa ka somborino mokole Rehabea

⁵ I Rehabea mo'ia i Yerusale ka mokorosoo luwuno kota i Yehuda gagi bente.

⁶ Ipokorosoo Beteleme, Etami, Tekoa,

⁷ Beti-Suri, Soko, Adulami,

⁸ Gati, Maresi, Sipi,

⁹ Adoraimi, Lakisi, Aseka,

¹⁰ Sora, Ayaloni ka Heberoni. Onaemo atuu luwuno kota mebente, anu po'iangano i Yehuda ka Benami.

¹¹ Ipokorosoo luwuno kota mebente atuu ka numaa ira i ra'ai luwuno petewawa sorodadu saru pepatindaa kaanga, lana ka anggoro.

¹² Maupo kanta ka kansai ipatindao a sompo-sompo kota. Iweweuo luwuno kota atuu tedoa moroso. Kanandiomo Yehuda ka Benami gagi wita pinabawaino.

¹³ Luwuno sando mpesomba ka to Lewi i luwuno Isaraeli aiwa ntepo'asa saru onae inso a wita po'iangado.

¹⁴ To Lewi mebintao luwuno pelerea ka arataado, ka do'amba melako i Yehuda ka i Yerusale, hangano i Yerobea ka luwuno anano umonto ira megagi sando mpesomba-Do i Ue,

¹⁵ ka mpontoro ira sando mpesombado tiano a mpesombaa, a bembe ka a ana nsapi laki anu wineweuno.

¹⁶ Tumonda ira, inso a luwuno suku Isaraeli mehawe iramo i Yerusale luwuno mia anu bobotoliomo aroano ta umungke Ira Ue Alano i Isaraeli. Ira mpopesombaako pesomba ndi Ondae i Ue, Ue Alano uempu'udo.

¹⁷ Kanandiomo dompokorosoo poparentaa Yehuda ka mokorosoo poparentaano i Rehabea, ana ntamano i Salomo, i larono otolu nta'u, hangano i larono otolu nta'umo atuu domentuwu mentondao peleluno i Daudi ka i Salomo.

¹⁸ I Rehabea umalao i Mahalati, anano i Yerimoti anano i Daudi ka i Abihaili ana beineno i Eliabi anano i Isai, gagi kombiano,

¹⁹ anu me'anaakono luwuno ana ntama andio: i Yeusi, i Semaria, ka i Sahami.

²⁰ Umarino i Mahalati, ikombiao i Ma'aka, anano i Abisalo, anu me'anaakono i Abia, i Atai, i Sisa, ka i Selomiti.

²¹ I Rehabea mehohawao i Ma'aka, anano i Abisalo laluaopo sekono luwuno kombiano ka samburueno. Onae mo'ala hopulu ka oalu kombiano ka nomo pulu samburueno, saru hinao rua pulu ka oalu ana ntama ka nomo pulu ana beine.

²² I Rehabea motoroo i Abia, anano i Ma'aka gagi anu lalua, petewawa i olodo pepaekompono, hangano tinoono ta mokogagio mokole.

²³ Moiko i'atorao, luwuno anano anu susua itia-tia ira a luwuno wita Yehuda ka Benami, a luwuno kota mebente. Ipoweeako ira kaanga anu hadio ntu'u ka mompatindaako ira hadio kombiado.