2 Tawarika 1 - Wunta Mempori

I Salomo mo'ema ponto'ori

¹ I Salomo ana ntamano i Daudi komoro-morosono a pentoroano gagi mokole. Ondae Ue Alano kumongkomio ka weweuo pabawano tedoa langkai.

² I Salomo mompowee meparenta a luwuno to Isaraeli ka a luwuno petewawa sorodadu asa nsowu ka sorodadu asa etu, a luwuno puu mpobitara ka a petewawa i luwuno Isaraeli, onaemo luwuno petewawado anu mpepe'etu.

³ Ka i'amba i Salomo lumako saru luwuno bawaa a mpesombaia i Gibeo, hangano i ra'ai hinao Kema Tepotowoa-Do Ue Ala anu wineweuno i Musa, tetenaa-Do i Ue atuu, i pada one.

⁴ Sine, i Daudi i ndi'ipua wawao Burua-Do Ue Ala inso i Kiriati-Yearimi a mpo'ianga anu ipatindaakono Burua atuu, hangano ipasaomo kema po'iangano Burua atuu i Yerusale.

⁵ Sine meda pontunua pesomba mala anu wineweuno i Besale'eli anano i Uri anano i Huri da kongko i ra'ai i arono Kema Mempori-Do i Ue. I ra'aimo i Salomo ka bawaa atuu mpo'ema pontinso-Do i Ue.

⁶ I Salomo mompesombaako pesomba i ra'ai i aro-Do i Ue, i wawono meda pontunua pesomba mala i arono Kema Tepotowoa atuu. Ipesombaakono asa nsowu pesomba tinunu i wawono.

⁷ Ia wongi atuu Ondae Ue Ala mepopokita ndi Salomo ka mepau ndi onae, ”Emaomo hapa anu kineremu Aku weeakomu.”

⁸ Motae i Salomo ndi Ondae Ue Ala, ”Ipopokitaomo petenunu ka pompehohawa-Miu anu langkai ndi Daudi, amaku ka Ipotoro akumo gagi mokole umeu ira.

⁹ Kanandio-andio, oo Ue Ala, Ipopokitaomo morosono dandi-Miu ndi Daudi, amaku, hangano Ipotoro akumo gagi mokole a asa tongku anu hadiono kana awu wita.

¹⁰ Kanandio-andio Ipowee akumo pande mompewowolo ka ponto'ori, ka kupokompo'angga gagi petewawado tongku andio, hangano isemake anu polio gagi puu mpobitara a bawaa-Miu anu langkai andio?”

¹¹ Ondae Ue Ala mepau ndi Salomo, ”Hangano onaemo atuu ineheno aroamu ka nahi upo'ema pompoli, arataa, marambaa ke penaano anu umo'aliaakomu ka mbo'u nahi upo'ema tinuwu melai, sine tendeano omue mo'ema pande mompewowolo ka ponto'ori ka upolio gagi puu mpobitira a bawaa-Ku anu hangano ondae Kupotorokomo gagi mokole.

¹² Onaemo pu'uno pande mompewowolo ka ponto'ori Aku weeakomu. Aku koa moweeakomu mbo'u pompoli, arataa ka marambaa anu nahi hori hina a luwuno mokole se'eluno omue ka nahi ta hina a luwuno mokole umarino omue.”

¹³ Ka i'amba i Salomo mekule inso a pompesombaia i Gibeoni, inso i arono Kema Tepotowoa lumako i Yerusale ka ipoparenta a nto Isaraeli.

Pompolino i Salomo

¹⁴ I Salomo pumpuo luwuno kareta ka sorodadu mpengara; karetano asa nsowu ka pato etu ka hopulu ka orua nsowu sorodadu mpengara. Luwuno inaao i luwuno kota ponaapa kareta ka umpeda mokole i Yerusale.

¹⁵ Salaka ka wulaa i Yerusale iweweuo mokole kana watu hadiono ka keu arasi kana hadiono keu ara anu tuwu i Sepela.

¹⁶ Ngara tiano i Salomo winawa inso i Misiraimi ka Kewe. Luwuno puu mpebalu-baludo mokole me'olio inso i Kewe montonda pe'olia.

¹⁷ Asa kareta anu winawa inso i Misiraimi, olino nomo etu sikala salaka ka asa ngara asa etu ka lima pulu sikala. Kanatuu koa mbo'u molalo luwuno puu mpebalu-baludo mokole, luwuno atuu inasa a luwuno mokoledo to Heti ka luwuno mokoledo to Arami.