2 Samueli 8 - Wunta Mempori

Poponangino i Daudi

¹ Ba'opia tempo lembuino i Daudi numangi ira to Pelisiti ka ipabawai ira. Ka i'amba i Daudi rumontuo poparentaa inso a ngkaedo to Pelisiti.

² Onae numangi ira koa mbo'u to Moabi. Itena ira mpepombole a wita ka isongkaako ira koloro. Isongka ira pendua ondauno koloro anu ta pinepate ka asa ondauno koloro anu ta pino'inee tuuwu. Kanatuumo to Moabi mpetenunu ndi Daudi ka asalakono pompesombaako peki'ue.

³ Ka i'amba i Daudi numangio i Hadadeseri anano i Rehobo, mokoledo to Soba, tempono ilako momuleo pabawano a ngkoro Eparata.

⁴ Inso ndi Hadadeseri, i Daudi montawa asa nsowu ka pitu etu sorodadu mpengara ka rua pulu nsowu sorodadu mpelempa ngkaru. Ka i'amba i Daudi tumena ira mentotopio ia wenggo-wenggono luwuno ngara pompae kareta, sine pinetorea asa etu.

⁵ To Arami inso i Damasi me'aiwa ira mentulungio i Hadadeseri, mokoledo to Soba, sine ipepate ira i Daudi rua pulu ka orua nsowu to Arami atuudo.

⁶ Ka i'amba i Daudi numaa ira luwuno sorodadu mpodagai a witado to Arami i Damasi. To Arami mpetenunu ira ndi Daudi ka asalakono pompesombaako peki'ue. Ondae i Ue moweeakono poponangia ndi Daudi isuamo koa ilako.

⁷ Umarino atuu i Daudi umala ira kanta wulaa anu pinakedo atano i Hadadeseri, ka i'amba wawao i Yerusale.

⁸ Inso i Beta ka i Berotai, luwuno kotano i Hadadeseri, i mokole Daudi mo'ala mala hadio ntu'u.

⁹ Mansano i Toi, mokoledo to Hamati, rumongeo nine i Daudi inangiomo luwuno sorodaduno i Hadadeseri,

¹⁰ I Toi tumenao i Yorami, anano anu tama, lumako ndi mokole Daudi mompohawe tabea ka pau pompelangkai ndi onae, hangano ipeteaakonomo i Hadadeseri ka inangio. Hangano, i Hadadeseri andio mararu ipeteaakono i Toi. I Yorami mowawa mperupa-rupa parewa salaka, wulaa ka mala.

¹¹ Parewa andiodo ipakosiomo mokole Daudi tia-Do i Ue, saru salaka ka wulaa anu pinakosinomo inso a luwuno tongku anu ninanginomo,

¹² inso a nto Arami, to Moabi, inuleno i Amoni, to Pelisiti, to Amale ka inso a mpinomuru anu inala inso ndi Hadadeseri anano i Rehobo, mokoledo to Soba.

¹³ Kanandiomo itelele neeno i Daudi. Tempono ipekule, ipepate ira hopulu ka oalu nsowu to Edomi i Lembono Me'ohia.

¹⁴ Ka i'amba numaa ira luwuno sorodadu mpodagai i wita Edomi. A luwuno wita Edomi inaa ira sorodadu mpodagai, ranta luwuno wita Edomi mpetenunu ndi Daudi. Ondae i Ue moweeakono ponangia ndi Daudi isuamo koa ilako.

Anu mo'ini anggaa a poparentaano i Daudi

¹⁵ Kanandiomo i Daudi moparenta a luwudo to Isaraeli. I Daudi tumeahakono moleoa ka menteea a luwuno tongkuno.

¹⁶ I Yoabi anano i Seruya, gagi tadulako; i Yosapa anano i Ahiludi gagi puu pompekaria arataa;

¹⁷ i Sadoki anano i Ahitubi ka i Ahimele anano i Abiata gagi sando mpesomba a pomparentaa; i Seraya gagi puu mpoburi a pomparentaa;

¹⁸ i Benaya anano i Yoyada gagi tadulakodo to Kereti ka to Peleti. Luwuno ana ntamano i Daudi gagi sando mpesomba.