2 Samueli 7 - Wunta Mempori

Pedandi-Do i Ue mongkona inuleno i Daudi anu ta mowangu Raha Mpesombaa

¹ Tempono mokole rodoomo i rahado, ka Ondae i Ue moweeakono rodoa inso a luwuno iwalino limbu-limbu,

² motae ira mokole ndi nabi Nata, ”Kitaomo, mo'ia aku a raha inso a ngkeu arasi, kahinaano Burua-Do Ue Ala kongko i larono tenda.”

³ Motae i Nata ndi ondae mokole, ”Moiko, weweuomo luwuno anu ino'aroamu, hangano Ondae i Ue kumongkomiko.”

⁴ Sine, wongi koa mbo'u atuu haweomo Pau-Do i Ue ndi Nata, kanandio,

⁵ ”Lakomo, pauakono tetenaa-Ku i Daudi, ’kanandiomo Pau-Do i Ue: Menteeke komowangu raha ta po'ianga-Ku?

⁶ Nahi Kuhori mo'ia a laro raha tumampu'u Kutaate ira to Isaraeli inso i wita Masiri hawe oleo andio. Wela Aku melakopi ka mo'ia a laro ngkema gagi po'iangaa-Ku.

⁷ Maupo isua Kupelakopi saru luwuno to Isaraeli, hori Akuke mompohawe pau a asa mia petewawa Isaraeli, anu Kuparentao pakambi ira bawaa-Ku Isaraeli, kanandio: Tembio ka nahi mpowangua-Kune raha inso a ngkeu arasi?’

⁸ Onaemo pu'uno, asalakono ka upauo kanandio ndi tetenaa-Ku i Daudi, Kanandiomo pau-Do Ueno luwuakoano: Ongkuemo anu umalako inso a ntonga mpada, tempono da upompakambi asa bawaa bembe bimba, gagi petewawado bawaa-Ku Isaraeli.

⁹ Kukongkomikomo maupo isua ulako ka mokotampula ira luwuno iwalimu inso i aromu. Aku weweuo neemu telele kana needo luwuno mia langkai potorodo i tolino.

¹⁰ Aku mompakosi asa po'iangado bawaa-Ku Isaraeli ka Kunaa ira, ranta ka domerodo mpiha a mpo'iangado ondaedo ka nami dontelelu. Luwuno mia lambaha nami ira bobarasai ira kana i ndi'ipua,

¹¹ mompu'u Kupotoro ira puu mpobitara a bawaa-Ku Isaraeli. Aku moweeakomiu rodoa inso a luwuno iwalimu. Dopauakomu mbo'u i Ue: Ondae i Ue Ira wanguo inulemu anu moparenta.

¹² Tewala haweomo tempomu ka komohawe pena-naa me'asaako ira uempu'umu, ka Aku wanguo inulemu lembuino, ana ngkoroimu, ka Aku mokomorosoo poparentaano.

¹³ Onaemo anu ta mowangu raha tiano nee-Ku ka Aku mokomorosoo kadera poparentaano ranta nahina tampulaano.

¹⁴ Ongkue ta gagi Amano ka onae ta gagi ana-Ku. Ba moweweu anu sala, Aku humukuakono tuko tiado mia ka ponsepi anado mia.

¹⁵ Sine pompehohawa-Ku nahi ta olai te'inso ndi onae, kana anu Kupoko'olaiomo inso ndi Saulu, anu Kuliahakonomo inso i aromu.

¹⁶ Inulemu ka poparentaamu ta moroso ranta nahina tampulaano i aro-Ku, kadera poparentaamu ta moroso ranta nahina tampulaano.”

¹⁷ Menunu kana pau andio ka menunu kana pongkitaa andio, kanatuumo ipepau i Nata ndi Daudi.

Pekakai po'undeno i Daudi

¹⁸ Ka i'amba mokole Daudi mewinso i larono ka ipentoro i aro-Do i Ue. Ipotae, ”Isemake ongkue andio, oo Ue Ala, ka isemake somboriku, ranta ka Iwawa aku hawe olai andio?

¹⁹ Mongkona andio mbo'u da makura a pongkita-Miu, oo Ue Ala ranta mepau Komiu mbo'u mongkona somborino tetenaa-Miu a tempo anu da olai. Po'ineeomo andio gagi pontisodo mia, oo Ue Ala.

²⁰ Hapa mbo'u anu ta pinokopauno i Daudi ndi Omiu? Ito'orio tetenaa-Miu andio, oo Ue Ala?

²¹ A mpau-Miu ka menunu po'eheno aroa-Miu moweweu-Komiumo luwuno wineweu anu langkai andio ka Ipohaweakonomo tetenaa-Miu andio.

²² Nde langkai Komiu, oo Ue Ala. Nahina kana Omiu ka nahina Ue Ala susua sangkadio Omiu montonda luwuno anu kimerongeakono birimami.

²³ Isema kana bawaa-Miu Isaraeli, asa tongku i tolino, anu Ue Alano lumako ta tumolosio gagi bawaa-Do? Mohawe Komiu nee-Miu hangano luwuno wineweu-Miu anu langkai ka mongkokongiri ndi ondae, ka sumaari ira luwuno tongku ka pinesombaido anu susua inso i arodo bawaa-Miu anu tinolosi-Miumo inso i Masiri.

²⁴ Ipokoroso iramo bawaa-Miu Isaraeli gagi bawaa-Miu ranta nahina tampulaano, ka Omiu, oo Ue, gagi Ue Alado.

²⁵ Kanandio-andio, oo Ue Ala, dandi anu pinau-Miu mongkona tetenaa-Miu andio ka somborino I'ihiiomo ranta nahina tampulaano ka Iweweuomo kana anu dinandi-Miu atuu.

²⁶ Nee-Miu ta gagi langkai ranta nahina tampulaano ka dompotae mia, ’Ondae Ueno luwuakoano, onaemo Ondae Ue Alado to Isaraeli.’ Inuleno i Daudi, tetenaa-Miu andio ta moroso i aro-Miu.

²⁷ Hangano Omiu, Ueno luwuakoano, Ue Alado to Isaraeli, Ipokomengkaaomo a ntetenaa-Miu andio, kanandio: Aku wanguo inulemu. Onaemo pu'uno tetenaa-Miu andio mosiaomo mekakai ndi Omiu.

²⁸ Oo Ue Ala, butu Omiu Ue Ala ka luwuno pau-Miu pine'ala-ala; Idandiomo mongkona anu moiko andio a ntetenaa-Miu.

²⁹ Po'ineeomo ka Ironsoo somborino tetenaa-Miu andio kai kongko mpiha i aro-Miu ranta nahina tampulaano. Hangano Omiu, oo Ue Ala, Omiumo anu mepau ka hangano poronso-Miu somborino tetenaa-Miu andio rinonso ranta nahina tampulaano.”