2 Samueli 5 - Wunta Mempori

I Daudi gagi mokole a luwuno Isaraeli

¹ Luwudo to Isaraeli aiwa ndi Daudi i Heberoni ka dompotae, ”Omami mpe'asa rea ka ihi saru omiu.

² I ndi'ipua itempono i Saulu meparenta ndi omami, omiumo anu metewawa a luwuno peleludo sorodadu to Isaraeli. Ondae i Ue mepau iramo ndi omue: Omiumo anu ta pakambi ira bawaa-Ku Isaraeli, ka omiumo anu ta gagi petewawado Isaraeli.”

³ Ka i'amba me'aiwa iramo luwuno mia memota'u Isaraeli mpe'aro ndi ondae mokole i Heberoni. Ka i'amba mokole Daudi moweweu pedandia saru ondae i Heberoni i aro-Do i Ue. Dome'urapio i Daudi gagi mokoledo to Isaraeli.

⁴ Tinuwuno i Daudi tolu pulu nta'u, tempono kai gagi mokole. Ipoparenta pato pulu nta'u tehineno.

⁵ I Heberoni ipoparenta a nto Yehuda opitu nta'u ka onoo wula. I Yerusale i poparenta tehineno tolu pulu ka otolu nta'u a nto Isaraeli ka Yehuda.

I Daudi Rumontuo Yerusale inso a to Yesbusi

⁶ Ondae mokole ka luwuno miado melako i Yerusale, sumapoi ira to Yebusi, palilino wita atuu. Mpotae ira ndi Daudi, ”Omue nahi kopolio mewinso i ndi'ai! Mia morawu ka mia tiimpa karu ta koa mokosaari komiu!” Pinewowolodo i Daudi nahi ta mokompewinso i ndi'ai.

⁷ Sine i Daudi mongko'alao bente pekorahakoa Sioni, onaemo kota Daudi kanandio-andio.

⁸ Oleo atuu motaeomo i Daudi, ”Isema anu ta numangi ira to Yebusi asalakono mewinso telalo a nsalano uwoi, ka ihaweo mia timpa karu ka mia morawu.” Aroano i Daudi umo'aliaako ira. Onaemo atuu kai pinau, ”Mia morawu ka mia tiimpa karu nahi moiko dompewinso a raha mpesombaa.”

⁹ I Daudi rodo a bente pekorahakoa atuu ka ineeakono: Kota Daudi. Ipokomorosoo limbu-limbu, mompu'u inso i Milo hawe i larono.

¹⁰ Kopaba-pabawano i Daudi, hangano Ondae i Ue, Ue Alano luwuakoano kumongkomio.

Langkanae ka somborino i Daudi

¹¹ I Hirami, mokole i Tirusi, montena mia lumako ndi Daudi ka mo'oliwi mbo'u keu arasi, puu mpo'angga keu ka puu mpo'angga watu. Domewanguo langkanaeno i Daudi.

¹² Ipokonto'oriomo i Daudi nine Dopakosiomo i Ue onae gagi mokoledo to Isaraeli ka Dopokolangkaiomo poparentaano tiano Isaraeli, bawaa-Do.

¹³ I Daudi mo'ala mbo'u ba opia samburue ka kombiano inso i Yerusale, mansano hawe inso i Heberoni. Da hinao mbo'u anano i Daudi tama ka beine anu pine'anaako.

¹⁴ Ndiomo needo luwuno anano anu pine'anaako i Yerusale: I Samua, i Soba, i Natani, i Salomo,

¹⁵ i Yibahari, i Elisua, i Nepegi, i Yapia,

¹⁶ i Elisama, i Eliada, ka i Elipele.

Ponangino i Daudi a nto Pelisiti

¹⁷ Domerongeomo to Pelisiti nine i Daudi inurapiomo gagi mokoledo to Isaraeli. Ka do'amba melako luwu to Pelisiti ira merakoo i Daudi. Rumongeo mongkona atuu i Daudi lumakoomo a bente pekorahakoa.

¹⁸ Mansado mehawe to Pelisiti ka dompensiarawo i lembono Repaimi,

¹⁹ I Daudi mo'ema pontiso ndi Ondae i Ue, ”Nde asalakonoke aku lumako umewai ira to Pelisiti? Nde Komiu meweengako irake a ngkaeku?” Pau-Do i Ue ndi Daudi, ”Lakomo, nde asalakono Aku meweengako ira to Pelisitii a ngkaemu.”

²⁰ Ka i'amba haweomo i Daudi i Baala-Perasimi ka i Daudi numangi ira i ra'ai. Ipotae, ”Dorumpaiomo i Ue iwaliku i aroku, kana uwoi anu morumpai.” Onaemo ka domeneeakono mia po'ianga atuu Baala-Perasimi.

²¹ To Pelisiti atuu mebintao luwuno lahumoado i ra'ai, ka i'amba i Daudi ka luwuno miano mewawao.

²² Mansano to Pelisiti melako mbo'u ka dompesiarawo i Lembono Repai,

²³ I Daudi mo'ema pontiso ndi Ondae i Ue ka Dopepau, ”Si melako, sine impelempamo mpetanggolili hawe i bungkudo, ranta kau pokosapoi ira, te'aro inso a laro ngkeu murubei.

²⁴ Tewala urongeo unino lempa a untuno laro ngkeu murubei atuu, asalakono ka upelelu, hangano i tempo atuu Ondae i Ue meluarako Iramo metea i aromiu numangi ira sorodadu to Pelisiti.”

²⁵ I Daudi weweuo kana parenta-Do i Ue ndi onae, ka inangi ira to Pelisiti, mompu'u inso i Geba hawe umpeda i Geseri.