2 Samueli 4 - Wunta Mempori

I Isibose pinepate

¹ Tempono irongeo ana ntamano i Saulu nine mateomo i Abinere i Heberoni, tetadiomo mosiano, ka mpondende iramo luwudo to Isaraeli.

² Ana ntamano i Saulu hinao orua ira petewawa sorodadu. Anu ko'asa neeno i Ba'ana ka anu ko'orua neeno i Rekabi, orua ira pada anano i Rimoni, to Be'eroti, to Benami. Be'eroti tewinso a witado to Benami;

³ To Be'eroti i ndi'upua mpolai melako i Gitaimi ka gagi mia mehawe i ra'ai hawe oleo andio.

⁴ I Yonata, ana ntamano i Saulu, hinao aasa anano ntama anu nahi pokompelempa. Tempono tinuwuno olima nta'u, lele mongkona i Saulu ka i Yonata hawe inso i Yisireli. Tempo atuu puu mpete'iano tumandeo ka ipelulu, sine hangano peluluno madara nana'ote atuu tedonta ka tiimpa karuno. Neeno i Mepibose.

⁵ I Rekabi ka i Baana, anano i Rimoni, to Beeroti, melako, ka domehawe a rahano i Isibose tempono oleo tedoa mokula, tekonai moturi ntonga oleo.

⁶ Engkeno puu mpodagai pewowa raha atuu mongkokoturi ka itekoturi tempono mompokorina gandu. Temponomo atuu i Rekabi ka i Baana mokompewinso i larono.

⁷ Tempono dopewinso a raha atuu, i Isibose tekonai moturi a mpoturiano i bolongkono. Dotoboo ranta kai mate, ka dopoleo uluno. Uluno atuu dowawao ka dopelempa asa wongi telalo a nsala Araba-Yarade.

⁸ Uluno i Isibose domewawao ndi Daudi i Heberoni ka dompotae ndi ondae mokole, ”Ndiomo uluno i Isibose, anano i Saulu, iwalimiu, anu montooakono penaamiu. Oleo andio Ondae i Ue sumuloakomiumo ueku mokole, ndi Saulu ka inuledo.”

⁹ Sine i Daudi sumangkio i Rekabi ka i Baana pepaekompono, anano i Rimoni, to Beero, ipotae ndi ondae, ”A Nee-Do i Ue anu tuwu, anu tumolosiomo penaaku te'inso a luwuno masusaa!

¹⁰ Horio hinao mia mowawa lele ndi ongkue, ’i Saulu mateomo!’ Ka potaeno onae anu mowawa lele moiko. Mia atuu kurakoo ka kupepateo i Sikila. Kanatuumo tambo anu kuweeakono hangano lele atuu.

¹¹ Tamoako kanandio-andio, tempono mia melambaha mpompepate asa mia mentee, a mpoturiano i rahano onaeno, kana'umpe ka nahi aku tumuntuo reano inso ndi omiu ka rumopu komiu inso i tolino?”

¹² Umari atuu i Daudi parentao miano mepate ira. Kae ka karudo pinole, ka i'amba wata ngkoroido domendoeo i wiwi limbo i Heberoni. Sine uluno i Isibose dome'alao ka ikinaburu a ngkaburuno i Abinere i Heberoni.