2 Samueli 3 - Wunta Mempori

¹ Pe'iwaliado somborino i Saulu ka somborino i Daudi tehine lahi; i Daudi kotehi-tehineno komoro-morosono, sekono somborino i Saulu kotehi-tehineno komole-molemano.

Luwuno ana ntamano i Daudi

² I Heberoni, mehina iramo anano i Daudi. Anu aka onaemo i Aminoni, anano i Ahinoa, beine to Yisire'eli.

³ Anu ko'orua i Kileabi, anano inso ndi Abigai, beine to Karameli, umari kombiano i Naba. Anu ko'otolu onaemo i Abisalo, anano inso ndi Maaka, ana beineno i Talamai mokole i Gesuri.

⁴ Anu ko'opaa onaemo i Adonia, anano inso ndi Hagita, anu ko'olima i Sepatia, anano inso ndi Abitali.

⁵ Anu ko'onoo onaemo i Yitireami, anano inso ndi Egela, kombiano i Daudi. Luwuno andio anano i Daudi anu pine'anaako i Heberoni.

I Abinere me'alaako ndi Daudi

⁶ Tempono kai gagi pe'iwaliado somborino i Saulu ka somborino i Daudi, i Abinere komoro-morosono pabawano a laro nsomborino i Saulu.

⁷ I Saulu hinao samburueno meneeako i Risipa, anano i Aya. Motae i Isibose ndi Abinere, ”Tembio kau pewowaliakono samburueno amaku?”

⁸ Tekudaomo ntu'u i Abinere hangano pauno i Esibose atuu, ipotae, ”Nde dahu aku ke anu me'alaako ndi Yehuda? Ranta kanandio-andio kongkoku metenunu a somborino i Saulu, amamu, a mpepaekompono ka luwuno sambe'eno. Nahi aku mo'ineeko tedonta a ngkaeno i Daudi, sine kanandio-andio upokonsala aku hangano beine atuu.

⁹ Po'ineeomo Ondae Ue Ala humukuo mobea i Abinere, tendeano laluaopo mbo'u, ba nahi kuweweuo ndi Daudi kana anu dinandi-Do i Ue saru mesumpa ndi onae:

¹⁰ lumimbao poparentaa inso a nsomborino i Saulu ka mowangu kadera poparentaano i Daudi a nto Isaraeli ka Yehuda, inso i Dani hawe i Bereseba.”

¹¹ I Isibose nami pokompepau mbo'u mau te'asampali pau ndi Abinere, hangano doitono ndi onae.

¹² Tempo koa mbo'u atuu i Abinere montena mia lumako ndi Daudi saru pe'oliwi, ”Isemake me'ueo wita andio? Weweuomo pedandia saru ongkue, ka akumo tumulungiko wawa ira luwu to Isaraeli me'alaako ndi omue.”

¹³ Sumangki i Daudi, ”Moiko, aku moweweu pedandia saru omue, butu asa ku'emao ndi omue. Sipo'arahako kumitao rupaku sangkadio uwawao i Mikali, ana beineno i Saulu, se'eluno ba u'aiwa me'aro ndi ongkue.”

¹⁴ I Daudi montena mbo'u mia lumako ndi Isibose, anano i Saulu, saru pe'oliwi, ”Wee'akumo beineku i Mikali, anu kuhaweakono asa etu kuli petindiado to Pelisiti.”

¹⁵ Ka i'amba i Isibose montena mia umalao beine atuu inso a ntamano, i Palitieli anano i Laisi.

¹⁶ Tamano mengese kontongaano melempa merongaakono ka itondao hawe i Bahurimi. Motae i Abinere ndi onae, ”Pekulemo.” Ka i'amba mekuleomo.

¹⁷ I Abinere saru mia memota'udo to Isaraeli nteriso ira, ipotae, ”Tehineomo impontoo ka i Daudi gagi mokolemiu.

¹⁸ Kanandio-andio imeweweuomo, nde Ondae i Ue mepau Iramo mongkona i Daudi, kanandio: Molalo tetenaa-Ku i Daudi Aku kumadudui ira bawaa-Ku Isaraeli inso a ngkaedo to Pelisiti ka inso a ngkaedo luwuno iwalino.”

¹⁹ I Abinere mepauako ira mbo'u to Benami, ka i'amba i Abinere lumako tepopauakono i Daudi i Heberoni mongkona luwuno anu pinemoikodo to Isaraeli ka luwuno to Benami.

²⁰ Itempono i Abinere hawe ndi Daudi i Heberoni saru rua pulu mia, i Daudi moweweuakono i Abinere pelimbua ka luwuno mia anu merongaakono.

²¹ Motae i Abinere ndi Daudi, ”Moikoomo kupepatinda lumako pumpu ira luwuno to Isaraeli ndi omiu ueku mokole, ka dompoweweu pedandia saru omiu ka omiu gagi mokole a luwuno anu inehemiu.” Ka i'amba i Daudi mo'ineeo i Abinere lumako temoi-moiko.

I Abinere ipepateo i Yoabi

²² Luwuno atano i Daudi ka i Yoabi da'iaopo dompekule inso a mposapoia ka mpowawa hadio pinomuru. Sine i Abinere nami perongaakono mbo'u i Daudi i Heberoni, nde i Daudi ipo'ineeo lumako temoi-moiko.

²³ Tempono i Yoabi ka luwuno sorodaduno mpekule iramo, domempauakonomo i Yoabi, kanandio, ”I Abinere anano i Nere aiwaomo ndi ondae mokole ka dopo'ineeomo mokole kai lako temoi-moiko.”

²⁴ Ka i'amba i Yoabi lumako ndi ondae mokole, kai potae, ”hapake anu wineweumiu? I Abinere haweomo ndi omiu; sine tembio ka ipo'ineeo lumako mpena kanatuu?

²⁵ Manasa ito'oriokoa i Abinere anano i Nere atuu! Onae aiwa ta mopo'ooko ka ito'orio lelumiu saru luwuno anu wineweumiu.”

²⁶ Umarino atuu i Yoabi meluarako bintao i Daudi ka ipontena mia tumonda lembuio i Abinere. Ka do'amba mpokuleo inso a nsumuru Sira nahi to'orio i Daudi.

²⁷ Tempono i Abinere mekule i Heberoni, i Yoabi umoluakono lumako i horino, i larono pewowa langkai atuu, kana-kana ta mepauakono butu ondaedo. I ra'ai itoboo kompono i Abinere ranta kai mate, hangano reano i Asaeli, uaino.

²⁸ Ba opia tempo lembuino, tempono irongeo i Daudi mongkona atuu, metaeomo, ”Ongkue ka poparentaaku nahina salano i aro-Do i Ue a reano i Abinere anano i Nere ranta nahina tampulaano.

²⁹ Po'ineeomo atuu ipinopotembiako a uluno i Yoabi ka a luwuno pe'etuno. Po'ineeomo a inuleno i Yoabi nahi hori otu-otu mia anu moluarako nana, mia anu haki ngkuli mesaki, tama anu gagi puu pongkoloro, mia anu mateako ponai ba anu makuraako kaanga.”

³⁰ Kanandiomo i Yoabi ka i Abisai, uaino, dopepateo i Abinere, hangano ipepateomo i Asaeli, uaido, i Gibeo a laro mpeteaa.

³¹ Motae i Daudi ndi Yoabi ka a luwuno sorodadu anu merongaakono, ”Impeberisakonomo sangkamiu ka impokonaomo sawu mpo'inomba ka imposabangimo i arono wata ngkoroino i Abinere.” Ondae mokole Daudi melempa i bungkuno kati wata ngkoroi.

³² Tempono domengkaburuo i Abinere i Heberoni, mengese iramo mokole tedoa meroku a ngkaburuno i Abinere ka luwuno sorodadu atuu mpengese.

³³ Ondae mokole sumabangio i Abinere saru pau-pau andio, ”Nde asalakonoke i Abinere ta mate kana mateno mia benge-benge?

³⁴ Kaemu nahi pinongu ka karumu nahi rinante. Omue mate, kana asa mia mate i arono mia lambaha.” Luwuno sorodadu mpengeseio komero-merokuno.

³⁵ Luwuno mia hawe mempopandeio i Daudi ka ipongkaa roti da meene, sine i Daudi mesumpa, ”Po'ineomo Ondae Ue Ala humuku aku mobea, tendeano laluaopo mbo'u, tewala napi sumoo oleo mongkaa aku roti ba hapamo koa.”

³⁶ Luwuno palili mengkitao mongkona atuu ka dompemoikoo, kana luwuakoano anu wineweudo mokole dompemoikoo luwuno palili.

³⁷ I oleo atuu domento'oriomo luwu palili ka luwudo to Isaraeli nine mateno i Abinere anano i Nere, komba tinoodo mokole.

³⁸ Ka i'amba mokole motae a luwuno atano, ”Nahi mento'orio ke nine oleo andio mateomo asa petewawa, petewawa langkai i Isaraeli?

³⁹ Maupo umari akumo inurapi gagi mokole, ongkue kanandio-andio me'aroa akumo, sine mia atuudo, luwuno anano i Seruya, tedoa kupelambaha ira. Po'ineeomo Ondae i Ue sumuloo wineweuno mia anu mosa'o menunu kana mosa'ono.”