2 Samueli 24 - Wunta Mempori

Pohuku a mpodoaa palili

¹ Tekuda-Do i Ue tensila mbo'u a nto Isaraeli. Doteahakono i Daudi umewai ira, pau-Do, ”Lakomo, doa iramo to Isaraeli ka to Yehuda.”

² Ka do'amba motae mokole ndi Yoabi ka luwuno tadulako sorodadu anu merongaakono, ”Imelakomo, sumompo ira luwuno suku Isaraeli inso i Dani hawe i Bereseba. Doa iramo palili, ka kuto'oriokoa hadiodo.”

³ Motae i Yoabi ndi ondae mokole, ”Po'ineeomo Ondae i Ue, Ue Alamiu, mokohadio ira palili meluka asa etu ka ikitaakono matamiu mokole. Nde tembio mokole ka inehemiu kanandio?”

⁴ Sine, parentado mokole ndi Yoabi ka luwuno tadulako sorodadu, asalakono i wineweu. Ka i'amba i Yoabi ka luwuno tadulako sorodadu melako inso i arodo mokole dumoa ira luwuno palili Isaraeli.

⁵ Domensakiomo Koro Yarade, ka do'amba mpompu'u inso i Aro'eri ka kota anu mo'ia i tonga-tongano lembono tetutu i Gadi ka Yaeseri.

⁶ Inso i ra'ai mehawe iramo i Gileadi ka i Kadesi i witado to Heti. Mpotilalo ira ka domehawe i Dani ka inso i Dani mpewolili tetutu i Sidoni.

⁷ Inso i ra'ai mehawe iramo i Tirusi, kota bente, saru a luwuno kotado to Hewi ka to Kana'a, ka i'amba pokotompaano i Bereseba, i selatano Yehuda.

⁸ Kanatuumo domelako mesompoo luwuno wita atuu ka dompekule i Yerusale umarino osio wula ka rua pulu oleo.

⁹ I Yoabi mohaweo hasilino podoaa palili ndi ondae mokole. I olodo to Isaraeli hinao halu etu nsowu mia moroso ntu'u anu mokompobuta ponai ka lima etu nsowu to Yehuda.

¹⁰ Sine me'o'oleomo i Daudi, mansano dumoa ira palili. Motae i Daudi ndi Ondae i Ue, ”Tedoa akumo tehala hangano kuweweuomo anu andio. Kanandio-andio, oo Ue, po'ineeomo ka Ipoko'olaio salano tetenaa-Miu, hangano moweweu akumo anu tedoa benge-benge.”

¹¹ Mansano mewangu i Daudi mo'oruno, haweomo pau-Do i Ue ndi nabi Gadi, puu mpongkitano i Daudi, kanandio,

¹² ”Lakomo, pauakono i Daudi: Kanandiomo pau-Do i Ue: otolu rupa Kupo'aroo ndi omue. Binikiomo aasa inso i olono, ka Aku weweuo ndi omue.”

¹³ Ka i'amba i Gadi aiwa ndi Daudi ka ipauakono, ipotae, ”Nde opitu nta'u mokoninggoa ta umaluko i witamu, ke otolu wula upolai inso a iwalimu anu lumuluko, ke otolu oleo hakilele i witamu? Kanandio-andio, timbangaomo temoiko ntu'u, sangki hapa anu asalakono kupohaweo ndi Ondae anu tumena aku.”

¹⁴ Sumangki i Daudi ndi Gadi, ”Tedoa aku mompemasusa. Po'ineeomo tontedonta a ngkae-Do i Ue hangano langkai ntu'u pompehohawa-Do, sine siimo kutedonta a ngkaedo mia.”

¹⁵ Dopotiiomo i Ue hakilele a nto Isaraeli mompu'u mo'oru hawe tempo anu pinakosi. Onaemo ka domemate pitu pulu nsowu mia inso a tongku atuu, inso i Dani hawe i Bereseba.

¹⁶ Mansano tumandeo mala'eka kaedo te'aro i Yerusale ta rumopuo, me'o'ole Ira i Ue a masolaa atuu. Ka i'amba pau-Do a mala'eka anu tekonai rumopuo tongku atuu, ”Sompoomo! Potiio kaemu.” Tempo atuu mala'eka-Do i Ue mo'ia umpeda a ponsesaano i Arauna, to Yebusi.

¹⁷ I Daudi mepau ndi Ondae i Ue, tempono ikitao mala'eka anu tekonai mompotii haki a tongku atuu, kanandio, ”Ongkue koa anu tehala, ongkue koa anu sala, sine hapamoke anu wineweudo luwuno bimba-Miu andio? Po'ineeomo kae-Miu humuku aku saru luwuno somboriku.”

Meda pontunua pesomba winangu ka pohuku menaa-naa

¹⁸ A oleo atuu i Gadi aiwa ndi Daudi ka ipotaeakono, ”Lakomo, wanguo meda pontunua pesomba tia-Do i Ue a mposesaano i Arauna, to Yebusi.”

¹⁹ Lumakoomo i Daudi, menunu kana pinauno i Gadi, kana anu Doparentaakono i Ue.

²⁰ Mansano i Arauna mengkita i totono, ikita ira mokole saru luwuno pegawaido aiwa tepohaweakono. Meluarakoomo i Arauna, ka ipenggolontuu ndi ondae mokole rupano hawe a wita.

²¹ Mesikeno i Arauna, ”Hapake tinoomiu ueku mokole kai aiwa ndi atamiu andio?” Sumangki i Daudi, ”Aku umolio ponsesaa andio inso ndi omue, saru tinoo mowangu meda pontunua pesomba ndi Ondae i Ue, ka ipenaa-naa koa pohuku andio umalu ira palili.”

²² Ka i'amba motaeomo i Arauna ndi Daudi, ”Moikoomo ueku mokole i'alao ka ipesombaakono hapa anu ipemoikoo. Ndio iramo sapi tiano pesomba tinunu, luwuno dopi ponsesaa ka parewa pasanga sapi gagi keu pontunu.

²³ Luwuno andio, oo mokole, ipeweengakono i Arauna ndi omiu mokole.” Motae mbo'u i Arauna ndi ondae mokole, ”Po'ineeomo Dopemoiko komiu i Ue, Ue Alamiu.”

²⁴ Sine dopotae mokole ndi Arauna, ”Osi'i, mentee ntu'u aku umolio inso ndi omue montonda olino. Nahi aku mompesombaako ndi Ondae i Ue, Ue Alaku, pesomba tinunu anu nahi ku'owahio.” Ka i'amba i Daudi umolio ponsesaa ka sapi atuudo lima pulu sikala salaka.

²⁵ I ra'ai i Daudi mowangu meda pontunua pesomba ndi Ondae i Ue ka mompesombaako pesomba tinunu saru pesomba tekaduduia. Do'induomo i Ue pekakai tiano wita atuu ka pohuku menaa-naaomo umalu ira to Isaraeli.