2 Samueli 23 - Wunta Mempori

Pauno i Daudi anu pokotompa

¹ Ndiomo pauno i Daudi pokotompa, ”Pauno i Daudi anano i Isai pauno mia anu pinokomantande, mia anu inurapi-Do Ue Alano i Yako, puu mpenani po'unde-unde anu pinesanaado Isaraeli.

² Penaa-Do Ue Ala mepau telalo ndi ongkue, pau-Do kongko a eloku.

³ Ondae Ue Alado Isaraeli mepau, torukuno watu Isaraeli mepau ndi ongkue: Tewala asa mia moparenta mia a moleoano, moparenta ka doitoako Ira Ue Ala,

⁴ onae mewanta kana towea i tempono mo'oru, mo'oru anu nahi menseru, anu ba umari usa weweuo tesosangkilo ewo mongura i wita.

⁵ Komba kanatuuke somboriku i aro-Do Ue Ala? Hangano moweweu Iramo pedandia anu nahi ta bali saru ongkue, luwuno pinalele ka manasa ta tinonda. Hangano luwuno tekaduduia ka pinerorohiku, komba Ondaeke anu weweuo kai mentumba?

⁶ Sine mia melambaha, luwuno kana rui pinetadiako. Ka menteeano nahi pinoko'alaako kae.

⁷ Mia anu dumanggi ira, asalakono ipatindaakono koroino asa mpole labu ke tangkeno kansai. Ondae ira mepingko ntetunu a mpo'iangado!”

Sorodaduno i Daudi

⁸ Ndiomo needo luwuno sorodaduno anu tumondao i Daudi: i Isabaali, to Hakemoni, petewawado Otolu Mia Mosia. Onae umioo kansaino mo'ewai halu etu mia anu pinepate i larono asa mpeteaa.

⁹ Umarino onae, i Eleasari anano i Dodo anano asa to Ahohi. Onae asa mia inso a Otolu Mia Mosia atuu. Onae merongaakono i Daudi, tempono do'ewai ira to Pelisiti, anu mpepumpu i ra'ai ira mpetea, kahinaano to Isaraeli mponsuka iramo.

¹⁰ Onae mentade mompepate to Pelisiti ranta kai mokendo kaeno ka metako a mponaino. Ondae i Ue moweeako ira ponangia langkai a oleo atuu. Palili mpekule tumonda ira butu mporontu parewado mia anu pinepate.

¹¹ Tudano onaemo i Sama anano i Age, to Harari. Tempo atuu to Pelisiti mpepumpu i Lehi isua ihinawe asa mpo'ianga lere bukeako wua inahu motaha. Tempono dompolai sorodadu inso i arodo to Pelisiti,

¹² onae mentade i tongano lere atuu. Ikorahakono ka inangi ira to Pelisiti. Kanatuumo Dopoweeako ira i Ue ponangia anu langkai.

¹³ Rangkuomo tempo sumowi, hawe iramo otolu mia inso a tolu pulu petewawa bawaado sorodadu tepohaweakono i Daudi, umpeda Kunepo Adulami, kontongaado asa bawaa sorodadudo to Pelisiti mpekema i Lembono Repaimi.

¹⁴ I tempo atuu i Daudi kongko a bente pekorahakoa ka sorodadu mpodagaido to Pelisiti mekongko i Beteleme a tempo anu mengkena.

¹⁵ I Daudi mingki ntu'u mo'inu, ipotae, ”Ba mansa hinao mia anu mowee aku mo'inu uwoi inso a nsumuru umpeda a mpewowa langkai Beteleme!”

¹⁶ ka i'amba otolu mia mosia atuu mansa mpewinso a mpekemaado to Pelisiti. Mpotambu ira uwoi inso a nsumuru umpeda pewowa langkai Beteleme, mentandeo ka mewawao ndi Daudi. Sine i Daudi nahi behe uminuo, tendeano ipesombaakono gagi pesomba tinawa ndi Ondae i Ue,

¹⁷ Motae, ”Nahi aku ntu'u weweuo, Oo Ue! Kombake andio reado mia anu melako iramo ka menta'oo penaado?” Onaemo pu'uno nahi behe uminuo. Onaemo anu wineweudo otolu mia mosia atuu.

¹⁸ I Abisai, uaino i Yoabi anano i Seruya, onaemo petewawado tolu pulu mia atuu. Onaemo anu mo'ioo kansaino mo'ewai tolu etu mia anu mate tinobono. Onae telele neeno kana Otolu Mia Mosia.

¹⁹ Menteeano onae anu pinelangkai ntu'u i olodo tolu pulu mia atuu. Onae gagi petewawado, sine nahi pengkenaako ira Otolu Mia Mosia.

²⁰ Umarino atuu, i Benaya anano i Yoyada inso i Kabeseeli, asa mia anu moroso ntu'u ka langkai wineweuno anu moiko. Onae mompepate orua pongkiari, singa inso i Moabi. Onae horio metii a laro aa ka mepateo asa singa, i asa oleo seru baku.

²¹ Ipepateo mbo'u asa to Masiri anu ondau ka langkai koroino. A ngkaeno to Masiri atuu hinao kansai, sine i'aropiakono tuko. Irontuo kansai inso a ngkaeno to Masiri atuu, ka i'amba mepateakono kansaino onaeno.

²² Onaemo anu wineweuno i Benaya anano i Yoyada. Onae telele neeno kana Otolu Mia Mosia

²³ Onae lalu pinelangkai i olodo tolu pulu mia atuu, sine nahi pengkenaako ira Otolu Mia Mosia. I Daudi motoroo gagi petewawado puu mpodagaino.

²⁴ I Asaeli, pepaekompono i Yoabi, tewinso i olodo tolu pulu mia atuu. Tudano: I Elihanani anano i Dodo inso i Beteleme;

²⁵ i Sama, to Harodi; i Elika to Harodi;

²⁶ i Helesi to Paleti; i Ira anano i Ikesi, to Tekoa;

²⁷ i Abieseri, to Anatoti; i Mebunai, to Husa;

²⁸ i Salamoni, to Ahohi; i Maharai, to Netopa;

²⁹ i Helebi anano i Ba'ana, to Netopa; i Itai anano i Ribai inso i Gibea, to Benami;

³⁰ i Benaya, to Piratoni; i Hidai inso i Nahale-Gaasi;

³¹ i Abialibo, to Beti-Araba; i Asamaweti, to Bahurimi;

³² i Eliahaba, to Saaliboni; i Yasieni, to Guni; i Yonata;

³³ i Sama, to Harari; i Ahiami anano i Sarari, to Harari;

³⁴ i Elipele anano i Ahasabai, to Maaka; i Eliami anano i Ahitopeli, to Gilo;

³⁵ i Heserai, to Karameli; i Paerai, to Arabi;

³⁶ i Yigali anano i Natani inso i Soba; i Bani, to Gadi;

³⁷ i Seleki, to Amoni; i Naharai, to Beeroti; puu mpowawa parewa peteano i Yoabi anano i Seruya;

³⁸ i Ira, to Yeteri; i Garebi, to Yeteri;

³⁹ i Uria, to Heti. Luwuno tolu pulu ka opitu mia.