2 Samueli 22 - Wunta Mempori

Penani po'undeno i Daudi

¹ I Daudi mepauako pauno penani andio ndi Ondae i Ue i tempono Dopotolaomo i Ue inso a ngkaedo luwuno iwalino ka inso a ngkaeno i Saulu.

² Ipotae, ”Oo Ue, pongku watuku, bente pekorahakoaku ka pongkaduduiku,

³ Ue Alaku, torukuno watuku, petaloiaku, kantaku, tandu tekaduduiku, kota benteku, polaiaku, puu pongkaduduiku. Omiumo kumadudui aku inso a pobobarasaia.

⁴ Unde Iramo i Ue, pebooliku. Onaemo ka kutekadudui inso a iwaliku.

⁵ Menteeano ilimbu akumo bomba matea, luwuno mowo masolaa i alu akumo,

⁶ iwewesi akumo koloro po'iangado mia mate, luwuno pesalaa matea ninaa i aroku.

⁷ Tempono ongkue a laro masukaraa, mebooli aku ndi Ondae i Ue, ndi Ondae Ue Alaku kupebooli. Ka Dorongeo suaraku inso i raha-Do, pebooliku mepetulungi Dorongeo.

⁸ Ka i'amba melelu ka reendeomo tolino, luwuno pentoroano langi mpondidi-ndidi ka mpelelu, hangano tensila tekuda-Do.

⁹ Ahu membombo inso a enge-Do, api mesilawi meluarako inso a nganga-Do, waro api melanga meluarako inso ndi Ondae.

¹⁰ Dolupio langi, ka Dopetii, worikidi mo'ia i toto pelengkaru-Do.

¹¹ Ondae mesawi a ngkerubi, ka Do'amba menee, ka tengkita i wawono panino angi.

¹² Ka Doweweuo wongi mpusu lumimbu Ira gagi laika-Do: uwoi usa anu wongi-wongi, seru anu mokapa.

¹³ Hangano wantano koliki i aro-Do waro api gagi melanga.

¹⁴ Ondae i Ue rurundu inso i langi, Anu Tedoa Mantande mompoporonge suara-Do.

¹⁵ Dopotola ira pana, ranta Dosiarawo ira, Dopotola ira koliki, ranta ka donterawo-rawo.

¹⁶ Ka i'amba tengkitaomo luwuno totono tahi, luwuno empehino wawontolino tesungke hangano pau tekuda-Do i Ue, hangano pepuurino penaa inso a enge-Do.

¹⁷ Dotehawe aku inso a mantandeano, umala aku, padii aku inso a mowo.

¹⁸ Dopotola aku inso a iwaliku anu moroso, inso a luwuno mia anu umo'aliaakune, hangano kupemoroso ira lahi.

¹⁹ Domentowoki aku a oleo urasa'oku, sine Ondae i Ue onaemo pehondaaku.

²⁰ Dowawa aku meluarako a mpo'ianga malua, Dokadudui aku, hangano Dopekona aku.

²¹ Ondae i Ue weweu aku menunu saru menteeku. Mombalo Ira ndi ongkue menunu saru memporino kaeku,

²² hangano kutondao mpiha sala-Do i Ue ka nahi ku'olai inso ndi Ondae Ue Alaku kana mia mosa'o gauno.

²³ Hangano luwuno songka-Do kutondao, ka inso a pompakosi-Do nahi kupansia.

²⁴ Melelu aku nahina tataano ndi Ondae, ka kudagaio koroiku kasi kupoweweu anu sala.

²⁵ Onaemo ka Dosuloo i Ue ndi ongkue menunu saru menteeku, menunu saru memporiku a pongkita-Do.

²⁶ A mia anu metenunu, Ikongkomi ira, a mia anu nahina wineweuno mosa'o, Ipehohawa ira,

²⁷ a mia anu mempori, Ikadudui ira, sine a mia anu molengku, Ilelengkupi ira.

²⁸ Tongku anu tepokonsii Ikadudui ira, sine mata-Miu umewaio luwuno mia anu mompelangka-langkai, ka Ipokongkodei ira.

²⁹ Hangano Omiumo huluku, Oo Ue, ka Omiu Ue pansario wongi-wongiku.

³⁰ Hangano saru Omiu, mosia aku umaropio mia memosa'o, saru Ondae Ue Alaku, mosia aku mompelonsoki bente.

³¹ Ondae Ue Ala pelempa-Do tedoa moleo. Pau-Do i Ue atuu mempori. Ondae gagi kantado luwuno mia anu mpepekadudui ndi Ondae.

³² Nde isemake Ondae Ue Ala, sangkadio Ondae i Ue, ka isemake torukuno watu sangkadio Ondae Ue Alato?

³³ Ondae Ue Ala, Ondaemo anu gagi polaiaku anu moroso ka weweuo salaku moleo.

³⁴ Anu weweuo karuku kana karuno rusa ka weweu aku mentade a pongku wita.

³⁵ Anu paguruo kaeku metea, ranta tokiaku mokolongkuo pana mala.

³⁶ Ipowee aku mbo'u kanta pongkadudui-Miu, ka moiko-Miu weweu akumo langkai.

³⁷ Ipowee aku po'ianga pelempaaku anu malua, ka wuku laleku moroso mpiha.

³⁸ Kulampui ira iwaliku ranta ka kuropu ira, ka nahi kupewolili ba napi kupingko ira.

³⁹ Kupokopingko ira ka kurawo-rawo ira, ranta nahi dompewangu mbo'u, ka ntebangku ira i totono karuku.

⁴⁰ Ibooakonomo roso mpetea tongaku. Ipokompetuundu ira i totono pabawaku mia anu mentade umewai aku.

⁴¹ Iweweuo iwaliku mpolai inso ndi ongkue, luwuno mia anu umo'aliaakune, kupepate ira.

⁴² Mpebooli ira mpepetulungi, sine nahina anu kumadudui ira, mpebooli ira ndi Ondae i Ue, sine nahi Dosangki ira.

⁴³ Kugili ira motutu ntu'u kana awu wita, ku'isa ira ka kulolanda ira kana rege a nsala.

⁴⁴ Ka Ipotola aku inso a pengengea tongkuku, Ipekaria aku gagi petewawado luwuno tongku, tongku anu nahi kuto'orio gagi ataku.

⁴⁵ Luwuno mia hawe mpetuundu mpesile'i ndi ongkue, da'iaopo irongeo birido, mpetuundu ira ndi ongkue.

⁴⁶ Luwuno mia hawe momite ntelusa ka mpondende ira mpeluarako inso i kota pekorahakoado.

⁴⁷ Ondae i Ue tuwu! Unde-undeomo torukuno watuku, ka Dopinelangkaimo Ue Ala torukuno watu tekaduduiaku,

⁴⁸ Ondae Ue Ala, moweweu Iramo ponsuloa tiaku, anu wawa iramo luwuno tongku i totono pabawaku,

⁴⁹ ka anu motola akumo inso a iwaliku. Ka Itande akumo numangi ira anu mpentade umewai aku. Ipotola akumo inso a luwuno mia anu mompokonsii.

⁵⁰ Onaemo pu'uno ka kupenaniako penani po'unde-unde ndi Omiu, Oo Ue, i olodo luwuno tongku, ka aku menaniako penani po'unde-unde tiano nee-Miu.

⁵¹ Dopoweeakono tekaduduia langkai a mokole anu pinontoro-Do, ka mopokitao pompehohawa-Do a mia anu inurapi-Do, ndi Daudi ka a ana'ueno ranta nahina tampulaano.”