2 Samueli 21 - Wunta Mempori

To Gibeo ka somborino i Saulu

¹ Tempono poparentaano i Daudi gagiomo mokoninggoa otolu nta'u metonda-tonda tehineno, ka i'amba i Daudi lumako mompesikenoako pontiso-Do i Ue. Mepau Iramo i Ue, ”Mongkona pasua rea hinao ndi Saulu ka somborino, hangano ipepate iramo to Gibeo.”

² Ka i'amba mokole moboi ira to Gibeo ka ipotaeako ira. To Gibeo atuu nahi dontewinso to Isaraeli, sine tewinso a toreado to Amori ka maupo to Isaraeli mpesumpa iramo ndi ondae, i Saulu montoo ta rumopu ira a laro po'anggaano gagi tiado to Isaraeli ka Yehuda.

³ I Daudi motaeako ira to Gibeo atuu, ”Hapake anu aku mokoweweuakomiu ka saru hapake kupoweweu pontolosi, kai meronsoo pusaka-Do i Ue?”

⁴ Ka do'amba mpotae to Gibeo atuu ndi onae, ”Komba mongkona wulaa ka salaka peweweua mami saru i Saulu ka somborino, ka komba mbo'u peweweua mami mompepate asa mia i olodo to Isaraeli.” Sine motae i Daudi, ”Hapake anu inehemiu aku weweuakomiu?”

⁵ Umarino atuu mpepau iramo ndi ondae mokole, ”Inso a mia anu mingki rumopu kami ka anu montoo ta rumopu kami, ranta nahi kimpohawe po'ianga maupo isuamokoa i wita Isaraeli,

⁶ po'ineeomo ipeweengakono opitu mia ana ntamano ndi omami, ka kimendoe ira i aro-Do i Ue i Gibeo, i pongku wita-Do i Ue.” Umarino atuu motae iramo mokole, ”Aku koa meweengako ira.”

⁷ Sine i Mepibose anano i Yonata anano i Saulu dopo'ineeo mokole kai tuwu, hangano sumpa a nee-Do i Ue mo'ia i olodo, i olono i Daudi ka i Yonata anano i Saulu.

⁸ Ka do'amba mokole umala ira i Arimoni ka i Mepibose, orua ira ana ntamano i Saulu anu pine'anaakono i Risipa ana beineno i Aya, ka mbo'u olima ira ana ntamano i Merabi ana beineno i Saulu, amado nana'ote atuu i Adirieli anano i Barisilai, to Mehola.

⁹ Ipeweengako ira a ngkaedo to Gibeo anu ndumoe ira i wawono pongku wita, i aro-Do i Ue. Opitu ira atuu mate mperonga-ronga. Mehinuku mate iramo i oleo pompu'uano tempo sumowi, a pompu'uano sumowi jelai.

¹⁰ Ka i'amba i Risipa ana beineno i Aya mo'ala asa lewe kampili ta po'iangano ka iwileo a wawo watu kara, inso a pompu'uano tempo sumowi ranta ka ite'uwu uwoi inso i langi a wawo wata ngkoroido. Nahi po'inee ira manu-manu i laro meene merangkuhio wata ngkoroido tempono meene, ke kondehora a ntobu tempono wongi.

¹¹ Pinauako i Daudi mongkona hapa anu wineweuno i Risipa ana beineno i Aya, samburueno i Saulu atuu.

¹² Lumakoomo i Daudi umala ira wukuno i Saulu ka wukuno i Yonata, anano, inso a mpalili kota Yabesi-Gileadi, anu memponakoomo luwuno wuku atuu inso a ntanalapa i Beti-Sani, po'iangaado to Pelisiti ndumoe ira, a oleo to Pelisiti numangio i Saulu i Giliboa.

¹³ Inso i ra'ai iwawa ira wukuno i Saulu ka wukuno i Yonata, anano. Luwuno wukudo mia anu mendinoe atuu ipumpu ira mbo'u.

¹⁴ Domengkaburuo wukuno i Saulu ka i Yonata, anano, i wita Benami, i Sela, a ngkaburuno i Kisi, amano ka iweweuo luwuno anu iparentaako ira mokole. Umarino atuu, Ondae Ue Ala uminduo pekakai tiano wita atuu.

Peteaa umewai ira to Pelisiti

¹⁵ Peteaa gagi mbo'u i olodo to Pelisiti ka to Isaraeli. I Daudi melungka saru luwuno miano ka dompetea umewai ira to Pelisiti. Mokendoomo i Daudi.

¹⁶ I Yisibi-Benobi, anu tewinso inuleno i Rapa saru kansai anu mobeano tolu etu sikala mala ka mompesamba sangka mpetea anu wo'ohu, motae takoa mokompepateo i Daudi.

¹⁷ Sine i Abisai anano i Seruya aiwa tumulungio i Daudi, isapoio to Pelisiti atuu ka ipepateo. I tempo atuu luwuno miano i Daudi tedoa mpo'ema ndi onae, ”Siimo mbo'u ilako metea saru omami, kasi ropu inuledo to Isaraeli.”

¹⁸ Umarino atuu gagi mbo'u peteaa umewai ira to Pelisiti i Gobi. I tempo atuu i Sibikai, to Husa, mepateo i Sapi, anu tewinso inuleno i Rapa.

¹⁹ Ka i'amba gagi mbo'u peteaa umewai ira to Pelisiti i Gobi. I Elihanani anano i Yaare-Oregimi, to Beteleme atuu, mepateo i Golia, to Gati atuu, anu tangke kansaino kana keu pongkalulu sawu hinoru.

²⁰ Ka i'amba gagi mbo'u peteaa i Gati. I ra'ai hinao asa mia anu ondau koroino, kaeno ka karuno singge mewunga ntoniso onoo: rua pulu ka opaa luwuno. Mia mbo'u andio inuleno i Rapa.

²¹ Inggari-nggari ira to Isaraeli, ka i'amba i Yonata anano i Simea akano i Daudi, mepateo.

²² Opaa ira mia andio inuleno i Rapa i Gati. Ondae memate a ngkaeno i Daudi ka luwuno miano.