2 Samueli 2 - Wunta Mempori

I Daudi gagi mokoledo to Yehuda

¹ Ba'opia tempo lembuino, i Daudi mo'ema pontiso ndi Ondae i Ue, ”Asalakono aku lumako ke a aasa kota i Yehuda?” Pau-Do i Ue ndi onae, ”Lakomo.” Motaeomo i Daudi, ”Isuake asalakono ba kulako?” Pau-Do, ”i Heberoni.”

² Lumakoomo i Daudi i ra'ai, saru orua ira kombiano: i Ahinoa beine to Yisireli ka i Abigai umari kombiano i Naba to Karameli.

³ I Daudi wawa ira mia anu tumondao singge mia saru somborino. Mpo'ia ira a kota-kota Heberoni.

⁴ Ka do'amba mehawe to Yehuda, ka dome'urapio i Daudi i ra'ai gagi mokoledo to Yehuda. Ka i'amba domempauakono i Daudi kanandio, ”To Yabesi-Gilea domengkaburuomo i Saulu.”

⁵ Onaemo i Daudi ka ipontena mia lumako a nto Yabesi-Gilea saru pe'oliwi, ”Doronsokomiumo i Ue, hangano impopokitaomo pompehohawa ka petenunumiu a ue miu i Saulu, ka imengkaburuo.

⁶ Kanandio-andio, po'ineeomo Ondae i Ue tumisoakomiu pompehohawa ka pongkongkomi-Do ndi omiu. Ongkue mbo'u aku moweweu moikoa anu mengkena ndi omiu, hangano imeweweuomo anu kanatuu.

⁷ Kanandio-andio impokorosoomo aroamiu ka imegagimo mosia. Lano uemiu i Saulu mate iramo, sine dome'urapi akumo to Yehuda gagi mokoledo.”

Pe'iwaliado miano i Daudi ka miano i Saulu

⁸ I Abinere anano i Nere, tadulako sorodaduno i Saulu, i'alaomo i Isibose, anano i Saulu ka iwawao i Mahanai.

⁹ I Abinere montoroo gagi mokoledo to Gileadi ka to Asuri, to Yisireeli, to Eparai ka to Benami, ka a luwuno to Isaraeli.

¹⁰ Isibose anano i Saulu tinuwuno pato pulu nta'u tempono igagi mokoledo to Isaraeli ka ipoparenta orua nta'u tehineno. Sine to Yehuda mentondao i Daudi.

¹¹ Tehineno i Daudi moparenta i Heberoni a nto Yehuda, opitu nta'u ka onoo wula.

¹² I Abinere anano i Nere ka luwuno atano Isibose, anano i Saulu mpelungka inso i Mahanai melako i Gibeo.

¹³ I Yoabi, anano i Seruya ka luwuno atano i Daudi mpelungka ira koa mbo'u. Pada ira ntepo'aro i limbo Gibeo. Anu asa ntia mo'ala po'ianga a wiwino limbo ngkoramai ka asa ntiano mbo'u a wiwi limbo ngkoraane.

¹⁴ Motaeomo i Abinere ndi Yoabi, ”Po'inee iramo mangalitau dompentade ka metea i aroto.” Sumangki i Yoabi, ”Moiko.”

¹⁵ Mpentade ira ka domelako ka dinoa hadiodo: hopulu ka orua mia sarungkoroido suku Benami ka i Isibose anano i Saulu, ka hopulu ka orua mia inso a miano i Daudi.

¹⁶ Ka do'amba singge me'inio uluno tarono ka ipentoboakono ponaino a kompono tarono ranta ka dontebangku mperonga-ronga. Kanandiomo po'ianga atuu nineeako Helikati-Hasurimi, anu mo'ia i Gibeo.

¹⁷ A oleo atuu gagiomo peteaa langkai. I Abinere ka to Isaraeli ntenangi ira a miano i Daudi.

¹⁸ I Yoabi, i Abisai, ka i Asaeli, otolu ira ana ntamano i Seruya, kongko ira i ra'ai. I Asaeli magasi peluluno kana lagiwa a mpada.

¹⁹ I Asaeli lumuluo i Abinere ka nahi pewolili i koana ke i manggali tumondario i Abinere.

²⁰ I Abinere mewolili i bungkuno ka ipotae, ”Omueke atuu Asaeli?” Sumangki, ”Humbee, mentee.”

²¹ Motae i Abinere ndi onae, ”Pansiamo i koana ba i manggali, rakoomo te'asa mia inso a mangalitau atuudo ka alaomo sangka peteano.” Sine, i Asaeli nahi behe melimba inso a pepoluluano.

²² I Abinere motae mbo'u ndi Asaeli, ”Penaa-naamo lumulu aku. Tembio ka aku mepateko? Kana'umpe ka aku mokokitao rupano i Yoabi pepaekompomu?”

²³ Sine i Asaeli nahi behe menaa-naa. Ka i'amba i Abinere tumoboakono kansai kompono i Asaeli ranta kansai atuu lompahi i bungkuno. Tebangku ka mate i tu'ai. Luwuno mia anu hawe a mpo'ianga tebangkuano ka mateano i Asaeli atuu mpenaa-naa i tu'ai.

²⁴ Sine i Yoabi ka i Abisai lumuluo i Abinere. Itempono sumoomo oleo, hawe iramo umpeda Pongku Ama anu tepo'aro saru pada one Gibeo.

²⁵ Inuleno i Benami mpepumpu i bungkuno i Abinere gagi asa bawaa ka mpo'ala po'ianga i asa pongku wita.

²⁶ Mebooli i Abinere ndi Yoabi, ”Nde asalakonoke ponai ta mompepate mpiha? Nahi uto'orioke nine tedoa mopa'i anu ta gagi lembuiano? Hawe te'ipia mbo'u ke nahi ubehe parenta ira sorodadumu ka dompenaa-naa lumulu ira pepaekompomu?”

²⁷ Sumangki i Yoabi, ”A nee-Do Ue Ala anu tuwu, ande-andeno nahi upepau, asalakono sorodaduku nahi ira mpenaa-naa lumulu ira pepaekompodo hawe mo'oru.”

²⁸ Ka i'amba i Yoabi puurio tawuwua ka luwuno sorodadu mpenaa-naa. Nami dolulu ira mbo'u, to Isaraeli ka nami dompetea.

²⁹ Asa wongi i Abinere ka luwuno miano mpelempa ntelalo i Araba-Yarade ka sumakio koro Yarade. Mpelempa ira mpiha asa mo'oru, ka domehawe i Mahanai.

³⁰ I Yoabi mekule mansano menaa-naa lumuluo i Abinere. Tempono ipumpu ira luwuno sorodadu, mengkaaomo hopulu ka osio mia inso a miano i Daudi tetadi saru i Asaeli.

³¹ Sine miano i Daudi mpompepate tolu etu ka nomo pulu mia inso a nsuku Benami, i olono luwuno miano i Abinere.

³² Domentandeo wata ngkoroino i Asaeli ka domengkaburuo a laro ngkaburuno amano i Beteleme. Ka i'amba i Yoabi ka luwuno miano mpelempa asa wongi ka domehawe i Heberoni, tempono meeneomo.