2 Samueli 19 - Wunta Mempori

¹ ka i'amba pinauako i Yoabi, ”To'oriomo, ondae mokole kontongaado mengese ka mompemasusa hangano i Abisalo.”

² Ponangia oleo andio gagi po'inombodo luwuno sorodadu, hangano i oleo atuu domerongeo sorodadu: Ondae mokole masusa aroa hangano anado.

³ Mpenoro-noro ira sorodadu mpewenso a kota oleo atuu, kana sorodadu anu mo'o'anu, mpekule ira mpenoro-noro hangano mpolai inso a mpeteaa.

⁴ Ondae mokole tumutuwio rupado ka doponsabangi meroku, ”Anaku Abisalo, Abisalo, anaku, anaku!”

⁵ I Yoabi mewinso tepohaweako ira mokole a mpo'iangado, ka ipotae, ”A oleo andio iweweu ira luwuno atamiu tekoko'ii, kahinaano domengkaduduiomo penaamiu ka penaado anamiu beine, penaado beinemiu ka penaado samburuemiu.

⁶ Ipehohawa ira mia anu umo'aliaakomiu, ka umo'aliaako ira mia anu mehohawa komiu! A oleo andio ipopokitao, nine luwuno tadulako sorodadu ka ana buano nahina tududo ndi omiu. Tendeano kuto'orio oleo andio, ande-andeno i Abisalo da tuwu ka omami memate luwu oleo andio, asalakono atuu pinemoikomu.

⁷ Onaemo, ipewangumo, ipeluarako ka ipepaumo mokorodoo aroado luwuno atamiu. Aku mesumpa a nee-Do i Ue, ba nahi ipeluarako, nahina maupo te'asa mia anu ta mo'ia saru omiu wongi andio. Anu kanandio ta laluaopo sumolangi komiu sekonopo luwuno masolaa anu pinembasaimiumo mompu'u tempo imongura hawe kanandio-andio.”

⁸ Ka do'amba mokole mentoro a mpewowa langkai. A luwuno sorodadu pinauako kanandio, ”Ka imento'oriomo, ondae mokole mentoro a mpewowa langkai.” Ka i'amba luwuno sorodadu me'aiwa ntepohaweako ira mokole. Tempo atuu mpolai iramo to Isaraeli, singge melako a ngkemado.

Teweweuno pekuleno i Daudi

⁹ Luwuno palili inso a luwuno suku Isaraeli nteposisala, dompotae, ”Ondae mokole dopotola kitamo inso a ngkaedo iwalito, ondaemo anu kumadudui kita inso a ngkaedo to Pelisiti. Kanandio-andio, molai iramo inso i laro kota hangano i Abisalo.

¹⁰ Sine i Abisalo anu tome'urapiomo ta parenta kita, mateomo a mpeteaa. Kanandio-andio, tembio ka nahi mpoweweu hapa-hapa ka dopinokule mokole?”

¹¹ Pepopaudo luwuno to Isaraeli andio hawe ndi ondae mokole a mpo'iangado. Onaekoa, ondae Mokole Daudi me'oliwi ndi Sadoki ka ndi Abiata, sando mpesomba atuudo, ”Ipepaumo a luwudo mia memota'u Yehuda, kanandio: Tembio kai asalakono omiu anu gagi pokotompa ta wawa ira mokole mekule a langkanaeno?”

¹² ”Omiumo pepaekompoku, omiumo pe'etuku! Tembio kai asalakono omiu anu gagi pokotompa ta wawa ira mokole mekule?

¹³ Pauakono mbo'u i Amasa: Komba pe'etuku ke omue? Po'ineeomo Ondae Ue Ala humuku aku mobea, maupo lalua mbo'u, tewala omue nahi ugagi mpiha tadulako sorodaduku umeuo i Yoabi.”

¹⁴ Kanatuumo ipopandei ira luwuno to Yehuda, ranta ka dontepo'asa aroa. Ka do'amba mpe'oliwi ndi ondae mokole, ”Ipekulemo saru luwuno atamiu.”

Pekuledo mokole – i Simei tumotowo ira

¹⁵ Mekule iramo mokole ka dohawe i Koro Yarade. Kontongaano atuu to Yehuda melako i Giliga tumutowo ira mokole ka dumagai ira sumakio Koro Yarade.

¹⁶ I Simei anano i Gera, to Benami inso i Bahurimi atuu, liu aiwa merongaako ira luwuno to Yehuda tumotowo ira mokole Daudi.

¹⁷ Hinao mbo'u asa nsowu mia inso i wita Benami merongaakono. Onaemo i Siba, atado somborino i Saulu, ka hopulu ka olima ira ana ntamano saru rua pulu ira atano merongaakono modadu melako a Ngkoro Yarade mese'elungi ira mokole,

¹⁸ telalo a mpo'ianga pesakia ta sumakiako ira somborido mokole ka mpoweweu ira anu moiko i kinita. Mansano ira mesakiako mokole a Ngkoro Yarade, i Simei anano i Gera menggolontu i arodo mokole.

¹⁹ Ipotaeako ira mokole, ”Siimo ueku ipototoiakune salaku. Siimo ipewowoloo sala anu wineweuno atamiu andio a oleo peluarakoamiu inso i Yerusale ka siimo ueku mokole inaao i laro aroamiu.

²⁰ Hangano ito'oriomo atamiu andio, nine tehala akumo. Onaemo a oleo andio, ongkuemo anu amba-ambano aiwa inso a luwuno inuleno i Yusupu aiwa tumotowo komiu ueku mokole.”

²¹ Ka i'amba i Abisai anano i Seruya sumangkio, ”Kombake anu kanandio i Simei tekona ihinuku mate, hangano onae montotonaaomo mia anu inurapi-Do i Ue?”

²² Sine ipotae i Daudi, ”Hapake urusuaku saru omiu, hei anano i Seruya, ranta omiu ia oleo andio gagi iwaliku? Tekonake a oleo andio asa mia hinuku mate i Isaraeli? Kombake kuto'orio ntu'u nine oleo andio ongkuemo mokoledo to Isaraeli.”

²³ Ka do'amba motae mokole ndi Simei, ”Omue nahi komate.” Ka do'amba mokole mesumpa ndi onae.

I Mepibose tepohaweako ira mokole

²⁴ I Mepibose anano i Saulu mbo'u tumotowo ira mokole. Nahi wo'ohio karuno nahi atorao danggono ka nahi lomboo sangkano mompu'u oleo lakodo mokole ranta ka dopekule da tuwu ira.

²⁵ Mansano hawe inso i Yerusale tumotowo ira mokole, mesikeno ira mokole ndi onae, ”Tembio ka nahi ulako merongaakune, Mepibose?”

²⁶ Sumangki, ”Oo ueku mokole, ipopo'oo akumo ataku. Hangano hieno mompewowolo atamiu andio: Aku mokonao lampi a ngkalideku, Ka kupesawikio ka kulako merongaakomiu mokole, hangano atamiu andio tiimpa karu.

²⁷ Onae mompauomo anu nahi mentee mongkona atamiu andio ndi omiu ueku mokole. Sine omiu ueku mokole kana mala'eka-Do Ue Ala; Iweweuomo hapa anu ipemoikoo.

²⁸ Hangano luwuno somborido amaku lano ondaemo mia anu tekona ihuku mate ira ueku mokole. Sine omiu ueku ipakosiomo atamiu andio i olodo mia anu mpongkaa mpe'asa meda saru omiu. Hapapo mbo'u anu ta inemaku ndi omiu mokole?”

²⁹ Dopotae mokole ndi onae, ”Hapa mbo'u tuduno upopauo teweweumu? Umariomo kuputusio: Omue saru i Siba asalakono ipetiao lere atuu.”

³⁰ Sine motae i Mepibose ndi ondae mokole, ”Po'ineeomo i'alao luwu, hangano omiu ueku mokole mekule komiu da tuwu.”

I Barisilai metonda moronto ira mokole

³¹ I Barisilai, to Gileadi atuu, haweomo mbo'u inso i Rogelimi ta sumakio Koro Yarade meronga saru ondae mokole ka dopo'inee ira lumako hawe raane.

³² I Barisilai mota'uomo ntu'u, halu pulu nta'u tinuwuno. Ipatindao kaanga tiado mokole tempono dopo'ia i Mahanai, hangano onae mia tedoa mompoli.

³³ Motae iramo mokole ndi Barisilai, ”Petondamo merongaakune. Aku koa mekakaakomu a mpo'iangaaku i Yerusale.”

³⁴ Sine i Barisilai sumangki ira mokole, ”Nde opia nta'upo kutuwu, kai asalakono aku lumako merongaa komiu mokole i Yerusale?

³⁵ Kanandio-andio tinuwuku halu pulu nta'umo. Da aku polioke mosisalao anu moiko ka anu mosa'o? Da ipolioke atamiu andio menamio hapa anu kinaano ka ininuno? Da aku mokorongeoke suarado tama ka beine ba dompenani? Hapa mbo'u tuduno atamiu andio gagi bebeatimiu ueku mokole?

³⁶ Atamiu andio melempa sarai koa lumako i asatowano Koro Yarade merongaakomiu mokole. Tembio omiu mokole ka ipoweweu anu moiko andio ndi ongkue?

³⁷ Po'ineeomo atamiu andio ka ipekule, ka kumate koa i kotaku, umpeda kaburudo amaku ka ineku. Sine ndiomo atamiu i Kimihami, po'ineeomo itondakomiu mokole. Iweweuomo ndi onae hapa anu pinemoikomiu.”

³⁸ Ka do'amba motae mokole, ”Moikoomo i Kimihami tumonda aku. Aku weweuo ndi onae hapa anu pinemoikomu ka luwuno anu inehemu inso ndi ongkue, aku weweuakomu.”

³⁹ Ka do'amba luwuno palili mensakio Koro Yarade. Ondae mbo'u mokole sumaki umarido woo-wooo i Barisilai ka dopetompa ndi onae. Ka i'amba i Barisilai mekule a mpo'iangano.

To Isaraeli ka to Yehuda mperorontuako mokole

⁴⁰ Ondae mokole motilalo melempa lumako i Giliga ka i Kimihami metonda saru onae. Luwuno sorodadu Yehuda saru entongano sorodadu Isaraeli tumonda ira mokole.

⁴¹ Sine luwuno to Isaraeli aiwa ndi ondae mokole ka dompotae, ”Tembio pepaekompo mami, to Yehuda, mpolaisako ira mokole ka dowawa ira i asatowano Koro Yarade saru somborido ka luwuno miado i Daudi anu tumondao?”

⁴² Luwuno to Yehuda sumangki ira to Isaraeli, ”Hangano ondae mokole pe'etu mami! Tembio kai ntekuda hangano anu andio?” Nde mpongkaa kami inso a pompoweedo mokole? Nde mpohawe kami me'uraake?

⁴³ Mesangki ira to Isaraeli a nto Yehuda, ”Omami anu lalu pabawa sekono omiu ndi ondae Mokole Daudi, hangano omami hopulu suku. Tembio ka impe'uru-uru kami? Komba omamike anu amba-ambano me'emao ka dopinokule mokole mami?” Sine pepaudo to Yehuda merokuopo sekono pepaudo to Isaraeli.