2 Samueli 18 - Wunta Mempori

Mateno i Abisalo

¹ I Daudi paresao baresido sorodadu anu merongaakono, ka i'amba mompotoro petewawa sorodadu asa nsowu ka petewawa sorodadu asa etu ndi ondae.

² Ka i'amba i Daudi tumena ira sorodaduno melako mpetea, tia otoluno, petewawado i Yoabi, tia otoluno, petewawado i Abisai anano i Seruya, uaino i Yoabi, ka tia otoluno mbo'u, petewawado i Itai, to Gati. Ka i'amba mokole motaeako ira sorodaduno, ”Ongkue mbo'u aku lumako merongaakomiu.”

³ Sine dompotae sorodaduno, ”Siimo ilako metea. Hangano, tewala mansa kami mpolai, nahi ira mperio kami. Maupo entongano inso ndi omami mate, nahi ira mperio kami. Sine omiu mengkena kana hopulu nsowu mia inso ndi omami. Onae koa moikoopo itulungi kami inso i laro kota.”

⁴ Mepau iramo mokole ndi ondae, ”Hapa anu pinemoikomiu aku weweuo.” Ka do'amba mokole mentade i horino pewowa langkai ka luwuno sorodadu mpelempa mpeluarako, montonda sorodadu asa etu ka asa nsowu.

⁵ Ondae mokole parenta ira i Yoabi, i Abisai ka i Itai, kanandio, ”Pekakaakono i Abisalo, mia mongura atuu temoiko hangano ongkue.” Luwuno sorodadu merongeo tempono ondae mokole parenta ira luwuno petewawa sorodadu mongkona i Abisalo.

⁶ Sorodadu atuudo melako i pada umaropi ira to Isaraeli, ka gagiomo peteaa a Tobu Eparai.

⁷ I ra'ai sorodadu Isaraeli ntenangi a luwuno miano i Daudi, ka a oleo atuu gagiomo i ra'ai te'uwua rea anu mongkokongiri: rua pulu nsowu mia mate.

⁸ Peteaa i ra'ai meluehi hawe a luwuno wita atuu. Sorodadu anu memate a ntobu atuu hadioopo sekono anu mateako ponai oleo atuu.

⁹ Nahi kookooo i Abisalo tepohaweako ira miano i Daudi. I Abisalo atuu mompesawiki bagali. Tempono bagali atuu telalo i totono sampa keu tarabanti langkai anu tepo'ena, tekai uluno a ngkeu tarabanti atuu, ranta ka itendoe i olono langi ka tolino, sine bagali anu pinesawikino melulu mpiha.

¹⁰ Aasa mia kumitao, ka i'amba pauakono i Yoabi, ipotae, ”Kukitao i Abisalo tendoe a ngkeu tarabanti.”

¹¹ Motae i Yoabi a mia anu pauakono atuu, ”Ukitaomo, tembio ka nahi upepateo a mpo'iangano atuu, kai kombole-mbole a wita? Bakanaano aku moweeko hopulu doi salaka ka aasa sulepe.”

¹² Sine ipotae mia atuu ndi Yoabi, ”Maupo kupohawe asa nsowu lempe salaka a ngkaeku, nahi aku motiio kaeku umewaio anano mokole atuu hangano kimerongeo omami mami ondae mokole parenta komiu ka mbo'u ndi Abisai ka ndi Itai, kanandio: Kaduduiomo i Abisalo, mia mongura atuu, hangano ongkue.

¹³ Tendeano, ba aku moweweu anu mosa'o, ka ninaano nahina anu tewuni ndi ondae mokole, kometangkoro.”

¹⁴ Motae i Yoabi, ”Nahi kubehe montadi-tadi tempo saru omue kanandio.” Ka i'amba mo'ala otolu pando ka ipetoboakono a radano i Abisalo anu damenaa, i olono sampa-sampa keu tarabanti atuu.

¹⁵ Ka i'amba hopulu ata anu mpowawa sangka peteano i Yoabi, melimbuo i Abisalo ka domentunduhio ranta mate.

¹⁶ Umarino atuu, i Yoabi puurio tawuwua ka sorodadu tumampu'u mpenaa-naa lumulu ira to Isaraeli, hangano i Yoabi i'onto ira sorodaduno.

¹⁷ Dome'alao wata ngkoroino i Abisalo ka dompetadiakono a laro aa anu langkai a ntobu atuu. I wawono mpowangu ira howuno watu anu langkai ntu'u. Luwuno to Isaraeli mpolai, singge melako a ngkemano.

¹⁸ Tempono da ituwu, i Abisalo mowanguomo tuguno anu kanandio-andio kongko i Lembono Mokole, hangano potaeno, ”Nahina ana ntamaku anu motilaloakono rorambeno neeku.” Ineeakono tugu atuu montonda neeno onaeno. Hawe oleo andio tugu atuu pinewua Tugu rorambeno i Abisalo.

Lele mateano i Abisalo ka pompemasusano i Daudi

¹⁹ ka i'amba motaeomo i Ahima'asi anano i Sadoki, ”Po'ineeomo aku melulu mohaweo lele atuu ndi ondae mokole, nine Doweeako iramo i Ue moleoa saru motola ira inso a ngkaedo iwalido.”

²⁰ Sine motae i Yoabi ndi onae, ”Oleo andio si omue anu gagi powawa lele. A oleo susua moikoomo omue anu mompohawe lele, sine a oleo andio moikoopo si pompohawe lele, hangano ana ntamado mokole mateomo.”

²¹ Ka i'amba motae i Yoabi a asa mia to Etiopia, ”Lakomo, pauako ira mokole hapa anu kinitamu.” To Etiopia atuu menggolontu mesomba i arono i Yoabi, ka i'amba melulu lumako.

²² I Ahima'asi anano i Sadoki motae mbo'u ndi Yoabi, ”Maupo hapa anu gagi, i'eheakunemo melulu tumonda lembuio to Etiopia atuu.” Sine motae i Yoabi, ”Tembio kai inehemu muda'a lumako, anaku? Kombake omue nahina lele anu mokome'urako?”

²³ Sangkino, ”Maupo hapa anu gagi, aku lumako.” Motae i Yoabi ndi onae, ”Tewala kanatuu lakomo.” Meluluomo i Ahima'asi lumaloo Lembono Yarade, ranta kai pese'elungio to Etiopia atuu.

²⁴ Tempo atuu i Daudi tekonai mentoro i olono orua pewowa langkai, kontongaano puu mpodagai mewuatako i wawono pewowa langkai, a benteno kota. Mansano mengkikita, tengkitaomo asa mia aiwa melulu asa-asano.

²⁵ Puu mpodagai atuu pauako ira mokole. Ka do'amba motae mokole, ”Tewala asa-asano, hinao lele anu winawano.” Kontongaano umpeda mia atuu,

²⁶ puu mpodagai atuu kumitao asa mia anu susua aiwa melulu. Ka i'amba mebooliomo puu mpodagai atuu a puu mpodagai pewowa langkai, ”Kitao, hinao asa mia mbo'u aiwa melulu, asa-asano.” Dopotae mokole, ”Onae mbo'u powawa lele.”

²⁷ Motae puu mpodagai atuu, ”Kukitao peluluno mia amba-ambano kana peluluno i Ahima'asi anano i Sadoki.” Dopotae mokole, ”Onae mia moiko. Onae aiwa saru lele moiko.”

²⁸ Ka i'amba i Ahima'asi mebooli, ipotae ndi ondae mokole, ”Tabea manangai!” Menggolontuomo i arodo mokole saru rupano hawe a wita, ka ipotae, ”Unde-unde Ira i Ue, Ue Alamu, anu meweengako iramo mia anu tumandeo kaeno umewai komiu ueku mokole.”

²⁹ Ka do'amba mesikeno mokole, ”Tekaduduikoake i Abisalo mia mongura atuu?” Sumangki i Ahima'asi, ”Tempono i Yoabi tumena aku, atamiu andio, kukitao mia mpehowu hadio, sine nahi kuto'orioke hapa atuu.”

³⁰ Dopotae mokole, ”Peliahakomo, pentademo i ra'ai.” Onae meliahako ka ipentade mesikori.

³¹ Ka i'amba tengkitaomo to Etiopia atuu aiwa. Ipotae to Etiopia atuu, ”Omiu ueku mokole mohawe lele moiko, nine oleo andio Ondae i Ue moweeakomiu moleoa saru motola komiu inso a ngkaedo luwuno mia anu mpentade umewai komiu.”

³² Sine ondae mokole mesikeno a nto Etiopia atuu, ”Da tekaduduikoake i Abisalo, mia mongura atuu?” Sumangki to Etiopia atuu, ”Po'ineeomo kana mia mongura atuu iwalimiu ueku mokole ka luwuno mia anu mpentade umewai komiu saru tinoo mosa'o.”

³³ Masusaomo aroado mokole ka do'amba mewuatako a bolongko i wawono pewowa langkai ka dopengese. Kontongaado melempa, dopotae kanandio, ”Anaku Abisalo, anaku, anaku Abisalo! Bakanaano ongkue anu mate sekonopo omue, Abisalo, anaku, anaku!”