2 Samueli 17 - Wunta Mempori

Patuduno i Ahitopeli nahi tondao i Husai

¹ Motaeomo i Ahitopeli ndi Abisalo, ”I'eheakunemo mobiniki hopulu ka orua nsowu mia lumako lumuluo i Daudi wongi koa andio.

² Aku dumaduo kontongaano molema ka nami hina sumangano, ka aku modengkeo. Luwuno sorodadu anu tumondao ira mpolai, ka ku'amba mepate ira mokole.

³ Kanandiomo aku mokuleo luwuno palili atuudo ndi omue, kana umbungkoroi beine mepokule ia ntamano. Gaagi, butu penaano anu asa mia upete'umalao, sekono luwuno palili ntekadudui ira mpiha.”

⁴ Pau andio ipemoikoo i Abisalo ka luwuno mia memota'u Isaraeli.

⁵ Sine motae i Abisalo, ”Poboio koa mbo'u i Husai, to Araki, kato merongeo hapa anu ta pinauno.”

⁶ Mansano hawe i Husai tepohaweakono i Abisalo, motaeomo i Abisalo ndi onae, ”Kanandiomo pau anu pinohaweno i Ahitopeli. Nde kita mentondaoke patuduno? Tewala naahi, pauomo.”

⁷ Ka i'amba motae i Husai ndi Abisalo, ”Patudu anu pinohaweno i Ahitopeli pohona andio nahi moiko.”

⁸ Motae mbo'u i Husai, ”Ito'orio nine amamu ka luwuno miano onaemo puu mpe'iwali, ka melambaha ira kana berua tetadi anano i tonga mpada. Ka mbo'u amamu asa mia sorodadu ntu'u. Nahi ta mo'inee ira sorodaduno mpoturi.

⁹ Manasaomo kanandio-andio mewuni i aasa kunepo ba ia aasa mpo'ianga. Tewala a mposapoia amba-ambano ba opia mia anu mate, isemamo koa anu rumongeo ta motae: Sorodadu anu tumondao i Abisalo mentenangi iramo.

¹⁰ Maupo asa mia moroso ntu'u anu aroano kana singa manasa ta mondende, hangano domento'orio luwu to Isaraeli, nine amamu atuu asa mia pongkiari ka anu tumonda ira onaemo luwuno mia tedoa moroso.

¹¹ Onaemo pu'uno ka kupepatudu kai luwuno to Isaraeli inso i Dani hawe i Bereseba mpempumpu ndi omue, kana hadiono one i wiwi ntahi, ka omue isa'a asalakono lumako metea.

¹² Tome'ungkeo maupo isua ipo'ia ka to mensapoio kana tontoru tedonta i tolino. Nahi ta hina anu tola, moiko onae maupo luwuno mia anu tumondao.

¹³ Tewala onae monsuka i aasa kota, luwudo to Isaraeli ira mpowawa koloro i kota atuu ka to rende ira luwu a ngkorono, ranta maupo watu kodei nahi ta hina mbo'u i ra'ai.”

¹⁴ Motae i Abisalo ka luwudo to Isaraeli, ”Patuduno i Husai, to Araki, moikoopo sekono patuduno i Ahitopeli.” Lano Ondae i Ue Dopatotoomo kasi gagi patuduno i Ahitopeli anu moiko, ka Dopoweeakono i Ue masolaa ndi Abisalo.

I Daudi lumako i Mahanai

¹⁵ I Husai pauako ira Sando Mpesomba Sadoki ka Sando Mpesomba Abiata, ”Kanatuumo patuduno i Ahitopeli ndi Abisalo ka mia memota'u Isaraeli, sine kanandiomo patuduku.

¹⁶ Kanandio-andio tena iramo mia ronga mempauakono i Daudi, kanandio: Si mperato a luwuno po'ianga pesakia lumako i pada one wongi andio, sine irongamo mpesakiako kai mokole ka luwuno sorodadu anu tumonda ira atuu nahi domempinokoropu.”

¹⁷ I Yonata ka i Ahima'asi mo'ia ira mpiha i Eni-Rogeli. Sompo ihawe asa ata beine mowawa lele ndi ondae, lumako iramo pauako ira mokole Daudi. Hangano, ondae nahi moiko dokinita mewinsokio kota.

¹⁸ Sine asa nana'ote kumita ira ka ipauakono i Abisalo. Orua ira mbo'u ronga lumako, ka dohawe a rahano aasa mia i Bahurimi anu hinao sumuru i kintalano. Ka do'amba metii i larono.

¹⁹ Ka i'amba kombiano ueno raha atuu mo'ala asa lewe sawu, iwileo a ngangano sumuru atuu ka iporawoakono wua gandu i wawono, ranta nahina hapamo koa anu tengkita.

²⁰ Tempono luwuno atano i Abisalo tepohaweakono beine atuu i rahano, mpesikeno ira, ”Isua irake i Ahima'asi ka i Yonata?” Sumangki beine atuu ndi ondae, ”Mia atuudo sumaki iramo a ngkorono.” Ka do'amba mepo'ungke ka nahi dohawe ira, ka do'amba mekule i Yerusale.

²¹ Mansano melako iramo, orua ira meluarako inso a nsumuru ka dolako pauako ira mokole Daudi. Dopotae ndi Daudi, ”Ipompari-parimo sumakio korono andio, hangano kanandio ka kanatuumo patuduno i Ahitopeli ndi omiu.”

²² Ka i'amba i Daudi ka luwuno palili anu tumondao mpopari-pari mensakio koro Yarade. I tempono tebosi towea nahina maupo te'asa mia tebinta, anu nahi sakio koro Yarade.

²³ Mansano kumitao i Ahitopeli nine patuduno nahi tinonda, ipokonao lampi kalideno, ka i'amba melungka lumako i kotano ka ipekule i rahano. I'atorao somborino, ka i'amba mendoe. Kanatuumo imate ka ikinaburu a laro kaburuno amano.

²⁴ I Daudi hawe i Mahanai, tempono i Abisalo sumakio koro Yarade saru luwuno to Isaraeli anu tumondao.

²⁵ I Abisalo umariomo montoroo i Amasa umeuo i Yoabi gagi petewawa sorodadu. I Amasa onaemo anano asa mia anu meneeako i Yitira, to Sumaila anu kumombiao i Abigai anano i Nahasi, beine pepaekompono i Seruya ineno i Yoabi.

²⁶ Ka do'amba to Isaraeli ka i Abisalo mpekema i wita Gileadi.

²⁷ Mansano hawe i Daudi i Mahanai, i Sobi anano i Nahasi inso i Raba, kotado inuleno i Amoni, ka i Makiri anano i Amieli inso i Lodebari, saru i Barisilai to Gileadi inso i Rogelimi mpowawa

²⁸ poturia, bolusa uwoi, kuro ka gandu, jelai, tarigu, gandu rinarami, sanggore kara, sanggore motaha,

²⁹ siu hoani, susu baaku, bembe, bimba, ka susu sapi anu pinokobaaku tiano i Daudi ka luwuno mia anu merongaakono, gagi kaangado, hangano dompotae, ”Mia andiodo manasa memokoninggo, memokendo ka memokoranga iramo i pada one.”