2 Samueli 16 - Wunta Mempori

I Daudi tepohaweakono i Siba

¹ Da'iaopo ilaloo i Daudi punsuno pongku wita, haweomo i Siba, atano i Mepibose, tumotowoo mowawa asa pasa kalide linampi, mompateke rua etu roti, asa etu kukisi kisimisi, asa etu wua ngkeu tempo motu'i-tu'i ka asa kusi anggoro.

² Ka do'amba mokole mesikeno ndi Siba, ”Hapa tinoomu saru luwuno andio?” Sumangki i Siba, ”Luwuno kalide andio pesawiado somborimiu mokole. Roti ka wua ngkeu andio kaangado miamiu. Anggoro andio inuado mia i pada one anu memokendo iramo.”

³ Mesikeno ira mokole, ”Isuake ana'ueno uemu?” Sumagki i Siba ndi ondae mokole, ”Onae kongko i Yerusale, hangano ipotae: A oleo andio to Isaraeli ira mpokuleo ndi ongkue poparentaado amaku.”

⁴ Dopotae mokole ndi Siba, ”Tewala kanatuu, luwuno pine'ueno i Mepibose gagi omue me'ueo.” Motae i Siba, ”Metuundu aku, oo ueku mokole, po'ineeomo kupohawe mpiha pompehohawa i aromiu.”

I Simei tumotonaao i Daudi

⁵ Tempono mokole Daudi hawe i Bahurimi, meluarakoomo inso i ra'ai asa mia inso a nsomborino i Saulu, neeno i Simei anano i Gera. Kontongaano melempa meluarako, kongkono mpiha montotonaa.

⁶ Iwunoako ira watu i Daudi ka luwuno anu hinao potorono ndi mokole Daudi, maupo luwuno sorodadu ka luwuno anu langkai potorono mekongko ira i manggali ka i koanano.

⁷ Kanandiomo pauno i Simei tempono ipontotonaa, ”Polai, polaimo, omue puu mpo'uwu rea, mia mosa'o!

⁸ Ondae i Ue mombalo Iramo ndi omue reado luwuno somborino i Saulu, anu ineumu gagi mokole. Dopeweengakonomo i Ue potorono mokole ndi Abisalo anamu. Menteeano omue i'aluko lambahamu omuemu, hangano omue puu mpo'uwu rea.”

⁹ Motae i Abisai anano i Seruya ndi ondae mokole, ”Tembio dahu mate andio tumotonaakomiu ueku mokole? I'eheakunemo mesakiako ka kupoleo uluno.”

¹⁰ Sine dopotae mokole, ”Hapake urusuaku saru omue, hei anano i Seruya? Po'ineeomo ipontotonaa! Hangano tewala Ondae i Ue mepau ndi onae: Totonaaomo i Daudi, isemake anu ta mesikeno: tembio kau poweweu kanatuu?”

¹¹ Motae mbo'u i Daudi a luwuno pegawaino ka ndi Abisai, ”Sekonopo ana ngkoroiku ta mingki umoninio penaaku, tamoako to Benami andio! Po'ineeomo, po'ineeomo ipontotonaa, hangano Ondae i Ue mepau Iramo ndi onae kanandio.

¹² Bara'ura Ondae i Ue Ira kumitao marasaiku andio ka Ondae i Ue mombaloako moikoa ndi ongkue euno pontotonaano mia atuu a oleo andio.”

¹³ Kanandiomo i Daudi motilaloakono pelempaano saru luwuno miano, kontongaano i Simei melempa mpiha i tikono torukuno anu tepotaro saru onae. Kontongaano melempa montotonaa, mewunoako watu, ka morawo pampawu ndi onae.

¹⁴ Ondae mokole ka luwuno palili anu merongaako ira hawe i Yarade memokendo ira, ka do'amba mpenaa-naa i ra'ai.

I Husai ka i Ahitopeli tepohaweakono i Abisalo

¹⁵ Kontongaano atuu, i Abisalo ka luwuno palili, to Isaraeli, mehawe i Yerusale, ka i Ahitopeli merongaakono.

¹⁶ I Husai, to Araki, sambe'eno i Daudi aiwa ndi Abisalo. Motae i Husai ndi Abisalo, ”Tuwu mokole! Tuwu mokole!”

¹⁷ Motae i Abisalo ndi Husai, ”Anumo ndioke petenunumu a nsambe'emu?” Tembio ka nahi ulako mokowalio sambe'emu atuu?

¹⁸ Ka i'amba motaeomo i Husai ndi Abisalo, ”Naahi, hangano onae anu bininiki-Do i Ue ka palili andio saru luwudo to Isaraeli, onaemo anu me'ue aku ka ndi onaemo ba kupo'ia.

¹⁹ Ka i'amba mbo'u, ndi semake asalakono kupetenunu? Kombake a anano? Kana'umpe kupetenunumo ndi amamu, kanatuumo aku metenunu ndi omue.”

²⁰ Ka i'amba motaeomo i Abisalo ndi Ahitopeli, ”Ipatudu akumo: Hapa anu asalakono to meweweuo?”

²¹ Ka i'amba sumangki i Ahitopeli ndi Abisalo, ”Pewowaliako iramo samburueno amamu anu binintano mo'iangako langkanae. Tewala domerongeo luwuno to Isaraeli, nine uweweuomo koroimu do'o'aliaakomu amamu, manasa luwuno mia anu tumondako, ta pinokoroso aroano.”

²² Ka i'amba kema winanguako i Abisalo i wawono dunsi i arodo luwuno to Isaraeli ka ipewowaliako ira i Abisalo samburueno amano.

²³ I tempono atuu patudu anu iweeakono i Ahitopeli mingki kana pontiso anu inema inso ndi Ondae Ue Ala; kanandiomo mbo'u sompo patuduno i Ahitopeli a pongkitano i Daudi maupo i Abisalo.