2 Samueli 15 - Wunta Mempori

Pe'ewano i Abisalo

¹ Ba opia tempo lembuino i Abisalo mompatinda aasa kareta mpeteano saru ngara, ka lima pulu mia anu mpelulu i arono.

² Damo'oru i Abisalo ta mewangu ka mentade i wiwi nsala tetutu a mpewowa langkai. Sompo mia anu hinao kara-karano ka ta mewinso tepohaweako ira mokole mo'ungke moleoa, mia atuu ipoboio i Abisalo. Onae ta mesikeno, ”Inso i kota isuake omue?” Tewala sumangki, ”Atamiu andio te'inso a nsuku Isaraeli anu andio,”

³ ta motae i Abisalo ndi onae, ”Kitao, anu tinuntumu atuu tekona ka mentee, sine inso ndi ondae mokole nahina maupo te'asa mia anu behe merorongeakomu.”

⁴ Motae mbo'u i Abisalo, ”Ba mansa ongkue pinotoro gagi puu mpobitara i wita andio! Gagi sompo mia anu teposisala ke ba hinao kara-karano mongkona gau, moiko i'aiwa ndi ongkue, ka aku moweeakono otumpau anu moleo.”

⁵ Tewala asa mia merangkuhako ta menggolontu mesomba ndi onae, i Abisalo ta tumasiakono kaeno, i'inio mia atuu ka iwoo-wooo.

⁶ Kanatuumo iweweuo i Abisalo a luwudo to Isaraeli anu ta mewinso tepohaweako ira mokole ta mo'ungke moleoa. Kanatuumo ipongko'alao i Abisalo aroado to Isaraeli.

⁷ Pato nta'u lembuino i Abisalo mesikeno ndi ondae mokole, ”I'eheeakunemo lumako, ka ku'ihiio tinangaku anu kudandiomo ndi Ondae i Ue i Heberoni.

⁸ Hangano tempono da kupo'ia i Gesuri, i Arami, atamiu andio montangaomo, kanandio: Tewala Omiu UeIpokule aku ntu'u i Yerusale, asalakono aku moweweu pesomba ndi Omiu.”

⁹ Dopotae mokole ndi onae, ”Lakomo temoiko.” Ka i'amba i Abisalo lumako i Heberoni.

¹⁰ Kontongaano atuu, i Abisalo montena tinena rahasia a luwuno suku Isaraeli saru pe'oliwi, ”Tewala imerongeomo unino tawuwua, impeboolimo: I Abisalo gagiomo mokole i Heberoni!”

¹¹ Perongano i Abisalo anu lumako rua etu mia inso i Yerusale. Me'inolu ira ka melako maupo nahi domporerengkoo, ka nahi domento'orio luwuno atuu.

¹² Tempono ta mompesombaako pesomba, i Abisalo umoluo i Ahitopeli, to Gilo, puu mpopatuduno i Daudi, aiwa inso i Gilo, kotano. Morosoomo tepo'asaa umewa atuu ka kohadi-hadiono palili tumondao i Abisalo.

I Daudi molai inso i Yerusale

¹³ Asa mia puu mpowawa lele aiwa ndi Daudi, ipotae, ”Aroado to Isaraeli te'alaakoomo ndi Abisalo.”

¹⁴ Ka i'amba motae i Daudi a luwuno pegawaino anu kongko saru onae i Yerusale, ”Aiwa tompolai ba nahi kita mentola inso ndi Abisalo. Impontuturakomo melako, kasi ronga tumonda lembui kita ka isolangi kita ka inangiakono ponai kota andio!”

¹⁵ Luwuno pegawaido mpotaeako ira mokole, ”Po'ehemiumo koa mokole! Luwuno atamiu andio mpepatinda!”

¹⁶ ka i'amba meluarako iramo mokole dotonda ira luwuno pe'asa rahano, sine hopulu samburuedo dobinta ira mokole umiangakono langkanae.

¹⁷ Ondae mokole meluarako domentondao luwuno miano. Mpenaa-naa ira ia raha anu pokotompa.

¹⁸ Luwuno pegawaino mpelempa melaloo, kanatuu koa mbo'u to Kereti ka to Peleti. Kanatuu koa mbo'u to Gati nomo etu mia hadiono, anu lano mentondao mompu'u i Gati, mpelempa lumalo ira mokole.

¹⁹ Mesikeno iramo mokole ndi Itai, to Gati, ”Tembio ka upelempa mbo'u saru omami? Pekule ka po'iamo saru mokole, hangano omue mia hawe, ka i'amba mbo'u omue mia tinadi inso a mpo'ianga insoamu.

²⁰ Da indiawi uhawe, kana'umpemo a oleo andio aku wawako melakopi meronga saru omami, kontongaano asalakono aku lumako nahi kuto'orio ba isua. Pekulemo ka wawa ira mbo'u luwuno pepaekompomu. Po'ineeomo Ondae i Ue mopokitao pompehohawa ka pokongkomi-Do ndi omue!”

²¹ Sine i Itai sumangki ira mokole, ”A nee-Do i Ue anu tuwu ka a ntuwumiu ueku mokole, isua ipo'ia ueku mokole, moiko tuwu maupo mate, i tu'ai mbo'u atamiu andio.”

²² Moteomo i Daudi ndi Itai, ”Ba kanandio, potilalomo pelempa.” Ka i'amba telaloomo i Itai, to Gati, saru luwuno miano ka luwuno pe'etuno.

²³ Luwuno inia mia mpengese meroku, tempono luwuno bawaa atuu ntelalo. Ondae mokole sumakio koro Kidironi ka luwuno bawaa atuu mpelempa tetutu i pada one.

²⁴ Ka hinaano, i Sadoki mbo'u kongko i ra'ai saru luwudo to Lewi puu mpontande Burua Pedandia-Do Ue Ala. Domenaao Burua Pedandia-Do Ue Ala ranta luwuno bawaa inso i kota umari mpesakiako. I Abiata mbo'u metonda.

²⁵ Ka i'amba motae iramo mokole ndi Sadoki, ”Wawaomo Burua Pedandia-Do Ue Ala pokuleo i kota. Tewala mohawe aku pompehohawa a pongkita-Do i Ue, Ira koa wawa aku mekule, ranta aku koa wali kumitao saru po'iangano mbo'u.

²⁶ Sine tewala mepau Ira, ’Nahi Kupekonako,’ mepatinda akumo, po'ineeomo Doweweuo ndi ongkue hapa anu moiko a pongkita-Do.”

²⁷ Motae ira mbo'u mokole ndi sando mpesomba Sadoki. ”Uto'oriomoke? Pekulemo temoiko i kota saru anamiu, i Ahima'asi anamu ka i Yonata anano i Abiata.

²⁸ To'oriomo, aku koa mesikori umpeda a luwuno po'ianga pesakia lumako i pada one, ranta kai hina lele anu pauakune inso ndi omue.”

²⁹ Ka i'amba i Sadoki ka i Abiata wawao Burua Pedandia-Do Ue Ala mokuleo i Yerusale ka dopo'ia i ra'ai.

³⁰ I Daudi morake a Pongku Wita Saitu kontongaano mengese, uluno mesoumbu ka ipelempa nahi pe'empehi karu. Luwuno palili anu mentondao mpesoumbu ira luwu, mporake kontongaado mpengese.

³¹ Ndi Daudi pinauako kanandio, ”I Ahitopeli kongko i olodo mia anu ntepo'asaakono i Abisalo.” Motaeomo i Daudi. ”Siimo Ipokogagio patuduno i Ahitopeli atuu, oo Ue.”

³² Mansano hawe i Daudi a punsuno, a mpo'iangado mia mpenggolontu mpesombai Ira Ue Ala, tengkitaomo i Husai, to Araki, tumotowoo melemba teberi ka wita a wawo uluno.

³³ Motae i Daudi ndi onae, ”Tewala kotumonda aku, te'ingka kogagi bebeatiku.

³⁴ Sine tewala mekuleko i kota ka upepau ndi Abisalo: Ongkue andio atamiu, oo mokole. Mompu'u i ndi'ipua ongkue atado amamiu ka kanandio-andio aku gagi atamiu. Bakanandio komokobalio patuduno i Ahitopeli hangano ongkue.

³⁵ Kombake i sando mpesomba Sadoki ka sando mpesomba Abiata saru omue i ra'ai? Luwuno anu rinongemu inso i langkanaeno mokole, asalakono kau pauakono sando mpesomba Sadoki ka i Abiata.

³⁶ Pewowoloomo, saru ondae i ra'ai kongko orua ira anado, i Ahima'asi anano i Sadoki ka i Yonata anano i Abiata. Molalo ondae, asalakono ime'oliwio ndi ongkue luwuno anu rinongemiu.”

³⁷ Kanandiomo i Husai, sambe'eno i Daudi hawe i Yerusale tekonai i Abisalo mewinso i kota atuu.