2 Samueli 14 - Wunta Mempori

Pekuleno i Abisalo

¹ Tempono i Yoabi anano I Seruya, tumo'orio nine ondae mokole da dororondoo i Abisalo,

² montenaomo mia lumako i Tekoa ta umalao inso i ra'ai asa beine monto'ori. Motaeomo a beine atuu, ”Po'onde-onde mo'inombo ka pokonaomo sangka po'inombo. Si urapiakono lana koroimu, ka pogaumo kana asa beine anu tehineomo ipo'inombo hangano mateno asa mia.

³ Ka i'amba lumako me'aro a mokole ka pauako iramo kanandio.” Onaemo ka ipauakono i Yoabi hapa anu asalakono ta pinauno beine atuu.

⁴ Tempono beine to Tekoa atuu mepau ndi ondae mokole, menggolontuomo mesomba rupano hawe a wita, ipotae, ”Itulungi akumo, oo mokole!”

⁵ Mesikeno ira mokole, ”Hinao hapa?” Sangkino, ”Ongkue andio tuwu beine; tamaku mateomo.

⁶ Atamiu andio hinao orua ana ntamano. Me'u'ua ira a tonga mpada ka nahina anu monsia ira, anu asa tumunduhio anu susua ka ipepateo.

⁷ Kanandio-andio luwudo anu mpepe'etu mpentade umewaio atamiu andio ka dompotae, ’Weekamimo mia anu mepateo pepaekompono atuu ka kimehuku mateo euno penaano pepaekompono anu pinepatenomo atuu, ka kimeropu ira mbo'u anu ta me'umbuo pusakano.’ Mingki ira meropuo inuleku anu da mekongko atuu ka nahi pobinta nee ke inuleno tamaku i wawontolino.”

⁸ Ka do'amba mokole motaeakono beine atuu, ”Pekulemo i rahamu, aku koa moweeko pomputusi mongkona teweweumu.”

⁹ Motae beine to Tekoa atuu ndi ondae mokole, ”Humbee ueku mokole, anu sala atuu kususuruo saru somboriku, sine ondae mokole saru kadera poparentado nahina salado.”

¹⁰ Ka do'amba motae mokole, ”Ba hinao mia anu mompau hapa mbo'u ndi omue, wawaomo me'aro ndi ongkue ka nami ta rumisuiko mbo'u.”

¹¹ Motae beine atuu, ”Po'ineeomo omiu mokole ipewowolo Ira i Ue, Ue Alamiu, ka mia anu motuntu pasua rea nahi poweweu hadio matea ka anaku nahi ta pinepate.” Ka do'amba motae mokole, ”A nee-Do i Ue, anu tuwu, nahina mau te'asa lewe wuu inso a uluno anamu ta tedonta a wita!”

¹² Ka i'amba beine atuu motae, ”I'eheakonomo atamiu andio mompau te'asa mpali pau mbo'u ndi omiu ueku mokole.” Sangkino, ”Pauomo.”

¹³ Motaeomo beine atuu, ”Tembio omiu mokole ka iposongka kanandio a bawaa-Do Ue Ala? Ka ipepau kanandio, omiu mokole kana mia anu hinao salano hangano nahi eheako ira mpekule mia anu umariomo itadi ira.

¹⁴ Asalakono kita memate kana uwoi anu te'uwu a wita ka nahi ta pinokopumpu mbo'u. Sine Ondae Ue Ala nahi Dopo'ala penaano mia; Dosongkaomo mia anu tinadi nahi ira mentinadi mpiha inso ndi Ondae.

¹⁵ Kanandio-andio, aiwa aku mohaweo mongkona andio ndi omiu ueku mokole, nde hangano mia hadio atuu dompokodoito akumo. Pinewowolono atamiu andio: moikoopo ari kupauako ira mokole, bara'ura ondae mokole ira uminduo po'emano atado andio.

¹⁶ Hangano, ondae mokole ira merorongeakune ka motolao atado andio inso a ngkaedo mia anu ta mokotampula pohona aku saru anaku inso a ntia pusaka-Do Ue Ala.

¹⁷ Atamiu andio mompewowolo koa mbo'u: paudo ueku mokole manasa ta mompokorodo aroa, nde kana mala'eka-Do Ue Ala, kanandiomo ueku mokole mokomposisalao hapa anu moiko ka anu mosa'o. Ondae i Ue, Ue Alamiu, kumongkomi komiu.”

¹⁸ Dosangkio mokole beine atuu, dopotae, ”Si wuniakune hapa anu aku mesikenoakono ndi omue.” Ipotae beine atuu, ”Tabeamiu ueku mokole, ipepaumo!”

¹⁹ Mesikeno ira mokole, ”Ipokowaliko i Yoabi ke a luwuakoano andio?” Sumangki beine atuu, ”A ntumuwumiu, ueku mokole, nahina anu pansia i koana ke i manggali inso a luwuno anu pinaumiu ueku mokole. Menteeano atamiumo i Yoabi anu parenta aku. Onae anu tumena aku pauo pau andio.

²⁰ Kasi mengkaa mongkona atuu, atamiu i Yoabi moweweuomo kanandio. Sine omiu ueku mokole pande komiu mompewowolo kana mala'eka-Do Ue Ala, ranta kai to'orio luwuno anu gagi i tolino.”

²¹ Umarino atuu motae iramo mokole ndi Yoabi, ”Moiko, ku'induo po'ema andio. Lakomo, pokuleomo i Abisalo, mangalitau atuu.”

²² Ka i'amba i Yoabi menggolontu mesomba rupano hawe a wita ka umunde-unde ira mokole. Motae i Yoabi, ”A oleo andio ito'orio atamiu, nine omiu ueku mokole ipekonao atamiu, hangano po'emano atamiu andio i'induomo ueku.”

²³ Ka i'amba i Yoabi lumako i Gesuri ka iwawao i Abisalo i Yerusale.

²⁴ Sine dopotae mokole, ”Onae asalakono kai pekule i rahano ka siimo mbo'u i'aiwa i aroku.” I Abisalo mekuleomo i rahano ka nami aiwa i arodo mokole.

²⁵ Nahina mia montama kana i Abisalo ia luwuno Isaraeli ranta kai tedoa inunde-unde. Inso a mpelengkaruno hawe a ntoro uluno nahina tataano.

²⁶ Tewala ikeruo wuuno, sompo a tampulaano ta'u ikeruo hangano ipemobeao lahi, wuu uluno atuu kinati, mobeano rua etu sikala montonda watu pongkatido mokole.

²⁷ I Abisalo hinao otolu ira anano tama ka asa beine meneeako i Tamari. Onae asa beine anu tekosi.

²⁸ I Abisalo mo'ia i Yerusale orua nta'u tehineno, sine nahi hori aiwa i arodo mokole.

²⁹ Ka i'amba i Abisalo montena mia moboio i Yoabi ta tinena lumako ndi ondae mokole. Sine i Yoabi nahi behe aiwa ndi onae. Itenao mbo'u mia moboio kompenduano, sine nahi behe aiwa.

³⁰ Ka i'amba motaeako ira atano, ”Kitao, lereno i Yoabi rau i asambalino lereku ka i ra'ai hinao jelaino. Imelakomo, imesongkoomo.” Onaemo ka domesongkoo atano i Abisalo lere atuu.

³¹ Ka i'amba i Yoabi lumako tepohaweakono i Abisalo i rahano, ka ipotae ndi onae, ”Tembio atamu ka domesongkoo lereku?”

³² Motae i Abisalo ndi Yoabi, ”Montena akumo mia aiwa ndi omue saru pe'oliwi: ’Aiwamo ramai, aku tumenako lumako ndi ondae mokole, pauako ira: hapa tuduno kuaiwa inso i Gesuri? Moikoopo kupo'ia mpiha i ra'ai.’ Kanandio-andio, ineheku aiwa i arodo mokole. Tewala hinao salaku, po'ineeomo kuhinuku mate.”

³³ Ka i'amba i Yoabi aiwa tepohaweako ira mokole ka ipauo mongkona atuu. Dopoboimo mokole i Abisalo. Onae aiwa tepohaweako ira mokole, ka ipenggolontuu rupano hawe a wita i arodo. Ka do'amba mokole woo-wooo i Abisalo.