2 Samueli 13 - Wunta Mempori

I Aminoni sumolangio i Tamari

¹ Umari atuu gagiomo tegagia andio. I Abisalo, ana ntamano i Daudi hinao asa uaino anu tekosi, neeno i Tamari. I Aminoni, ana ntamano i Daudi mekokonoo.

² Aroano i Aminoni tedoa masusa ranta kai mahaki hangano i Tamari, pepaekompo awono. Nde, onae da ana beine ka montonda pinewowolono i Aminoni tedoa motungko ipoweweu hapamokoa ndi onae.

³ I Aminoni hinao sambe'eno neeno i Yonada, anano i Simea, pepaekompono i Daudi. I Yonada asa mia anu tedoa pande.

⁴ Ipotaeakono i Aminoni, ”Hei ana mokole, tembio kau tedoa masusa sompo mo'oru? Tembio ka nahi upauo ndi ongkue?” Motae i Aminoni ndi onae, ”Kupekokonoo i Tamari, uaino i Abisalo, pepaekompoku.”

⁵ Motaeomo i Yonada ndi onae, ”Pepombolemo a mpoturiamu ka pompemaha-mahaki. Tewala haweomo amamu melungaiko, asalakono pauako ira: I'eheakono i Tamari, uaiku aiwa ka ipaka aku. I'eheakono mompatinda kaanga i aroku, ka kukitao ka iposumpuakune kaanga.”

⁶ Umari atuu mepomboleomo i Aminoni ka ipompemaha-mahaki. Mansado hawe mokole melungaio, motaeomo i Aminoni ndi ondae mokole, ”I'eheakono i Tamari uaiku aiwa moweweu ba te'opia kukisi i aroku, ka isumpuakune.”

⁷ Ka i'amba i Daudi me'oliwiakono i Tamari i rahano, ”Lakomo i rahano i Aminoni, pepaekompomu ka patindaakonomo kaanga.”

⁸ Lumakoomo i Tamari i rahano i Aminoni, pepaekompono, anu tekonai mepombole. I'alaomo tarigu sinalo, ka ipisikio, moweweu kukisi i arono ka itunuo.

⁹ Umarino atuu mo'alaomo kawali ka inaao ihino i arono i Aminoni. Sine i Aminoni nahi behe mongkaa ka ipotae, ”Tena iramo luwu mia mpeluarako binta aku.” Ka do'amba mpeluarako luwuno mia mebintao.

¹⁰ Ka i'amba motae i Aminoni ndi Tamari, ”Wawaomo kaanga atuu a laro bolongko, ka kusangkao inso a ngkaemu.” I Tamari umalao kukisi anu wineweuno atuu, ka iwawao i bolongko ndi Aminoni pepaekompono.

¹¹ Tempono ana beine atuu mompatindaakono ka ipongkaa, i'inio moroso ana beine atuu ka ipotaeakono, ”Aiwamo poturi ndi ongkue, uaiku.”

¹² Sine ipotaeakono, ”Osi'i aka! Si solangi aku, nde gau anu kanandio nahi moiko i wineweu a nto Isaraeli. Si weweuo anu mosa'o andio.

¹³ Isuamo kuwawao rupaku? Omue ko kinita kana mia anu mosa'o i Isaraeli. Gagi pauako iramo mokole, manasa ira koa uminduo meweengako aku ndi omue.”

¹⁴ Sine, i Aminoni nahi perorongeakono pinauno. Hangano morosoopo sekono onae, ranta ka isolangio.

¹⁵ Ka i'amba i Aminoni tedoa umo'aliaakono. Tendeano o'aliaa anu pimembasaino langkaiopo sekono pompekokono anu pinembasaino. Motae i Aminoni ndi onae, ”Pewangumo! Polaimo!”

¹⁶ Motaemo ana beine atuu ndi onae, ”Si kanatuu, nde tumena aku lumako laluaopo mosa'ono sekonopo anu umari wineweumu ndi ongkue.” Sine i Aminoni nahi perorongeakono.

¹⁷ Ipoboio ata anu mekakaakono ka ipotae, ”Tenaomo beine andio lumako inso i aroku ka kunsiomo pewowa i bungkuno.”

¹⁸ Beine atuu mompokona lemba rahi anu tedoa tekosi; nde lano kanandiomo luwuno anado mokole anu da ana beine wela pompokona lemba rahi. Ka i'amba puu pompekakaako atuu sumaario meluarako ka ikunsio pewowa i bungkuno.

¹⁹ Ka i'amba i Tamari monaa awu a ntoro'uluno ka iberio lemba rahi pinokonano anu tedoa tekosi. Inaao kaeno a ntoro'uluno ka ilako monsabangi tedoa meroku.

²⁰ Mesikeno i Abisalo pepaekompono, ndi onae, ”Nde i Aminoni, pepaekompomu atuu, ipewowaliakomumo? Kanandio-andio uaiku perodo-rodomo. Nde komba pepaekompomu ke onae? Kasi hangano atuu gagi pewowoloamu.” Ka i'amba i Tamari mo'ia asa-asano i rahano i Abisalo.

²¹ Mansano rumongeo i mokole Daudi hapa anu gagi atuu tedoaomo tekuda.

²² I Abisalo nahi pauakono i Aminoni mongkona hapamokoa, anu moiko ke anu mosa'o. Sine i Abisalo umo'aliakono i Aminoni, hangano i solangio i Tamari, uaino.

I Aminoni pinepate, i Abisalo molai

²³ Orua nta'u umarino atuu, i Abisalo mogonti wulu bimba i Baala-Hasori, umpeda i Eparai. Onaemo ka i'olu ira i Abisalo luwuno ana ntamado mokole.

²⁴ I Abisalo me'aro ndi ondae mokole ka ipepau, ”Atamiu andio kontongaano mogonti wulu bimba. Po'ineeomo omiu mokole ka luwuno pegawaimiu aiwa merongaakune.”

²⁵ Sine ondae mokole motae ndi Abisalo, ”Naahi anaku, siimo kimelako luwu, kasi kimpokomasusako.” I Abisalo medada, sine ondae mokole nahi dobehe lumako ka butu ira uminduo.

²⁶ Onaemo ka ipotae i Abisalo, ”Tewala kanatuu, i'eheakonomo i Aminoni, pepaekompoku, lumako saru omami.” Dosangkio mokole, ”Hapa tuduno ba ilako merongaakomu?”

²⁷ Sine mansano idadaio I Abisalo, i Daudi umeheakono i Aminoni ka luwuno ana ntamado mokole lumako saru onae.

²⁸ Ka i'amba i Abisalo parenta ira miano kanandio, ”Pepenteeomo! Tempono aroano i Aminoni mawongko hangano anggoro, ka aku mepau ndi omiu: Tunduhiomo i Aminoni ka pepateo. Si medoito, kombake ongkue anu parentako? Pokorosoo aroamiu ka imegagimo mosia!”

²⁹ Luwuno miano i Abisalo domeweweuo i Aminoni kana anu iparentaako ira i Abisalo. Ka i'amba luwuno ana ntamado mokole singge mia mesawi a bagalino ka dompolai.

³⁰ Tempono da mekongko ira a laansala, lele hawe ndi Daudi: I Abisalo mepate iramo luwu anado mokole, nahina maupo te'asa mia anu tola.

³¹ Ondae mokole meberisakono sangkado ka dopepombole a horo. Luwudo pegawaido mpentade i tu'ai ka sangkado teberi.

³² I Yonada anano i Simea, akano i Daudi, mepau, potaeno, ”Si ko'aro-aroa nine luwuno mia mongura, ana ntamado mokole atuu, mempinepate iramo. Butu i Aminoni anu mate, nde mongkona atuu gagiomo pompakosi aroano i Abisalo mompu'u i Aminoni sumolangio i Tamari, uaino.

³³ Gaagi, siimo ueku mokole i pompewowolo nine luwuno ana ntamamiu mokole memate iramo. Butu i Aminoni anu mate.”

³⁴ I Abisalo molai. Tempono mia anu tekonai medaga mengkikita, ikitaomo hadio mia mehawe inso i Horonai ihorino pongku wita.

³⁵ Motae i Yonada ndi ondae mokole, ”Kitao, luwudo ana ntamamiu mokole me'aiwa! Menteeomo kana anu pinauno atamiu.”

³⁶ Da'iapo i'umari mepau, mehawe iramo ana ntamado mokole atuu. Mpengese ira meroku. Mokole mbo'u ka luwuno pegawaino mpengese ira tedoa meroku.

³⁷ I Abisalo molaiomo lumako ndi Talamai anano i Amihuri, mokoledo to Gesuri. I Daudi tehine ipompemasusa hangano anano atuu.

³⁸ Kanatuuumo polaino i Abisalo lumako i Gesuri ka mo'ia i ra'ai otolu nta'u tehineno.

³⁹ Luuntuomo tekudado mokole ndi Abisalo, hangano nami dopompemasusa mbo'u hangano mateno i Aminoni.